“გურია ნიუსის” კითხვაზე, რა შეფასებას მისცემდა 17 მაისს თბილისში განვითარებულ მოვლენებს და რამდენად ადეკვატური იყო პოლიცია, საპარლამენტო უმრავლესობის წევრმა თინა ხიდაშელმა განაცხადა:
“ჩემი შეფასება ცნობილია მე მგონი, ამაზე იმდენი ვილაპარაკე. მაგრამ, არ ვფიქრობ, რომ რამე განსაკუთრებულს ვიტყვი დღეს იმისგან განსხვავებულს. იმ დღეს არც ემოციებზე ვყოფილვარ და არც რაიმე განსაკუთრებული სიმძიმის პირობებში, მიუხედავად იმისა, რომ ძალიან მძიმე დღე იყო. რაციონალურად ვუყურებდი ყველაფერს. ეს იყო აღმაშფოთებელი. სრულიად მიუღებელი და შემაშინებელი. ეს იყო ერთგვარად ჯანყი სახელმწიფოს წინააღმდეგ და გაცილებით ნაკლებად იმ ადამიანების წინააღმდეგ, ვიზეც იმ კონკრეტულ მომენტში მიიწევდნენ.
პოლიცია იყო აბსოლუტურად ადეკვატური. ნებისმიერი ადამიანი, რომელიც იმ დღის პოლიციის ქმედებებს აკრიტიკებს ერთადერთ რამეს ვითხოვ, რომ თქვან, რა იქნებოდა ის რასაც არ გააკრიტიკებდნენ. ეს ძალიან მნიშვნელოვანია. მე ვარ აბსოლუტურად დარწმუნებული, რადგან მაქვს უზარმაზარი გამოცდილება აქციებზე ყოფნის, იქ რომ ვინმესთვის ხელი მოეკიდათ, იქ რომ ყოფილიყო ძალადობა, პოლიცია ცემაზე რომ გადასულიყო, ან თუნდაც გაზი გაეშვა, დღეს იქნებოდა გაცილებით მძიმე შედეგები, ვიდრე დღეს გვაქვს.
დაიწყებოდა პირდაპირი მნიშვნელობით ანგარიშსწორება და არ არსებობს პოლიცია, რომელიც ამას გააჩერებს. ყოველგვარი კორელაციები 7 ნოემბერთან სასაცილოა, რადგან 7 ნოემბრის აქციას არ ჰყავდა აქციის არცერთი ორგანიზატორი, რომელიც ძალადობისკენ მოუწოდებდა. პირიქით, ჩვენ ყველაფერს ვაკეთებდით, რომ დაგვეწყნარებინა მოსახლეობა. წარმოიდგინეთ პოლიცია ისე რომ მოქცეულიყო როგორც 7 ნოემბერს იქცეოდა, რას იზამდნენ ამ აქციის ორგანიზატორები და რა მოწოდებები იქნებოდა? ამიტომ ძალიან სწორად, ძალიან ჭკვიანურად იყო დაგეგმილი ეს აქცია. რა თქმა უნდა მოძალადეები, რომ უნდა დაისაჯონ ამას ალტერნატივა არ აქვს.”- განაცხადა ხიდაშელმა.
