_ წელს მისი დაბადებიდან 120 წლისთავი აღინიშნა.
კონსტანტინეობას ზეიმობდნენ დღეს მის მშობლიურ სოფელ ძველ აბაშაში. ღონისძიებას ესწრებოდნენ როგორც ადგილობრივი მოსახლეობა, ასევე სხვა ქალაქებიდან ჩამოსული სტუმრები. “კონსტანტინეობაზე” იყვნენ კულტურისა და ძეგლთა დაცვის მინისტრის მოადგილე ბადრი ბაგრატიონ-მუხრანსკი და მინისტრის მრჩეველი გიორგი გეგეჭკორი.
“გურია ნიუსი” სტუმრებს გაესაუბრა და ამ დღესთან დაკავშირებით შთაბეჭდილებების გაზიარება სთხოვა.
გიორგი გეგეჭკორი: “პირველ რიგში, მინდა ყველას მივულოცო კონსტანტინეობა. დიდი კონსტანტინე ეამაყება არა მარტო აბაშელებს, არამედ მთელ საქართველოს. ძალიან ღრმა ქართველი, ჭეშმარიტი ევროპელი იყო. მის ნაწარმოებებს მსოფლიო იცნობს და თაობები იზრდებიან. გახსოვთ, ალბათ, ილია ჭავჭავაძის სიტყვები: “მე ვიყავი სამეგრელოში და ვნახე საქართველო”. მიხარია, რომ ახლა სამეგრელოში ვართ. სამეგრელო ყოველთვის იყო საქართველოს გამაერთიანებელი ამომავალი წერტილი. ახლა ქართველებს გვაქვს შანსი გავერთიანდეთ, ჩავჭიდოთ ხელები ერთმანეთს, შემოვაქსოვოთ საქართველოს ჯაჭვის პერანგი და დავიცვათ უკეთურობებისგან. სწორედ ასეთ დიდ პიროვნებებზე უნდა იყოს დაფუძნებული ჩვენი სამშობლოს მომავალი, მომავალმა თაობებმა უნდა იცოდნენ ვისი გორისანი არიან, საიდან მოდის მათი ფესვები და საით უნდა წავიდეს.”
ბადრი ბაგრატიონ-მუხრანსკი: “ჩვენ ჩამოვედით კულტურის სამინისტროს სახელით, რომ დაგვეფიქსირებინა ჩვენი დიდი პატივისცემა ბატონი კონსტანტინესადმი. მე ძალიან მიხარია, რომ დღეს აქ ბევრ ბავშვს და ახალგაზრდას ვხედავ. მთავარი სწორედ ეს არის, რომ ხიდი არ ჩატყდეს იმ თაობასა და ამ თაობას შორის. კარგია, რომ რაიონის ხელმძღვანელობამ, პედაგოგებმა, მშობლებმა ყველაფერი გააკეთეს იმისთვის, რომ დღევანდელი ღონისძიება ასეთი მრავალფეროვანია. ჩვენი ვალდებულებაა ის სიბრძნე, რომელიც ბატონმა კონსტანტინემ დაგვიტოვა გადავცეთ ახალ თაობას.”
წლევანდელ “კონსტანტინეობას” ესწრებოდნენ პარტია “ქართული ოცნება _ დემოკრეტიული საქართველოს” აბაშის, მარტვილის, ჩხოროწყუს და სენაკის რაიონული ორგანიზაციები. “გურია ნიუსი” აბაშის პარტიის თავმჯდომარეს, გიორგი გვილავას ესაუბრა.
გიორგი გვილავა: “საზეიმო განწყობაა. ჩვენ წლების მანძილზე მოკლებულები ვიყავით ამ ღონისძიებაზე ერთად ყოფნის სიამოვნებას, წელს ჩვენც შემოვუერთდით ამ ღონისძიებას. დღეს აბაშაში ბუმბერაზი მწერლის პატივსაცემად ჩამოვიდნენ პარტია “ქართული ოცნება _ დემოკრატიული საქართველოს” ჩხოროწყუს, მარტვილის და სენაკის ორგანიზაციების თავმჯდომარეები და წევრები. ჩვენს მოსახლეობასთან და სტუმრებთან ერთად დიდი მოწიწებით და სიამაყით აღვნიშნავთ ამ დღეს.”
ღონისძიებას ესწრებოდნენ აბაშის მუნიციპალიტეტის გამგებელი, მისი მოადგილეები და თანამშრომლები. ჩვენ აბაშის გამგებელს გოჩა ჭანტურიას ვესაუბრეთ.
გოჩა ჭანტურია: “დღეს ტრადიციული ზეიმია აბაშაში. ჩვენი მუნიციპალიტეტი ყოველ წელს აღნიშნავს კონსტანტინე გამსახურდიას დაბადების დღეს. ამ დღეს იმართება სხვადასხვა ღონისძიებები, კონსტანტინე გამსახურდიას სახლ-მუზეუმი მასპინძლობს სტუმრებს და თითოეული აბაშელი ამაყობს, რომ დგას იმ მიწაზე, სადაც დიდი მწერალი გაიზარდა.”
ჩვენ სტუმრებს და მასპინძლებს დღევანდელი დღის შთაბეჭდილებების გაზიარება ვთხოვეთ.
მურად წოწორია, მარტვილის მკვიდრი: “მე გიორგი გამსახურდიას ახლო მეგობარი ვარ და კარგად ვიცი ის ისტორიები, რაც გამსახურდიების ოჯახს უკავშირდება. დიდი კონსტანტინე ბუმბერაზი პიროვნება და მწერალი იყო.
“კონსტანტინეობა” არა მარტო აბაშელების ზეიმია, ეს არის კოლხური კულტურის, გენის ზეიმი, ანუ ის დღე, როცა სიამაყით მოდის კოლხი კაცი ამ, უკაცრავად პასუხია და ნახევრად განადგურებულ ეზო-გარემოში, რომელსაც მეტი პატრონობა სჭირდება. ჩვენ წლების წინაც ვაყენებდით ამ საკითხს. სახლი, ასე თუ ისე, შერემონტდა, ეზოც წინანდელთან შედარებით მოვლილია თითქოს, მაგრამ აქ მოსასვლელი გზა ნახეთ, ალბათ, რას ჰგავს! თქვენ წვიმის დროს უნდა ნახოთ. აქ მოსულ ტურისტს მეორედ მოსვლა აღარ მოუნდება, უბრალოდ იმ ჯანჯღარის მეორედ გადატანის შეეშინდება. ეს ინფრასტრუქტურა მოგვარებული რომ იყოს, დღეს აქ ხალხიც ბევრი იქნებოდა. ნამდვილად ვადანაშაულებ იმ ადამიანებს, ვისაც ხელეწიფებოდა, ევალებოდა და არ გააკეთეს. აქ ხომ უამრავი სტუმარი მოდის და ასეთი გზა არ ეკადრება ამ სოფელს.”
გივი ძველაია, აბაშელი პედაგოგი, პოეტი: “დღეს უდიდესი დღეა ყველა ჭეშმარიტი ქართველისთვის, ყველა აბაშელისთვის. ჩვენ გვეამაყება ბატონი კონსტანტინე. მიხარია, რომ აქ ახალგაზრდები მრავლად არიან, მათ უნდა იცოდნენ დიდი წინაპრების ისტორიები.”
ტრიბუნაზე შეკრებილ საზოგადოებას სიტყვით მიმართეს როგორც ადგილობრივმა მაცხოვრებლებმა, ასევე ჩამოსულმა სტუმრებმა. ღონისძიებას მუსიკალურად აფორმებდნენ ფოლკლორული ანსამბლი “ჰარირა” და კულტურის სახლთან არსებული ქორეოგრაფიული სტუდიის აღსაზრდელები.
