გავრცელებული ინფორმაციით, რესტორანში, სადაც “ნაციონალური მოძრაობის” წევრები ქეიფობდნენ, სიტყვიერი დაპირისპირება ჩხუბში გადაიზარდა. ფიზიკური დაზიანებები აქვთ მიღებული პარლამენტარებს _ გიორგი ვაშაძეს და დავით საყვარელიძეს. სოციალურ ქსელებში გავრცელებული ინფორმაციის თანახმად, სამეგრელო-ზემო სვანეთის ყოფილ გუბერნატორს, ზაზა გოროზიას ხელი აქვს მოტეხილი, ვაშაძეს თავი გაუტეხეს, საყვარელიძეს კი ცხვირი.
სააგენტო taimer.ge-ს ინფორმაციით, რესტორანში 30-მდე ადამიანი შეიჭრა და “ნაციონალური მოძრაობის” წევრებთან სიტყვიერ შელაპარაკებას ფიზიკური დაპირისპირება მოჰყვა.
_ “ესენი აქ ხშირად იკრიბებიან, როგორც ჩანს, ვიღაცებმა ეს შეამჩნიეს და ამ საღამოს, დაგეგმეს და სცემეს. რესტორანში ყველაფერი დალეწილია, ჭურჭელს ისროდნენ გოროზიას ხელი მოტყდა. დანარჩენებიც – საყვარელიძე, ვაშაძე, დაზიანებებით სასწრაფო დახმარების ბრიგადებმა გადაიყვანეს. ვაშაძეს თავზე რამდენიმე ნაკერი ადევს, ხოლო საყვარელიძეს ცხვირი გაუტყდა”, _ აღნიშნავს სააგენტოსთან საუბრისას ერთ-ერთი თვითმხილველი.
სააგენტო “ნიუპოსტი” თვითმხილველზე დაყრდნობით წერს, რომ წინა ხელისუფლების წარმომადგენელთა სადილი დაახლოებით ერთი საათის დაწყებული იყო, როცა რესტორანში მამუკა ბაკურია, მისი მეუღლე და ვინმე მაზიაშვილი გამოჩნდნენ (მამუკა ბაკურია ცოტნე ბაკურიას ძმა და თინათინ ხიდაშელის მამიდაშვილია). მათ მაგიდა მეორე სართულზე შეუკვეთეს. მას შემდეგ კი, რაც მიხეილ სააკაშვილმა და ვანო მერაბიშვილმა რესტორანი დატოვეს, სამი პირიდან ორი მამაკაცი: ბაკურია და მაზიაშვილი ხმამაღალ რეპლიკებზე გადავიდნენ:
“ვაკე ჩვენია, ვაკეში ბოზების ქეიფის დრო დამთავრდა!”; “მკვლელები ამ რესტორანში ვერ იქეიფებენ, დაახვიონ აქედან!” – ამ ხმამაღალი რეპლიკების შემდეგ სამივე პირმა პირველ სართულზე გადმოინაცვლა. ბაკურია და მაზიაშვილი აგრესიულად იქცეოდნენ და პიროვნულ მიმართვებზე გადავიდნენ. აქტიურობდა ბაკურიას მეუღლეც, რომელიც იქ მყოფებს უცენზურო სიტყვებით მიმართავდა. სიტუაცია მწვავდებოდა და ერთ-ერთი მაგიდიდან ზაზა გოროზია წამოდგა, ერთ-ერთს ხელი გადახვია მხარზე და რაღაცას ელაპარაკებოდა. ამ დროს ბაკურიას მეუღლემ ყვირილი დაიწყო, ხელი გამარტყესო, თუმცა, დანამდვილებით შემიძლია ვთქვა, რომ ხელი არავის დაუკარებია. ამის თქმა იყო და, მისმა მეუღლემ იყვირა, ჩემს ცოლს ხელი როგორ დაარტყით, თქვე ახვრებო, თქვენი დედაცო! და ზაზა გოროზიას, რომელიც ელაპარაკებოდა, მოულოდნელად მაგიდიდან აღებული ბოთლი ჩაარტყა მარჯვენა მხარში. გოროზიაზე შეტევა მაზიაშვილმაც მიიტანა და მანაც მარჯვენა მკლავში ჩაარტყა. მოგვიანებით იქვე მყოფ ნიკა მელიასაც დაარტყეს. ამის შემდეგ ყველაფერი აირია, თუმცა, დავინახე, რომ ბაკურიას მეუღლე სუფრიდან აღებულ დანას იქნევდა და საყვარელიძეს დაარტყა კიდეც მკლავში.
მაზიაშვილმა სუფრიდან აღებული ჭიქა საყვარელიძეს პირდაპირ სახეში ჩაარტყა, ხოლო ბაკურიამ ამასობაში მეორე სართულზე, თავიანთ სუფრასთან აირბინა და იქედან ქვემოთ მყოფი დეპუტატების თავზე საფერფლეები, თეფშები და ვაზები დაუშვა. ერთი ვაზა ვაშაძეს მოხვდა თავში და ჩაიკეცა. ყველაზე საკვირველი ის იყო, რომ დეპუტატები და მათი თანმხლები პირები აშკარა უმრავლესობაში იყვნენ, მაგრამ თავდამსხმელებს ფიზიკურად კი არ უსწორდებოდნენ, უბრალოდ, თავის არიდებასა და გაშველებას ცდილობდნენ” _ წერს სააგენტო.
“გურია ნიუსის” ინფორმაციით, აღნიშნულ ფაქტზე გამოძიება უკვე დაწყებულია. თუმცა, შინაგან საქმეთა სამინისტროს ოფიციალური განცხადება ამ დრომდე არ გაუვრცელებია. ოფიციალურ კომენტარებს ჯერ არც “ნაციონალურ მოძრაობაში” აკეთებენ.
პარლამენტის წევრები კი ამ ინციდენს სოციალური ქსელით აფასებენ.
_ კატეგორიულად ვგმობ ნებისმიერ ძალადობას. რაც არ უნდა გეზიზღებოდეთ თქვენი ოპონენტები, ფიზიკური ძალადობა მათზე დაუშვებელია. პარლამენტის წევრების წინააღმდეგ ძალადობის გამოვლენა კი, პირდაპირ ახალი ხელისუფლების რეპუტაციის წინააღმდეგაა მიმართული _ ვინც ამას ვერ ხვდება, ბატონო ჩხუბისთავებო! თუ დადასტურდება, რომ მართლაც ყოფილმა პოლიტპატიმრებმა წამოიწყეს ჩხუბი, გთხოვთ ჩვენს მომხრეებად თავს ნუღარ წარმოგვიდგენთ. დღევანდელი ცემა-ტყეპის ინიციატორებმა, ვინც არ უნდა იყვნენ ისინი, ჩაიდინეს სისხლის სამართლის დანაშაული და მე მოვითხოვ მათ დასჯას კანონის სრული სიმკაცრით, _ აღნიშნავს დეპუტატი ზვიად კვაჭანტირაძე.
საპარლამენტო უმცირესობის წევრი, გიორგი კანდელაკი მიიჩნევს, რომ ხელისუფლება ოპოზიციაზე ძალადობს და დამნაშავეებს ხელს აფარებს.
_ როცა უკვე ძნელია უარყოფა იმისა, რომ იმის მაგივრად, უმუშევრები საქმდებოდნენ დასაქმებულები კარგავენ სამსახურს; როცა საერთაშორისო პრესაც საუბრობს ინვესტორთა ნდობის ვარდნაზე; როცა ბანკების შაბათ-კვირას მუშაობის მიუხედავად პირველი კვარტლის ბიუჯეტი 83 მილიონით გერღვევა; როცა ტენდერს არ აცხადებ 400 მილიონი ლარის სამუშაოზე (ფულის გადასანახად) და ამის გამო დე-ფაქტო 20 ათას ადამიანამდე კარგავს სამსახურს; როცა შენი მხარდამჭერებიც აღარ უარყოფენ ნეპოტიზმის ტალღას, რომელმაც წალეკა სახელმწიფო აპარატი; როცა ელიტური კორუფცია მითიდან რეალობად იქცევა; როცა ნაწილ-ნაწილ, მტერს აბარებ ქვეყნის სუვერენიტეტს; როცა საკუთარი ქვეყნის ტერორიზმში დადანაშაულების ზიანი შენს მხარდამჭერებისთვისაც კი უკვე უცნაურად გამოიყურება; როცა ქვეყანა რეცესიის ზღვარზე დგას; როცა ამბობ, რომ ოპოზიციას არსებობის უფლება არ აქვს და სასურველ ოპოზიციად ღიად აცხადებ ღია პუტინისტებს ოპოზიციაზე პირდაპირი ძალადობა და მოძალადეებზე ხელის დაფარება აუცილებელია. გილოცავთ გიორგი მარგველაშვილის საარჩევნო კამპანიის დაწყებას! _ წერს ფეისბუქში გიორგი კანდელაკი.
საპარლამენტო უმრავლესობის წევრი, დეპუტატი ოთარ ჩრდილელი კი მომხდარს ერთი წინადადებით ეხმაურება:
_ “ქალმა როგორ გცემათ, ტოო?.. არაქურდული ხელი მოგხვდათ, ბუჯო?! _ ისმოდა გუშინ, ერთ კაფესთან…” _ წერს ჩრდილელი.
