(გურია ნიუსი, ლანჩხუთი) _ შაბათს, ქალაქ ბათუმში კარატე-დოში აჭარის ღია პირველობა გაიმართა, რომელშიც მონაწილეობას ბათუმის, ქობულეთის, ფოთის, ჩხოროწყუს, ქუთაისის და ლანჩხუთის გუნდები იღებდნენ. ჩვენმა კარატისტებმა ამჯერადაც წარმატებით იასპარეზეს და საერთო ჯამში 7 სხვადასხვა სინჯის მედლის მოპოვება შეძლეს. კარატე-დოს გურიის ფედერაციის პრეზიდენტის, მერაბ თურქიას თქმით, _ ჩვენებურთაგან ტურნირზე 15 სპორტსმენი მონაწილეობდა, რომელთაგან 7 წარმატებით გამოვიდა. პირველადგილოსნები გახდნენ: საბა გოგოძე, დავით წილოსანი, სალომე მითაიშვილი. ვერცხლის მედლები მოიპოვეს: გუგა ივანაშვილმა და ანა პატარაიამ. ხოლო მესამე საპრიზო ადგილს დასჯერდნენ: თამუნა ცეცხლაძე და ნიკა ჩხაიძე. ეს უკანასკნელი, რომ არა მსაჯების არასწორი გადაწყვეტილება, ალბათ, პირველობას არავის დაუთმობდა. ბატონი მერაბის თქმით, ტურნირისთვის ჩვენებურები მასთან ერთად, ხაჩიკ ტონოგონიანმა და ლაშა ბერიძემ მოამზადეს.
