სხვა დანარჩენ შემთხვევაში მოწოდებული ინფორმაცია სრულყოფილია. საინტერესოა, რომ 2012 წლის 1 აგვისტოს, მთავრობის სარეზერვო ფონდიდან გადარიცხული თანხით შიდა ქართლის გუბერნატორის ადმინისტრაციამ 100 000 ლარად შეიძინა ავტომანქანა ტოიოტა ლენდ კრუზერ პრადო (2012).
ამ პერიოდში შიდა ქართლის გუბერნატორის თანამდებობა ეკავა სულხან სიბაშვილს, რომელმაც ამ თანამდებობაზე 2012 წლის 10 ივლისს გიორგი ტატიშვილი შეცვალა. მანამდე სულხან სიბაშვილი პრეზიდენტის ადმინისტრაციის უფროსის მოადგილე იყო. აქვე უნდა აღინიშნოს, რომ 2011 წელს IDFI-ის მიერ მიღებული ინფორმაციით, შიდა ქართლის გუბერნატორის ადმინისტრაციის ბალანსზე უკვე ირიცხებოდა 10 სატრანსპორტო ერთეული, აქედან 1 პერსონალური სარგებლობისთვის, 4 სამსახურეობრივი მიმოსვლისთვის და 5 ოპერატიული და სპეცდანიშნულების. საინტერესოა, რა აუცილებლობას წარმოადგენდა სრულიად ახალი, 100 000 ლარის ღირებულების ავტომანქანის შეძენა.
როგორც 2012 წლის მანძილზე გაცემული პრემიების შესახებ მიღებული ინფორმაციიდან ირკვევა, შიდა ქართლის გუბერნატორმა გიორგი ტატიშვილმა 2012 წლის იანვრიდან ივლისის ჩათვლით პრემიის სახით სულ მიიღო 16 150 ლარი. საინტერესოა, რომ პრეზიდენტის ადმინისტრაციის მიერ 2012 წლის 10 ივლისს გაკეთებული განცხადების მიხედვით, გიორგი ტატიშვილი გუბერნატორის თანამდებობაზე სულხან სიბაშვილმა შეცვალა.
გამოდის, რომ გიორგი ტატიშვილი მხოლოდ 10 ივლისამდე ასრულებდა გუბერნატორის მოვალეობას, თუმცა ივლისის თვეში 2625 ლარის პრემია მაინც დაერიცხა. თავად სულხან სიბაშვილს ივლისსა და აგვისტოში პრემია არ აუღია, თუმცა სექტემბრიდან დეკემბრის ჩათვლით ყოველთვე იღებდა ერთი ხელფასის ოდენობის პრემიებს, რამაც ჯამში 10 125 ლარი შეადგინა. რაც შეეხება 2013 წლის მონაცემებს, შიდა ქართლის გუბერნატორის თანამდებობაზე 2013 წლის 12 იანვარს დანიშნულმა ანდრო ბარნოვმა იანვარშივე აიღო 2000 ლარი პრემიის სახით.
ასევე საინტერესოა 2012 წლის 20 ოქტომბრიდან განთავისუფლებული თანამშრომლების შესახებ მიღებული ინფორმაცია. სულ 2013 წლის 18 თებერვლის მდგომარეობით შიდა ქართლის გუბერნატორის ადმინისტრაციიდან განთავისუფლდა 9 ადამიანი, აქედან 7 გუბერნატორის თანამდებობაზე ანდრო ბარნოვის დანიშვნიდან მცირე ხანში:
სოფლის მეურნეობის განვითარების სამსახურის უფროსი; საგანგებო სიტუაციების მართვის სამსახურის უფროსი; ზედამხედველობის სამსახურის უფროსი; რეგიონალური განვითარების სამსახურის მთავარი სპეციალისტი; საფინანსო-სამეურნეო სამსახურის მთავარი სპეციალისტი; საგანგებო სიტუაციების მართვის სამსახურის უფროსი სპეციალისტი; ადმინისტრაციული სამსახურის სპეციალისტი.
ამასთან, საგანგებო სიტუაციების მართვის სამსახურის უფროსი სპეციალისტი განთავისუფლდა იმ მიზეზით, რომ 2013 წლის 31 იანვრიდან 2013 წლის 5 თებერვლამდე არ გამოჩენილა სამსახურში და არასაპატიო მიზეზით გააცდინა 22, 25 და 28 იანვარი. მისი განთავისუფლების თარიღად ჩაითვლა 2013 წლის 1 თებერვალი. ყველა დანარჩენი განთავისუფლდა პირადი განცხადების საფუძველზე.
