საქონლის აქციზური მარკებით სავალდებულო ნიშანდება უნდა განხორციელებულიყო 2013 წლის 1 იანვრიდან. ხელშეკრულების ძალაში შესვლა, ფინანსთა მინისტრის გადაწყვეტილებით, რამდენჯერმე გადაიდო. საკითხი, სამწუხაროდ, დღემდე ღიად რჩება და შარშან დადებული ხელეკრულება, ფაქტობრივად, კვლავ ძალაშია.
მეწარმეებმა, საკითხთან დაკავშირებით, ბიზნესომბუდსმენს საკუთარი პოზიცია გააცნეს. საუბარი შეეხო ახალი რეგულაციის მოსალოდნელ ფისკალურ შედეგებს. შეხვედრის მონაწილეებმა იმედი გამოთქვეს, რომ არგუმენტები შეჯერდება და აღმასრულებელი ხელისუფლება, აღნიშნულ საკითხთან დაკავშირებით, ახლო მომავალში სწორ გადაწყვეტილებას მიიღებს.
“მაგ საკითხზე მიმდინარეობს მუშაობა. ბიზნესომბუდსმენი ძალიან აქტიურად არის ჩართული და თანამშრომლობს კომპანიებთან და მე მგონი, რომ ყველაფერი ისე გადაწყდება, მისაღები იქნება ყველასთვის და საზოგადოებისათვისაც გასაგები გახდება. აი ასეთი მოკლე პასუხი გაგეცით, რამეთუ კითხვაში უკვე ბევრი ისმოდა, ბევრი მინიშნება იყო და გასაგები იყო კითხვაში უკვე. ბიზნესის დაცვა, როგორც ადრე მოგახსენეთ, ისევე გაგრძელდება და ისევე ვარ სადარაჯოზე.
გუშინ ბანკირებსაც შევხვდი და არავითარი კითხვა არ აქვთ – კარგად იცით, რა ხდება ბაზარზე, რა ხდება ბიზნესში, ხომ არ ხდება სახელმწიფოს, ჩინოვნიკების მხრიდან ჩარევა? მსგავსი შეკითხვები უკვე აღარ არსებობს. ამ მხრივ გარდატეხა მოხდა, მაგრამ ამის მსგავსი კითხვები იქნება სულ, ეს ნორმალურია. თქვენ ნუ გგონიათ, რომ მარტო საქართველოში ისმის ეს კითხვები და არ ისმის განვითარებულ ევროპაში. შესატყვისი გადაწყვეტილება იქნება მიღებული. მათთან მუშაობა მიმდინარეობს და ბიზნესმენები აქტიურად არიან ჩართულები. გარწმუნებთ, რომ გადაწყვეტილება იქნება ნორმალური.” _ ასეთი განმარტება პრემიერმა 14 მაისს მედიასთან გამართული შეხვედრის დროს “გურია ნიუსთან” გააკეთა.
ჩვენი კითხვა არაალკოჰოლური სასმელების მარკირებას და იმ კანონს ეხებოდა, რომელიც წინა ხელისუფლების დროს მიიღეს, მაგრამ დღესაც არ შეცვლილა მიუხედავად იმისა, რომ კანონში შეტანილი ცვლილების თანახმად, შემოდის მე-6 სახის გადასახადი, რაც წინააღმდეგობაში მოდის გადასახადების შესახებ საკონსტიტუციო და ორგანული კანონით “ეკონომიკური თავისუფლების შესახებ” (2011), გათვალისწინებულ გარანტიებთან, რომელთა თანახმად 2013 წლის ოქტომბრისთვის იარსებებს მხოლოდ შემდეგი გადასახადები, კერძოდ: 1. საშემოსავლო გადასახადი; 2. დღგ; 3. ქონების გადასახადი; 4. იმპორტის გადასახადი; 5. აქციზი.
სიქპა-ზე (ეს სწორედ შვეიცარული კომპანიაა, რომელიც 2012 წლის 03 თებერვალს, 2011 წლის 10 ნოემბერს გამოცხადებულ კონკურსში გამარჯვებულად გამოცხადდა) განპიროვნებული “ფარული აქციზი” არ განეკუთვნება გადასახადს, შესაბამისად, არც მისი არსებობაა შესაძლებელი.
