უკვე სახელისუფლო წრეებიც ადასტურებენ, რომ ქალაქის ცენტრში პირდაპირი გაგებითაც “პირში წყალჩაგუბებული”, პოლიციაზე “გაკუჭებული გურული” ბრუნდება.
თავის დროზე, ძეგლის აღების ინფორმაცია “გურია ნიუსს” ექსკლუზიურად მოაწოდეს. შეგახსენებთ, რომ ძეგლი 2011 წლის 16 ნოემბერს, გვიან ღამით აიღეს. იმის გამო, რომ სამუშაოთა შესრულებაზე ადგილობრივებმა უარი თქვეს, სპეცტექნიკა ფოთიდან ჩამოიყვანეს. ჩვენს გამოჩენას გვიან ღამით იქვე მდგომი ადგილობრივი ხელისუფლების წარმომადგენლებიდან რეპლიკა მოჰყვა. მაშინ ვიფიქრეთ, რომ ექსკლუზიურ მასალას ვიღებდით და უბრალოდ, ხელისუფლებას არ სურდა ეს სკანდალი აგორებულიყო. ექსკლუზივი მართლაც გამოგვივიდა, რადგან ძეგლის აღების ფოტოების ფოტო და ვიდეომასალის გადაღება მხოლოდ ჩვენ მოვახერხეთ, თუმცა, როგორც დღეს ირკვევა, ეს “ნაცხელისუფლების” საპიარო გათვლა იყო სხვა სკანდალის გადასაფარავად, ჩვენ ექსკლუზივის პატივი კი იმიტომ დაგვდეს, რომ თემაც, რომლის გადაფარვაც მოინდომეს, “გურია ნიუსის” მიერ იყო წამოწეული და ამით ჩვენი ყურადღების ამ თემაზე გადატანა მოინდომეს.
თუმცა ჩვენ სკანდალი სრულად გვქონდა გახმაურებული და საკმაოდ დიდი “ბომბიც ავუფეთქეთ” ნაცმმართველებს _ “აჯანყებული გურულის” აღებამდე სამიოდე დღით ადრე, 2011 წლის 12 ნოემბერს, ლანჩხუთში იზეიმეს საფეხბურთო კლუბ “გურიას” ისტორიაში ყველაზე დიდი ტრიუმფიდან 25-ე წლისთავი და დაარსებიდან 85 წლის იუბილე. ლანჩხუთელ ნაცხელისუფლებას ვერავინ დაუკარგავს კლუბის მხარდაჭერას და ღონისძიებაც გასაკვირი სულაც არ ყოფილა, არც ბანკეტი გაკვირვებია ვინმეს. თუმცა, მაშინ მოხდა ის, რაც ნაციონალებმა წინასწარ ვერ გათვალეს _ სწორედ საბანკეტო სუფრაზე შეაგროვეს “გურიის” სახელოვანმა ვეტერანებმა (მათ შორის თემურ ჩხაიძემ, დავით უგრელიძემ, მერაბ თევზაძემ, გია გილიგაშვილმა და სხვებმა) ბიძინა ივანიშვილისთვის მოქალაქეობის დაბრუნების მხარდამჭერი ხელმოწერები.
“ნაციონალების” დაფინანსებულ სუფრაზე ივანიშვილის მხარდამჭერი ხელმოწერები რომ შეგროვდა, ამან “ნაცხელისუფლებაში” დიდი აფორიაქება გამოიწვია. ღიად არავის დაუფიქსირებია, მაგრამ აშკარა იყო, “ზემოდან” ადგილობრივებზე ზეწოლა დაიწყო.
საფეხბურთო ლანჩხუთში ეს სკანდალი მმართველი გუნდის წისქვილზე არ დაასხამდა წყალს და სწორედ ამიტომ მოუფიქრებიათ თემის გადასაფარავად გურულის ძეგლის აღება.
სხვათა შორის, ძეგლების აღება “ნაცსაქართველოში” უცხო ნამდვილად არ იყო და რაც პოლიციის შუშებიანი შენობის აგება გადაწყვიტეს, გვერდით მდგომი “აჯანყებული კაცის” აღებაზე თავიდანვე იყო საუბარი, მაგრამ ამას ისეთი გამოხმაურება მოჰყვა ადგილობრივებისგან (ჩვენც ვწერდით შს მინისტრისადმი გურულების თხოვნის შესახებ), კულუარებიდან გამოჟონა ინფორმაცია, რომ ვანო მერაბიშვილმა უარი თქვა მის აღებაზე _ წინასაარჩევნოდ ლანჩხუთელების განაწყენება არ ისურვა.
თუმცა, გადაფიქრებული საქმის გაკეთება მაინც მოუხდათ _ პრინციპში, “ნაცსუფრის სკანდალი” კი გადაფარა გურულის ძეგლის აღებით გამოწვეულმა აღშფოთებამ, თუმცა, “ნაციონალებმა” რეალურად “კატა გამოთხარეს” _ სწორედ ზემოხსნებულ ხელმოწერებზე მხარდაჭერის გამო თემურ ჩხაიძე ერთ-ერთმა თბილისურმა კლუბმა (რა თქმა უნდა, მაშინდელი ხელისუფლების ზეწოლით) მწვრთნელობიდან დაითხოვა. ამის შემდეგ ჩხაიძე პოლიტიკაში ჩაერთო და სწორედ მან მოუგო “ნაციონალების” კანდიდატს არჩევნები.
ამ ამბიდან რამდენიმე დღეში ერთი მეორეს მიყოლებით კიდევ რამდენიმე ინციდენტი მიჰყვა ერთმანეთს _ ჯერ იყო და პოლიციის შენობის გახსნის შემდეგ ბანკეტზე, ვანო მერაბიშვილი წასული რომ დაიგულეს, მაღალჩინოსანმა პოლიციელმა ქვეშევრდომი დარბაზში ჰალსტუხით ათრია; იმავე ღამეს ორმა სამართალდამცველმა ერთმანეთი უმოწყალოდ სცემა; მეორე დღეს, ახალი შენობიდან ათიოდ მეტრში მაღაზია გატეხეს; ხოლო ყველაფრის დაგვირგვინება ნაახალწლევს პოლიცმაისტერის მიერ ერთ-ერთ ოჯახში პისტოლეტიდან გასროლა გახდა.
რაც შეეხება “აჯანყებული გურულის” ძეგლს, მისი აღების მეორე დღეს “გურია ნიუსმა” აღმოაჩინა, რომ “აჯანყებული გურული” აგრარული ბაზრის მიმდებარე ტერიტორიაზე, ფაქტობრივად, ნაგავსაყრელზე დააგდეს. მოგვიანებით, დაგდებული ძეგლი ალუმინის ფირფიტებით შემოღობეს. გარედან მხოლოდ ლურჯი ფერის “ბრეზენტით” დაფარული ძეგლის ხელი ჩანდა.
როგორც მაშინ ითქვა, “გურულის ძეგლი” რკინიგზის სადგურთან უნდა დაედგათ. თუმცა, როგორც გითხარით, წელიწადნახევრიანი პაუზის შემდეგ “აჯანყებული გურული” თავის ადგილზე ბრუნდება.
ლანჩხუთის ექს-გამგებელი და ახლა “ნაციონალების” ადგილობრივი ბოსი კახა ასკურავა აცხადებს, რომ “გურულის ძეგლის” არც აღების მომხრე იყო და ახლა არც მისი დაბრუნების წინააღმდეგია: “მაშინ ჩემთვის არავის არაფერი უკითხავს. ეს ძეგლი სიმბოლოა და მისი აღების მომხრე არ ვიყავი ნამდვილად. როცა გამგებლის მოვალეობას ვასრულებდი, კოალიციის წარმომადგენლებთან გვქონდა მოლაპარაკება, რომ ძეგლი დაგვებრუნებინა, მაგრამ სადღაც 30 ათას ლარამდე ჯდებოდა და ამის გამო თავი შევიკავეთ,” _ ამბობს ასკურავა.
არსებული ინფორმაციით, ძეგლის უკან დაბრუნებას საქველმოქმედო ორგანიზაცია “ატუ” განახორცილებს, რომელიც ამავდროულად “გურიის” ცენტრალურ სტადიონზე სამუშაოებს ჩაატარებს, რათა არენა მზადყოფნაში შეხვდეს უმაღლეს ლიგას.
