“მე თქვენ გეუბნებით, “ბალაგანს” ნუ ემსგავსება საკრებულო!”

“გურია ნიუსი”  გთავაზობთ საკრებულოს თვმჯდომარისა და  ფრაქციის თავმჯდომარეების კომენტარებს.

ამირან გიგინეიშვილი, საკრებულოს თავმჯდომარე: “საქართველოს ადგილობრივი თვითმმართველობის კანონში წერია, რომ სამ ადამიანს, რომელთაც აქვთ ერთნაირი პოლიტიკური შეხედულებები, შეუძლიათ შექმნან ფერაქცია. ანუ საკრებულოს არანაირად არ შეუძლია უარი უთხრას ფრაქციის შექმნაზე.  პარლამენტში არის 8 ფრაქცია, რაც შეეხება დანარჩენ რეგიონებს, ბორჯომში _ 6, აბაშაში_ 5,  ზუგდიდში _ 7, მცხეთაში _ 7, ოზურგეთში _ 7….

რაც შეეხება ხელფასებს, პრეზიდენტის გასული წლის განკარგულების თანახმად, ხელფასები მოემატათ ყველა ადგილობრივ თვითმმართველობებს და ყველგან ავიდა ზემო ზღვარზე. ჩვენთან მსგავსი არ მომხდარა და ერთი თეთრითაც არ მომატებულა. ის ხელფასები, რომლებიც საკრებულოს  წევრებს, ფრაქციის თავმჯდომარეებს  აქვთ, არის მთავრობის განკარგულებით დაწესებული, ამის შეცვლა ჩვენ არ შეგვიძლია. 4 მუნიციპალიტეტია დარჩენილი, სადაც ხელფასები არ აწეულა. რაც შეეხება ფრაქციების შექმნა-არშექმნას, ეს არ არის საკრებულოს პრეროგატივა, ჩვენ ვერ ავუკრძალავთ ვერავის შექმნას ფრაქცია.

მიმაჩნია, ეს არის შესაძლებლობა იმისა, რომ ადგილობრივ საკითხების გადაწყვეტის პროცესში მეტი ძალა გვქონდეს. რატომ შეიქმნა ფრაქცია, უნდა კითხოთ ფრქციის წევრებსა და თავმჯდომარეებს.

მაკა კვირკველია, ფრაქცია “ქართული ოცნება – დემოკრატიული საქართველოს” თავმჯდომარე:   _  ჩემი შესვლა საკრებულოში, სხვებისგან განსხავებით, გაყალბებით არ მომხდარა და მინდა, ინტერპრეტაციების გარეშე დაიწეროს ის, რასაც ვიტყვი; შეიძლება ზოგიერთ ჟურნალისტს ან რედაქციას არ მოვწონდე, მაგრამ ეს არავის არ აძლევს უფლებას საკუთარი ინტერპრეტაციებით დაწეროს რამე.

…ჩემი კონკრეტული ფრაქცია ოფიციალურად დარეგისტრირდა 5 აპრილს. ერთადერთი სრული ხელფასი მაქვს აღებული, ისიც წინსწრებით და ამას არ გააკეთებს ის, ვისაც ულხინს.

1 ოქტომბრის შემდეგ შეიცვალა რეალობა და მე ვთვლი, რომ ჩემი ფრაქცია არის პოლიტიკური და არა ტექნიკური ფრაქცია ამ საკრებულოში სხვა ფრაქციებისგან განსხვავებით. მე ამ საკრებულოში შემოვედი 2 400 ადამიანის მხრდაჭერით, ვიყავი წინა საკრებულოშიც.

ანგარიშის წარდგენას რაც შეეხება, როგორ გავაკეთებთ, როცა ოთახი, ელემენტარულად, მაგიდაც კი არ გაგვაჩნია?! ეს საკითხი ამირანმა ბიუროზეც ბევრჯერ გააჟღერა, წერილიც გაუგზავნა გამგეობას, მაგრამ მაინც, ამირან, შენი მინუსია და საკრებულოს მინუსი _ ჩვენ ვართ ზემდგომი გამგეობის აპარატისა და თუ ჩვენს სიმაღლეზე ვიქნებით, ვერავინ ვერაფერს გაგვიბედავს. მოგვცენ პირობები იმისა, რომ ვიფუნქციონიროთ და გავაკეთებთ ჩვენს საქმეს.“

გიორგი ჩახვაძე, ფრაქცია “მომავლის ლანჩხუთი”: _ ყველმ კარგად მინდა იცოდეს, რომ ხელფასის გულისთვის შექმნას რაღაცეები და ბიუჯეტიდან თანხა წაიღოს სახლში, მე ამის გამკეთებელი არ ვარ. ჩვენი ფრაქცია შეიქმნა იმისთვის, რომ ვაპირებთ მუშაობას, კონკრეტულად იმისთვის, რომ შევხვდეთ მოსახლეობას, რათა მოხდეს მათი ჩართვა ადგილობრივი თვითმმართველობის, მართვის პროცესებში. თავის დროზე, “ნაციონალებში” ვიყავი, მაგრამ “ნაციონალების” დროსაც უმრავლესობას ჰქონდა განსხვავებული აზრი და მქონდა ფრაქცია; თუ ეს იქნება  ფულისთვის შექმნილი ფრაქცია, ამასაც მალე დაინახავთ, მადლობას მეტყვის მოსახლეობა! თუ არ მეტყვის,  თითოეულ თეთრს უკან დავაბრუნებ.

_ არც მე შემიქმნია ფულისთვის ფრაქცია; მე ფრაქცია თავიდანვე მქონდა და სახელი გადავაკეთე, _ თქვა  მარიკა თურნავამ, ფრაქცია “ქართული ოცნება, დემოკრატიული ლანჩხუთის” თავმჯდომარემ.

_ ის ჯობდა, 70 ლარი რომ ჰქონდა გამგებელს და კორუფცია იყო? _ ჩაურთო რეპლიკა ილო გვარჯალაძემ.

გიგინეიშვილის კითხვით, თუ რატომ შეიქმნა ფრაქციები, ერთ-ერთმა ჟურნალისტმაც მიმართა ფრაქციის თავმჯდომარეებსა და წევრებს, რომლებიც პრესკონფერენციას სწორედ გიგინეიშვილის მოწვევით ესწრებოდნენ, თუმცა, ამ კითხვას ისევ მწვავე რეაქცია მოჰყვა.

_ თქვენ  სხდომის წამყვანი არ ხართ ამ  პერსკონფერენციაზე, _ მიმართა გაღიზიანებულმა დავით წულაძემ ჟურნალისტს, _ რატომ შევქმენი, იცი? განსხვავებული აზრი მაქვს და განსხვავებული ვიყავი თავიდან ბოლომდე. ამიტომ შევქმენი, გაიგე?!  მოკლედ ვიტყვი, ავტობიოგრაფიების მოყოლას არ დავიწყებ. ისიც მინახავს აქ, “მხედრიონი” რომ შემომივარდა! ნუ დაამსგავსეთ 92 წელს დღევანდელი საკრებულო!  “ნაციონალური მოძრაობის” დროს რას ვაკეთებდი,  ყველამ კარგად იცის. ყოველთვს განსხვავებული ვიყავი და ფრაქციაც ასეთი მინდოდა, დიდი ხნის წინ გავაკეთე განცხადება, რომ შევქმნიდი ფრაქციას. მე თქვენ გეუბნებით, ბალაგანს ნუ ემსგავსება საკრებულო! _ განაცხადა წულაძემ.

_ რას გულისხმობ ბალაგანში? _ ჩაეკითხა საკრებულოს თავმჯდომარე.

_ რას ვგულისხმობ და “ბალაგანია” და “ბარდაგი” აქ! _ ამის შემდეგ წულაძემ  დარბაზი დატოვა.

ნუგზარ ჩხაიძე, “ქართული ოცნების”  წევრი: _ მოდით, ერთმანეთის ჯიბეში ნუ ჩავიხედავთ; ამას კანონი არეგულირებს… დასაფიქრებელია ის, რომ ძალიან ბევრი ისეთი სამსახურია განლაგებული ამ შენობაში, რომელიც  საერთოდ არაა აუცილებელი. მე პირადად ვერანაირ ცვლილებებს ვერ ვგრძნობ, გარდა იმისა, რომ კოჰაბიტაციური რეჟიმი კარგად წარიმართა, მაგრამ, საქმის კეთების მხრივ, არაფერი იცვლება. ლანჩხუთის გამგეობას და საკრებულოს ძალიან მალე ცუდად დაუბრუნდება ყველაფერი. რას ვგულისხმობ იცით? ჩვენ ერთმანეთი კი არ უნდა ვაკრიტიკოთ, არამედ უნდა მოვაგვაროთ ის პროლემები, რაც არსებობს. ძალიან ცუდად მუშაობთ სოციალურ საკითხებზე და ეს ცუდად დასრულდება!