1997-2000 წლებში, სამკერვალო ფაბრიკის “იმერეთის” რიგით დიზაინერს ბევრი არ იცნობდა. პოპულარობა მას შემდეგ მოვიდა, რაც მეოცე საუკუნის ბოლოს, მოდის სახლი _ “ავთანდილი” დააარსა.
ალბათ მიხვდით _ საუბარია ოზურგეთელებისთვის ავთო, ხოლო სხვებისთვის ავთანდილ ცქვიტინიძეზე.
მას იცნობენ, უყვართ და პატივს სცემენ, მის მიერ შექმნილი სამოსი ბევრ ცნობილ ადამიანს აცვია არამარტო საქართველოში _ კიევის, მილანის, პარიზის და სხვა მოდის კვირეულის მასპინძელი ქალაქების პოდიუმი ჩვენებურ დიზაინერს კარგა ხანია დაპყრობილი აქვს; “ავთანდილის” მაღაზიები გაიხსნა მილანსა და კიევში. შესაძლებელია, დიზაინერის “ბუტიკი” მალე მოდის დედაქალაქში _ პარიზშიც გაიხსნას.
_ ავთო პირველი კლასიდანვე ხატვით იყო გატაცებული. დაწყებითი კლასის მასწავლებელმა როზა არობელიძემ თავიდანვე შეამჩნია ავთოს ეს ნიჭი და მასთან ინდივიდუალურად მუშაობდა. სკოლაში ხატავდა მერხზე, რვეულის ფურცლებზე, მათ შორის, კლასელების რვეულებშიც. ხატავდა ულამაზეს გოგონებს, რომლებსაც იმისგან განსხვავებული ტანსაცმელი ეცვათ, ჩვენ რეალობაში რომ ვხედავდით. გამოირჩეოდა გულისხმიერებით, იყო ნამდვილი ერთგული მეგობარი. ვერც ვიხსენებ, ვინმესთან კონფლიქტი ჰქონოდა. სულ რაღაცაზე ფიქრობდა და მიხვდებოდი, რომ გონებაშიც ხატავდა. ასურათებდა ნაწარმოებების პერსონაჟებს და სასკოლო გაზეთებს. კარგად მახსოვს მისი პირველი ნაბიჯები _ როცა ავთომ ცარიელი ხელებით დაიწყო მოღვაწეობა. ის ყოველთვის ამბობდა, პოპულარული გავხდებიო, რაც ძალიან მიკვირდა _ მაშინ ისეთი დრო იყო, მომავალზე ფიქრი იოლი არ გახლდათ, _ ბავშვობის წლებს იხსენებს ჩვენთან საუბრისას, ავთოს თანაკლასელი ნანიკო ნაცვალაძე.
ავთო ცქვიტინიძემ ოზურგეთის რაიონის მეორე საჯარო სკოლა დაამთავრა. თანაკლასელების თქმით, დიზაინერს პოპულარობა თავში არ ავარდნია.
_ ავთოს პოპულარობის შემდეგ, სადაც კი ვნახე ან მის სამეგობრო წრეში მოვხვდი, ის ყოველთვის ახსენებდა ოზურგეთს, აქაურ მეგობრებს; აქაურ ამბებს დეტალურად გამომკითხავდა ხოლმე. ავთომ თავისი შრომისმოყვარეობით და მიზანსწრაფულობით მიაღწია ყველაფერს, _ აღნიშნა ნაცვალაძემ.
ცქვიტინიძის სტუდენტობის მეგობარი, ოზურგეთელი ნატო ხომერიკი, ნაცვალაძეს ეთანხმება და ამბობს, რომ ავთანდილმა ყველა მეგობართან თბილი ურთიერთობა მას შემდეგაც შეინარჩუნა, რას პოპულარული გახდა:
_ ავთო კეთილი და თბილი ადამიანი, თავისი საქმის პროფესიონალია. ჩვენ ერთად გადავიტანეთ ცუდი და კარგი პერიოდი. ერთმანეთს ხშირად სიყვარულით მოვიკითხავთ, _ გვითხრა ხომერიკმა.
ავთო ცქვიტინიძე ოზურგეთში 8 წელია, არ ყოფილა. დიდი ხნის პაუზის შემდეგ მშობლიურ ქალაქში ჩამოსულ დიზაინერთან “გურია ნიუსმა” ექსკლუზიური ინტერვიუ ჩაწერა:
_ თითქმის 8 წელია ოზურგეთში არ ვყოფილვარ, დღეს ჩამოვედი (საუბარი ჩაწერილია 18 აპრილს) და ძალიან ბედნიერი ვარ. ის ადგილები მოვინახულე, სადაც გავიზარდე, დავამთავრე საშუალო სკოლა…
_ პრეტენზიული ბავშვი იყავით?
_ არა. ძალიან კარგი და უწყინარი ბავშვი გახლდით.
_ ახლა თუ ხართ პრენტეზიული?
_ (იცინის), ვარ. თუმცა, ეს პრენტეზიულიობა მხოლოდ ჩემს საქმიანობას ეხება.
_ სკოლის პერიოდს როგორ გაიხსენებდით?
_ კარგი მოსწავლე ვიყავი. მართალია, მქონდა ამორჩეული საგნები, რომლებსაც განსაკუთრებულად ვსწავლობდი, მაგრამ ვცდილობდი, ყველა საგანს ერთნაირად დავუფლებოდი. სულ სამი ოთხიანი მყავდა, დანარჩენი _ ხუთიანები.
_ რამდენიმე წლის წინ, ადგილობრივი ტელევიზიის ეთერში განაცხადეთ, რომ, ოზურგეთში, თეატრალური მოედნის მიმდებარე ტერიტორიაზე თქვენი საფირმო ადგილი იქნებოდა. ის ადგილი მოინახულეთ?
_ არა, არც გამხსენებია.
_ რატომ გადაწყვიტეთ დიზაინერი გამხდარიყავით? მაშინ ხომ ისეთი პერიოდი იყო, რომ მოდისთვის ყველაზე ნაკლებად ეცალათ ქართველებს?
_ ნაკლებად რომ ეცალათ, ამიტომაც მივიღე ეს გადაწყვეტილება და გავხდი დიზაინერი. ისე, პროფესიით ფერმწერი ვარ და არა დიზაინერი.
_ მშობლიურ ქალაქში 8 წლის შემდეგ ჩამოხვედით. რა დაგხვდათ შეცვლილი?
_ შენობები დამხვდა გადაღებილი. მეორე სკოლაც სხვა ფერისაა, _ ადრე ყვითელი ფერის იყო, ახლა ვარდისფერია. ძირითადად, სკოლაში ვიყავი და სხვაგან არ წავსულვარ. ამიტომ, რა შეიცვალა, არ ვიცი. მნიშვნელოვნად, მგონი, არაფერი შეცვლილა. ისეთი დატვირთული გრაფიკი მაქვს, ვერ ვახერხებ თავისუფალი დროის გამონახვას _ ძლივს ვნახე ერთი თავისუფალი დღე, რომ “პროფილისთვის” ჩამოვსულიყავი ოზურგეთში (გადაცემა “პროფილი” ოზურგეთელი დიზაინერის შესახებ ვრცელ გადაცემას აკეთებს). ხვალ პარიზში მივფრინავ, შემდეგ კიდევ სხვა ქალაქებში.
_ როგორია ოზურგეთის მოდის ფერები?
_ ასე ვერაფერს გეტყვით. გურულები ყოველთვის პრეტენზიულები იყვნენ ჩაცმაში და იმედი მაქვს, ახლაც კარგად იცვამენ.
_ და ბოლოს?
_ პირველ რიგში წარმატებას გისურვებთ თქვენ, გაზეთ “გურია ნიუსს” და ყველა გურულს. ძალიან მიყვარხართ!
