,,პრემიერმა გასაგებად თქვა, რომ მანამდე დიდი დროა და თუ რაიმე მოხდა ისეთი და იქნება გარღვევა ურთიერთობებში, არაფერი არ არის გამორიცხული. თუმცა, მან ასევე თქვა, რომ ამჟამად ამის საჭიროებას ვერ ხედავს. ეს ჩვენი ხელისუფლების სტილია, როდესაც არ ხარ აგრესიული, მაგრამ ხარ პრინციპული და სრულიად გასაგებ გზავნილებს აკეთებ. ეს იმის დადასტურებაა, რაც უკვე შვიდი თვეა, ხდება ჩვენს ქვეყანაში. ასე რომ, უნდა მივეჩვიოთ ასეთ რიტორიკას. ხელისუფლების ცვლილებასთან ერთად შეიცვალა საუბრის სტილი, რიტორიკა და ტონალობა. ოპონენტებს სხვა სალაპარაკო არაფერი აქვთ, მათ უზრუნველყვეს საქართველოს ოკუპაციის გაფორმება, ამიტომ მათგან დეოკუპაციის პროცესის გართულებაზე საუბარი არასერიოზული მგონია. არასერიოზული მგონია ჩემგან ამ კომენტარის გაკეთებაც, რადგან 7 თვეა, ჩვენ ერთსა და იმავე რეჟიმში ვართ. ისინი რაღაცას ამბობენ, მერე თქვენ მოდიხართ და ითხოვთ ამაზე კომენტარს, ჩვენც მორჩილად ვაკეთებთ ამაზე კომენტარს, ოღონდ რატომ, ჩვენ თვითონაც არ ვიცით. გავიგეთ, რომ “ნაციონალური მოძრაობა“ ცუდ სიზმრებს ხედავს, მათ ყველაზე ცუდი სიზმარი პირველი ოქტომბრის ღამეს ნახეს. ასე რომ, ამაზე ცუდ სიზმარს ვეღარ ნახავენ და შეუძლიათ, მშვიდად იყვნენ, ქვეყანაში ყველაფერი წესრიგში იქნება“, _ განაცხადა ხიდაშელმა
თინა ხიდაშელი პრემიერის შეფასებასაც გამოეხმაურა, ,,ნაციონალურ მოძრაობასა“ და მის პოლიტიკურ რეალობაზე.
“პრემიერ-მინისტრმა „ნაციონალურ მოძრაობაზე“ ის თქვა, რაც პირველ ოქტომბერს ხალხმა უკვე თქვა. ის აღარ არის საინტერესო პოლიტიკური ძალა. მათი ბედი გადაწყვეტილია, ეს ყველაფერი კიდევ უფრო კარგად ჩანს პარლამენტში, ყველაზე მნიშვნელოვან კენჭისყრებზეც კი მათ ტაბლოზე 26 ხმა აქვთ, 26 მუდმივი და გარანტირებული ხმა, ეს 26 კაცი, ალბათ, ერთად დარჩება და დანარჩენი უკვე მათი საწუხარია.
გიგა ბოკერიას უყვარდა ამის თქმა და დავესესხები, როდესაც ჩვენ ქუჩის ოპოზიციას გვეძახდა, ამბობდა, რომ წმინდა ადგილი ცარიელი არ დარჩება. მეც მჯერა, რომ წმინდა ადგილი ცარიელი არ დარჩება და ჩვენ გვეყოლება ისეთი ოპოზიცია, რომელიც რეალურ ოპონირებას გაგვიწევს. რომელიც, ალბათ, მომდევნო არჩევნებსაც მოიგებს თუ ქართველი ხალხი ჩათვლის, რომ ჩვენ რაღაც სწორად არ გავაკეთეთ“.
ხიდაშელის კრიტიკა მხოლოდ ,,ნაციონალური მოძრაობას“ არ დაუმსახურებია. მან პრემიერთან პრესკონფერენციაზე, ჟურნალისტების მიერ დასმული შეკითხვებიც შეაფასა და აღნიშნამ რომ ბევრი ისეთი შეკითხვა იყომ რაც საერთოდ არ უნდა დასმულიყო.
,,ჩემი აზრით, ჟურნალისტებმა ისეთი შეკითხვებიც დასვეს, რომლებიც საერთოდ არ უნდა დასმულიყო. არავის არ ვაძლევ მითითებებს, უბრალოდ, ეს ჟურნალისტების პრობლემაა. იყო, რა თქმა უნდა, ძალიან სერიოზული გზავნილებიც. ყველაზე მთავარი ის არის, რომ ეს ხდება მუდმივად და ყველა ჟურნალისტს ეძლევა კითხვის დასმის საშუალება. თქვენ მე ვერ გამახსენებთ ცხრა წლის განმავლობაში ვერც ერთ ასეთ შემთხვევას, როდესაც დარბაზში ამდენი ჟურნალისტი ზის და პრემიერის პრესსამსახურის დაჟინებულ მოთხოვნაზე, რომ დავამთავროთ პრესკონფერენცია, პრემიერი ამბობს, რომ არა, შეკითხვა დასვას ყველამ, ვინც ფეხზე დგას. ეს არის მთავარი და ყველაზე ღირებული ახალი ამბავი ქვეყანაში. რადგან, თუ მთავრობა გახსნილია, ღიაა კრიტიკისთვის და მზადაა, მწვავე პასუხებს სრულყოფილად უპასუხოს, ეს იმას ნიშნავს, რომ ამ მთავრობაში ყველაფერი კარგად იქნება“, _ ასე შეაფასა თინა ხიდაშელმა ბიძინა ივანიშვილის უკვე ტრადიციად ქცეული პრესკონფერენცია, სადაც უამრავი მედიასაშუალების წარმომადგენელს მიეცა საშუალება, პრემიერისთვის შეკითხვა დაესვა.
