აღნიშნულ მტკიცებულებას შენობაშივე დაყენებული სათვალთვალო ვიდეო კამერიდან ამოღებული კადრებიც რომ დამატებოდა, (რაც მაშინდელ კონტროლის პალატას არც კი უცდია. ავტ), ყველაფერი ცხადი გახდებოდა.
დიქტოფონის წართმევის მცდელობა, აუდიტის პრესსამსახურის უფროსის რეაქცია დიქტოფონის დანახვაზე და ჩამორთმეული პერსონალური კომპიუტერი ადვოკატისთვის _ ეს ყველაფერი მაშინდელი კონტროლის პალატის შენობაში უამრავი მოწმის თანდასწრებით ხდებოდა.
მაგრამ, ვინაიდან ლევან ბეჟაშვილის უწყების მთავარი საქმე მხოლოდ “ქართული ოცნების” შემომწირველთა დაჯარიმება იყო, ამიტომ საჯარო ინფორმაციის გაცემისთვის და საჩივრების განხილვისთვის დროს არ “კარგავდნენ”.
პარლამენტარი ბეჟაშვილი, დღეს აქტიურად არის ჩართული დებატებში და უმცირესობის სახელით მოძღვრავს უმრავლესობასაც და საზოგადოებასაც ისე, რომ არც კი ახსენდება ის მოვლენები, რომელიც კონტროლის პალატაში მისი მოღვაწეობის დროს ხდებოდა.
ხდებოდა უამრავი უკანონო რამ, დაწყებული საერთო სასამართლოების მიჩქმალული აუდიტით და დამთავრებული რიგითი საჩივრებით, აღარაფერს ვამბობთ “შემომწირველების საქმეზე”.
29 აპრილს, მოსამართლე ნათია ბუსკაძემ მხარეებს _ “გურია ნიუსსა” და აუდიტის სამსახურს იმ დავის სარეზოლუციო ნაწილი გააცნო, რომელიც თითქმის ერთი წელია საქალაქო სასამართლოში მიმდინარეობს.
ნათია კაპანაძე: (“გურია ნიუსის” წარმომადგენელი სასამართლოში): “სასამართლოს გადაწყვეტილებით ნაწილობრივ დაკმაყოფილდა “გურია ნიუსის” ჟურნალისტის სარჩელი, რომელიც ორ ნაწილს აერთიანებდა. პირველი ნაწილით “გურია ნიუსი” ითხოვდა, აუდიტის სამსახურს წარმოედგინა მის მიერვე ადმინისტრაციული წესით განხილული საჩივრის პასუხი, რაზედაც ამ უკანასკნელმა აღიარა, რომ მსგავსი დოკუმენტი საერთოდ არ შეუქმნია. ამ ნაწილთან დაკავშირებით სასამართლოს აღარ დარჩა სხვა ბერკეტი, რადგან ის ვერ დააძალებდა აუდიტის სამსახურს, შეექმნა ასეთი დოკუმენტი.
რაც შეეხება მეორე ნაწილს, სასამართლოს გადაწყვეტილებით, აუდიტის სამსახურს დაევალა ჟურნალისტის მიერ შეტანილი საჩივრის განხილვა და მოწმეების დაკითხვა”.
აუდიტის სამსახურსა და “გურია ნიუსს” შორის დავა 2012 წლის მაისში დაიწყო. მაშინ ამ უწყებაში საჯარო ინფორმაციის მიუღებლობას ადმინისტრაციული წესით ვასაჩივრებდით და ნათია მოგელაძის დეპარტამენტის თანამშრომელთა სახელობით სიას და მათ სახელფასო სარგოების შესახებ ინფორმაციას ვითხოვდით.
“კონტროლის პალატა მოკლებულია შესაძლებლობას, გადმოგცეთ ინფორმაცია ზემოთ აღნიშნულ საშტატო ერთეულებზე მომუშავე საჯარო მოსამსახურეთა ვინაობის შესახებ, მათი თანამდებობრივი სარგოების მითითებით, ვინაიდან ხსენებული ინფორმაცია შეიცავს პერსონალურ მონაცემებს!” _ ასეთი იყო მაშინ მათი პასუხი.
თითქოს დარღვევად ეს არ იყო საკმარისი, ადმინისტრაციულ განხილვაზე შესვლამდე, ვინმე ჯიმშერ დობორჯგინიძემ (ასე გაგვეცნო თავად. ავტ) “გურია ნიუსის” ადვოკატს, ნათია კაპანაძეს ლეპტოპის შეტანის უფლება არ მისცა, ჩვენ კი დიქტოფონის წართმევა დაგვიპირა.
საქმეში პრესსამსახურის ხელმძღვანელი ფატი მამიაშვილიც ჩაერთო, რომელმაც ისე გაიკვირვა ჟურნალისტის მხრიდან აუდიოჩაწერის განხორციელება, თითქოს ცეცხლსასროლი იარაღით ვიყავით შეიარაღებულები.
კონტროლის პალატის დაცვის თანამშრომლებისა და შიდაგანაწესის სამსახურის უფროსის, (როგორც თავად წარმოგვიდგინა თავი) ჯიმშერ დობორჯგინიძის მხრიდან ჩვენი მისამართით გატარებულმა ჩხრეკის უპრეცედენტო ზომებმა ყოველგვარ მოლოდინს გადააჭარბა. გარდა იმისა, რომ ნათია კაპანაძეს საკუთარი პერსონალური კომპიუტერის შეტანის საშუალება არ მისცეს, რითაც მას ხელი შეუშალეს პროცესზე საკანონმდებლო ბაზის ელექტრონულად გამოყენებაში, მისი ჩანთა რამდენჯერმე გაატარეს დეტექტორზე. ბოლოს განუცხადეს, რომ ჩანთიდან მხოლოდ ის ნივთები ამოეღო, რაც მას ჭირდებოდა, დანარჩენი კი ლეპტოპიანად დაცვასთან დაეტოვებინა.
ვინმე ჯიმშერ დობორჯგინიძემ რომელიც პერიოდულად ჩვენი წარმომავლობითაც ინტერესდებოდა, გაგვიცხადა, რომ შიდაგანაწესი არსებობდა, რომლის თანახმად შენობაში ყოველგვარი ტექნიკისა და საკომუნიკაციო საშუალებების შეტანა გვეკრძალებოდა.
პრესსამსახურის უფროსმა, ფატი მამიაშვილმა კი დაასკვნა, რომ “წარმოდგენაც არ გვქონდა მათ შიდაგანაწესზე.” ჯიმშერ დობორჯგინიძემ ჩვენ კითხვაზე, როდიდან ამოქმედდა ეს შიდაგანაწესი, გვიპასუხა, რომ კონტროლის პალატაში ყოველთვის ასეთი წესი იყო.
საერთო ჯამში მთელი ეს პროცესი ჩვენს აუდიოჩამწერზე დაფიქსირდა და გამოქვეყნდა კიდეც “გურია ნიუსის” ვებგვერდზე.
სასამართლო პროცესზე აუდიტის სამსახურის წარმომადგენელმა განაცხადა, რომ ასეთი პიროვნება მათთან საერთოდ არ მუშაობდა და ჩვენი საჩივარიც სწორედ ამიტომ არ განიხილეს.
ვინ მოქმედებდა ჯიმშერ დობორჯგინიძის სახელით, როგორ გადაადგილდებოდა ეს პიროვნება თავისუფლად შენობაში, რა უფლებით დააფრიალებდა კონტროლის პალატის თავმჯდომარის საჩივრებს, ამით ბეჟაშვილი არ დაინტერესებულა.
2012 წლის 24 აგვისტოს “გურია ნიუსმა” აუდიტის სამსახურის წინააღმდეგ სარჩელი სასამართლოში შეიტანა.
მოსამართლემ აუდიტის სამსახურს დაავალა, ყველა ის საბუთი წარმოედგინა, რომელიც “გურია ნიუსის” მიერ შეტანილ საჩივრებზე მომზადდა. წარმოდგენილი დოკუმენტაციის მიხედვით გაირკვა, რომ მათ საჩივრები არც კი განუხილავთ.
სასამართლოს გადაწყვეტილებით, აუდიტის სამსახურს განუხილველი საჩივრის შესწავლა მაინც მოუწევს. დაინტერესების შემთხვევაში, ალბათ “ჯიმშერ დობორჯგინიძის” მეტსახელით მოღვაწე თანამშრომლის დადგენაც არ გაუჭირდებათ…
