ოზურგეთის მუნიციპალიტეტის საკრებულოში უკვე დაიწყო მუშაობა ამ საკითხის ირგვლივ. საკრებულოს თავმჯდომარის ინიციატივით, გაიმართა პირველი სამუშაო შეხვედრა, რომელზეც კონკურსი-ატესტაციის ჩატარებისთვის საჭირო პროცედურებზე იმსჯელეს.
ოზურგეთის საკრებულოს თავმჯდომარე, ალეკო მამეშვილი „გურია ნიუსთან“ ამბობს, რომ ეს პროცესი იქნება გამჭვირვალე და კომისიაში სხვადასხვა პროფესიის წარმომადგენლებს ვიხილავთ.
_ ძალიან რთული პროცესია, მითუმეტეს გამოცდილება არ გვაქვს, არ არსებობს. კანონის თანახმად, კომისიის თავმჯდომარე საკრებულოს თავმჯდომარე ან მისი მოადგილე უნდა იყოს და შემდეგ კომისიის თავმჯდომარე განსაზღვრავს კომისიის წევრთა რაოდენობას, რომელიც იქნება მრავალფეროვანი. საკრებულოს და ბიუროს სხდომებზე კონკურსის საკითხს დიდი დრო დაეთმობა.
პირველ ეტაპზე მოხდება კომისიების ჩამოყალიბება. მივიღებთ შესაბამის დებულებას და დავიწყებთ მზადებას კონკურსი-ატესტაციისთვის. ყველა დეტალის განხილვა მოხდება კომისიის მიერ. თუ როგორ ჩატარდება კონკურსი, როგორი კომპეტენციები დადგინდება ამა თუ იმ თანამდებობაზე განაცხადის მსურველთათვის, იქნება ტესტირება – გასაუბრება, პირველ ეტაპზე, პირადი მონაცემებით მოხდება პრეტედენტთა გადარჩევა. აღსანიშნავია, რომ კონკურსს გაივლის საჯარო სექტორში დასაქმებული ყველა პიროვნება. მოხდება ვაკანსიების გამოცხადება არსებულ საშტატო ერთეულებზე და ადამიანები დაინიშნებიან კონკურსის შედეგების მიხედვით, _ გვითხრა ალეკო მამეშვილმა.
როგორც ალეკო მამეშვილმა გვითხრა, ამ ეტაპზე მუნიციპალიტეტის გამგებელი კონკურსში არ იღებს მონაწილეობას.
_ კანონის თანახმად, 1 ივნისიდან სამი თვის განმავლობაში, ყველა საჯარო მოხელე, გარდა გამგებლისა და კანონში კიდევ ჩამოთვლილი სხვა თანამდებობის პირებისა, სამ თვეში გაივლიან კონკურსს და ისე უნდა დაინიშნონ. გამგებელს აქვს ვადა ერთი წელი, რომ წარმატებით გაიარონ კონკურსი, _ გვითხრა ალეკო მამეშვილი.
