ასეთი მიმართვით მან უკვე მიმართა განათლებისა და მეცნიერების სამინისტროს, აბაშის რესურსცენტრის დირექტორს და სხვადასხვა მედია საშუალებას. მიმართვაში ნათქვამია, რომ დღეის მდგომარეობით, აბაშის N2 საჯარო სკოლას არ ჰყავს არც სამეურვეო და არც პედაგოგიური საბჭო. სკოლას არ გააჩნია შინაგანაწესი, არ ჰყავს დისციპლინარული საბჭო და ერთადერთ ლეგიტიმურ ორგანოდ გვევლინება მოსწავლე ახალგაზრდობის თვითმმართველობის ორგანიზაცია.
“ჩვენი ახალგაზრდული ორგანიზაციის მიერ გამოკვლეულ იქნა სკოლაში არსებული დარღვევები და სიყალბეები, რომლებიც სისხლის სამართლებრივ დანაშაულად გვევლინება და საფრთხის ქვეშ აყენებს საატესტატო გამოცდების ლეგიტიმურობას. აღნიშნულიდან გამოსავალი მხოლოდ ერთია:
სკოლის არალაგიტიმური დირექტორი გათავისუფლებული იქნას და დირექტორის თანამდებობაზე დაინიშნოს მოვალეობის შემსრულებელი.
სასწრაფოდ იქნას მოწვეული პედაგოგიური საბჭოს სხდომა და აირჩეს პედსაბჭოს თავმჯდომარე.
ახლადდანიშნულმა დირექტორის მოვალეობის შემსრულებელმა, პედსაბჭოს თავმჯდომარემ, მშობელთა კომიტეტის თავმჯდომარემ და მოსწავლე ახალგაზრდობის თვითმმართველობის ორგანიზაციამ საერთო კრებაზე შეიმუშავონ და დაამტკიცონ სკოლის შიგაგანაწესი. შეიქმნას დისციპლინალური კომისია, ჩამოყალიბდეს საგამოცდო და საპრეტენზიო კომისია, შეიმუშავონ კომისიის დებულება, რომელშიც გაწერილი იქნება ბარიერის მინიმალური ოდენობა.
ამ მითითებების ზედმიწევნით შესრულებით შესაძლებელია იმ ჩიხური მდგომარეობიდან გამოსვლა, რომელიც ამჟამად აბაშის N 2 საჯარო სკოლაშია შექმნილი”, _ ვკითხულობთ მიმართვაში.
დაპირისპირება, რომელიც სკოლაშია შექმნილი, აშკარად თვალშისაცემია, ამიტომ მიმართვის ავტორს გავესაუბრეთ.
_ ლევან, დაუჯერებელია სკოლა დღემდე მოსულიყო, თუ ყველა ის ბრალდება, რომელიც შენს მიმართვაშია მოყვანილი რეალურია. აშკარად იკვეთება დაპირისპირებული ფონი. როდის შეიქმნა მოსწავლეთა თვითმმართველობა და რატომ ფიქრობ, რომ სკოლის დირექცია გებრძვით?
_ უფრო გასაგები რომ იყოს ყველაფერი, მოდით სულ თავიდან დავიწყოთ. ამ სკოლაში დედაჩემი, თინათინ შალიკაშვილი ბიოლოგიას ასწავლის, სწორედ მასთან ვიყავი მისული 2012 წლის სექტემბერში, სანამ სასწავლო პროცესი დაიწყებოდა. მეცვა კოალიცია “ქართული ოცნების” მაისური. დამინახა თუ არა სკოლის დირექტორის მოვალეობის შემსრულებელმა ჯილდა ცომაიამ ამ მაისურით, გახდა მომთხოვა, რაზეც უარი განვუცხადე იმ მოტივით, რომ სკოლაში იმ დროს იმყოფებოდა “ნაციონალური მოძრაობის” წითელი ფერის მაისურით ჩვენი სკოლის ერთ-ერთი მასწავლებლის შვილი, რომელიც საჯარო მოხელეა და არღვევდა კანონმდებლობას, ვინაიდან “საჯარო სამსახურის შესახებ” საქართველოს კანონის მიხედვით საჯარო სამსახურის ერთ-ერთი ძირითადი პრინციპია საჯარო სამსახურის უპარტიობა.
ეს ადამიანი მეორე სართულზე სამასწავლებლოში იჯდა და პედაგოგებთან საუბრობდა. ეს სკოლის დირექტორსაც ვუთხარი, მაგრამ ჩვენს საუბარში ჩაერია დედაჩემი, რომლის პატივისცემითაც გავიხადე მაისური. სწორედ ამ დღის მერე, როცა პირველად გამოვთქვი ჩემი აზრი, რომელიც არ ემთხვეოდა პედაგოგების აზრს, ამითვალწუნეს და ყველა ქმედებაში ჩანდა მათი არაკეთილგანწყობა ჩემდამი. 2013 წლის 15 თებერვალს სკოლაში ჩამოვაყალიბეთ “ახალგაზრდული ფრთა”, რომლის პრეზიდენტად ამირჩიეს კრებაზე. შემუშავდა წესდება, მაგრამ დირექტორის მოვალეობის შემსრულებელმა და მისმა მოადგილემ, ასევე მოვალეობის შემსრულებელმა ინგა ზასეშვილმა იმთავითვე აითვალწუნეს ჩვენი ორგანიზაცია და ყველა ხერხით გვიშლიდნენ ხელს ჩვენი უფლებების განხორციელებაში.
მათთვის წარმოუდგენელი და მიუღებელია ის, რომ მოსწავლეს აქვს თავისი აზრი, შეხედულება და ითხოვს უფლებების დაცვას. ისინი ცდილობენ მხოლოდ მორჩილი, მართული საზოგადოების წევრთა ჩამოყალიბებას.
_ რას გულისხმობ?
_ იმას, რომ როდესაც მე მივმართე დირექციას 2013 წლის 18 და 28 თებერვალს წერილებით და ვითხოვდი სკოლის გათბობის, ელექტროჩამრთველების, ჰიგიენის, მათ შორის სკოლის ტუალეტში უბრალო ტუალეტის ქაღალდების დაკიდების საკითხების მოგვარებას, სკოლის ეზოში ავტო-სატრანსპორტო საშუალების შემოსასვლელი ორფრთიანი ჭიშკრის შეკეთებას, ყველა მათგანი დაბლოკილი იქნა ან უხარისხოდ შესრულებული დირექტორის მოვალეობის შემსრულებლის ჯილდა ცომაიას მიერ. ზემოთაღნიშნულის გარდა სკოლის დირექცია ახდენდა კანონის უხეშ დარღვევებს. 2013 წლის 18 თებერვლიდან 28 თებერვლამდე მიმდინარეობდა საატესტატო გამოცდები, რაზედაც შექმნილი იყო საპრეტენზიო კომისია, რომელიც დაკომპლექტებული იყო მე-12 კლასისი 2 მოსწავლის მშობლით, რომელთა შვილებიც გამოცდებს აბარებდნენ და დირექტორი ჩვენი მითითებების მერე იძულებული იქნა შეეცვალა მის მიერ გამოცემული ბრძანებები. ამას დაემატა ისიც, რომ სკოლაში გაყალბებულად ჩატარდა პედაგოგიური საბჭოს არჩევნები და დღეისათვის პედსაბჭო სკოლაში არ არსებობს.
აღნიშნულ საკითხში გასარკვევად ჩვენ აბაშის რესურსცენტრის დირექტორს, სალომე თოფურიას გავესაუბრეთ.
სალომე თოფურია: “ყველაფერი, რაც მიმართვაში წერია, ბავშვის ფანტაზიის ნაყოფია, იმიტომ რომ ჩვენ სკოლიდან გამოვითხოვეთ ოფიციალური დოკუმენტაცია ყველა იმ საკითხზე, რაც მოსწავლეს აქვს დასმული. დირექტორი ნამდვილად ლეგიტიმურია, რადგან ის არის სამეურვეო საბჭოს მიერ არჩეული და უფლებამოსილება უწყდება მხოლოდ 2013 წლის ნოემბერში. ამის დამადასტურებელი მინისტრის ბრძანებაც არსებობს და არანაირი ეჭვის საფუძველი არ არსებობს. ასე რომ ეს საკითხი გამოირიცხა.
_ მაგრამ, თუ სამეურვეო საბჭოს თავმჯდომარე არ ჰყავს?
_ სამეურვეო საბჭოს არ ჰყავს თავმჯდომარე, მაგრამ წევრები ხომ ჰყავს და ყველა სხდომაზე ირჩევა სხდომის თავმჯდომარე. არსებობს ასეთი პრაქტიკაც, რომ სხდომაზე სამეურვეო საბჭოს წევრებიდან ირჩევენ თავმჯდომარეს, რომელიც ამბობს გადამწყვეტ სიტყვას და აწერს ხელს დოკუმენტაციას. ასე რომ სამეურვეო საბჭოც ლეგიტიმურია და უფლებამოსილება აქვს ივნისამდე.
_ მიმართვაში ნათქვამია, რომ საფრთხის ქვეშ დგება საატესტატო გამოცდების ლეგიტიმურობა.
_ რადგან დამტკიცდა, რომ დირექტორიც და სამეურვეო საბჭოც სკოლაში ლეგიტიმურია, აქედან გამომდინარე, საატესტატო გამოცდები არანაირი საფრთხის ქვეშ არ დგას. კიდევ ერთი საკითხია მიმართვაში დასმული _ პედაგოგიური საბჭოს ლეგიტიმაცია. მინდა გითხრათ, რომ სკოლას ჰყავს პედაგოგიური საბჭო და მისი თავმჯდომარე თინათინ შალიკაშვილი მიმართვის ავტორის დედაა. მაგრამ მოსწავლეს აქვს პრეტენზია იმასთან დაკავშირებით, რომ როგორც თვითონ ამბობს, არ მომხდარა წინა პედსაბჭოს მიერ ანგარიშის გადაბარება ახალი პედსაბჭოსადმი. ჩვენ გამოვითხოვეთ ოქმები, გავესაუბრეთ პედაგოგებს, მივიღეთ ახსნა-განმარტებები დირექტორისა და პედსაბჭოს თავმჯდომარის მიერ და ვნახეთ, რომ პროცედურები არ დარღვეულა და ახალი თავმჯდომარეც არჩევის წესით იქნა გამოვლენილი. ასე რომ თინათინ შალიკაშვილი არის არჩეული თავმჯდომარე. დირექტორს რომ ერთპიროვნულად დაენიშნა ვინმე, მაშინ შეიძლებოდა ყოფილიყო დავის საგანი, მაგრამ კიდევ ვიმეორებ, არჩევა მოხდა პედაგოგების მხრიდან, მათ ერთხმად მისცეს ხმა აღნიშნულ თავმჯდომარეს. მიმართვაში არის კიდევ სიფრთხილესა და ჰიგიენაზე გამახვილებული ყურადღება. მიდით ამაზეც ვთქვათ, რათა უფრო ნათელი იყოს ყველაფერი. ელექტროჩამრთველებზე მოსწავლე ითხოვდა ყუთების გაკეთებას, ალბათ გამომდინარე იქიდან, რომ უმცროსკლასელებმა ხელი არ მოკიდონ, მაგრამ ისინი ისეთ სიმაღლეზეა დამაგრებული, იქ დაბალკლასელი ვერ მიწვდება, თან ეს გაკეთებულია სტანდარტებით, ჩაიბარა სამხარაულის ექსპერტიზამ და არა მგონია დარღვევებით ყოფილიყო ჩაბარებული.
ასევე ჰიგიენის საკითხიც თითიდან გამოწოვილია, დირექტორმა გაითვალისწინა მოსწავლის მოთხოვნა და დაიდო საპირფარეშოში ტუალეტის ქაღალდი, მაგრამ მერე გაჩნდა ახალი პრეტენზია, რომ ეს ქაღალდი უნდა იყოს არა დადებული, არამედ ჩამოკიდული. ერთი მინდა აღვნიშნო, დირექტორი ნამდვილად ცდილობს დაარეგულიროს ეს სიტუაცია სკოლაში, მაგრამ ახლა უკვე თვითონ ამ “ახალგაზრდულ ფრთაშია” განხეთქილება. ჩემთან მოვიდნენ მოსწავლეები და მითხრეს, რომ ფრთის თავმჯდომარე არაფერს უთანხმებდა წევრებს, იღებდა ერთპიროვნულ გადაწყვეტილებებს და აქედან გამომდინარე მოსწავლეებმა მიიღეს გადაწყვეტილება ფრთა დაშლილიყო. მათ დირექტორსაც მიმართეს განცხადებით, მაგრამ ფრთის თავმჯდომარე წინააღმდეგია ამ გადაწყვეტილების და ამბობს, რომ ამ გადაწყვეტილებას ძალა არა აქვს, რადგან არ ყოფილა სხდომა მოწვეული. სკოლაში პრობლემებს თვითონ ქმნიან. ყველაზე დიდი პრობლემა, რაც ახლა დგას, ეს არის მეგობრებს შორის გაუცხოება და დაპირისპირება, რაც ძალიან ცუდია. დირექტორი თავისი მხრივ ცდილობს სიტუაციის დარეგულირებას, მეც ყოველთვის ვესაუბრები ლევანს, მაგრამ არ უნდა გაიგოს და სწორედ ამიტომ ვუთხარი მიემართა სასამართლოსთვის და ერთხელ და სამუდამოდ გაერკვია ლეგიტიმაციის საკითხები. ჩემი აზრით, არსებული დოკუმენტაციის მიხედვით, თუ არ ჩავთვლით იმას, რომ რარაც მცირე გადაცდომებია, ვთქვათ, საკანცელარიო და საქმის წარმოების კუთხით, მაგალითად შეიძლება ოქმი არ იყოს რაღაც შაბლონით მოცემული, ამას თუ არ ჩავთვლით, ყველაფერი ნორმის ფარგლებში ჯდება და ლევან ჩიქოვანის ბრალდებებს უფრო ფანტაზიის ნაყოფს ვუწოდებ ვიდრე ჭეშმაროტებას.
ჩვენ სკოლის დირექტორს, ჯილდა ცომაიასაც დავუკავშირდით და აღნიშნულ ბრალდებებთან დაკავშირებით მისი კომენტარი მოვისმინეთ.
ჯილდა ცომაია: “თავიდანვე მოგახსენებთ, რომ მე ვარ არჩეული დირექტორი. როგორც იცით, დირექტორების კონკურსი ჩატარდა 2007 წელს და სწორედ ამ კონკურსის მეორე ეტაპით მოსული დირექტორი ვარ და სამეურვეო საბჭომ, რომელმაც მე ამირჩია, მომცა ვიზირება განათლების და მეცნიერების სამინისტროსთან დავრეგისტრირებულიყავი როგორც სკოლის დირექტორი. აღნიშნული მოსწავლის მამა ამ სამეურვეო საბჭოს წევრი იყო. მე ნოემბრის თვეში მივედი სკოლაში დირექტორად და არსებობს სამეურვეო საბჭოს ოფიციალური ოქმი, რომლითაც მომცეს თანხმობა, რომ ვყოფილიყავი მეორე საჯარო სკოლის დირექტორი, ასევე ხელთ მაქვს მინისტრის ბრძანებაც. ამდენად ნამდვილად ვარ არჩეული დირექტორი და არც ჩემი ლეგიტიმაცია დგას ეჭვის ქვეშ. სკოლის ძირითადი მამოძრავებელი ხერხემალი არის სკოლის შინაგანაწესი, რომელიც ნამდვილად არსებობს ჩვენს სკოლაში.
კიდევ ერთი საკითხი, რომელზეც მიმართვაში მოსწავლე ყურადღებას ამახვილებს, არის საატესტაციო გამოცდების არალეგიტიმურად აღქმა. იმდენად, რამდენადაც მე ვარ დირექტორი და არა მოვალეობის შემსრულებელი, ჩვენს სკოლაში საგამოცდო პროცესი იქნება ლეგიტიმური, რადგან ყველა პროცედურა და განრიგი დაცულია, ჩემს მიერ გამოცემული ყველა ნორმატიული აქტი დაფიქსირებული და ლეგიტიმურია. რაც შეეხება პედაგოგიურ საბჭოს. ჩემს სკოლაში 28 პედაგოგია, პედსაბჭოს ყოფილ თავმჯდომარეს, ირა ბოკუჩავას გაუთავდა სამწლიანი ვადა და ახალი თავმჯდომარე, ამ მოსწავლის დედა, თინათინ შალიკაშვილი ერთხმად იქნა არჩეული თავმჯდომარის პოსტზე. ასე რომ არც აქ ყოფილა რაიმე დარღვევა და გადაცდომა. ჩემი, როგორც სკოლის დირექტორის მართვის პრინციპი არის გუნდური მართვის პრინციპი.
მე ლევანთანაც მქონდა ხშირად საუბარი იმაზე, რომ უშეცდომო მხოლოდ უფალია და როგორც ახალგაზრდული ფრთის პრეზიდენტი თუ რაიმე ხარვეზს დაინახავდა, ეთქვა, რათა ერთად დაგვეძლია პრობლემები. ბევრი რამ, რაც მოგვმართა გაკეთდა, მაგრამ ყველაფერს აქვს თავისი წესი და რაც არ უნდა იყოს, კანონით გაუთვალისწინებელ ქმედებებს ვერ დავუშვებდით. მე პირადად, ყველას ვთხოვ, მედიატორის როლი შეასრულონ და ერთხელ და სამუდამოდ დამთავრდეს ეს პრობლემა სკოლაში. მე პედაგოგი ვარ და მთელი პასუხისმგებლობით ვაცხადებ, რომ ამ ბავშვის საწინააღმდეგო არაფერი მაქვს, პირიქით, დიალოგზეც ვიწვევ და მინდა მოვაგვარო მასთან ურთიერთობა. ჩემთვის ყველას აზრი გასათვალისწინებელია და მითუმეტეს მოსწავლეების. კიდევ გეუბნებით, არანაირი მისი მოთხოვნა დაბლოკილი არ ყოფილა. ყველანაირად ვცდილობ ლევანთან საერთო ენის გამონახვას, მაგრამ ყველაფერს საზღვარი აქვს, რაღაც იწყება და სრულდება. მეც ვიმედოვნებ, რომ ლევანი დარწმუნდება ყველა დოკუმენტიციის გაცნობის შემდეგ ჩემს ლეგიტიმაციაში და იმაში, რომ სკოლა ნორმალურად ფუნქციონირებს.
