თუმცა, სამართალდამცავებისგან კონკრეტული პასუხი ამ დრომდე ვერ მიიღეს, რა მოუვიდა მათ შვილს. სწორედ ამიტომ მათ დღეს ანაკლიაში, თავიანთი სახლის წინ მთავარი გზა გადაკეტეს. გოგიტა აბულაძის მშობლებთან ერთად ახლობლები, მეზობლები და სასტუმრო “ანაკლიის” თანამშრომლები იყვნენ შეკრებილები, რადგან დაკარგული ამ სასტუმროში ინჟინერ-ტექნიკოსად მუშაობდა.
აქციაზე შეკრებილების მოთხოვნა იყო სამეგრელო-ზემო სვანეთში კონტრდაზვერვის დეპარტამენტის უფროსის მალხაზ პაჭკორიას თანამდებობიდან განთავისუფლება. დაკარგულის ახლობლები ფიქრობენ, რომ მან ყველაფერი იცის, ამის მიზეზს კი გოგიტას დედის, ცირა აბულაძის მიერ შვილის გაუჩინარებიდან ორი თვის შემდეგ ნაპოვნი წერილი აძლევთ. ქალბატონმა ცირამ წერილი შემთხვევით იპოვა, სადაც წერია: “გადავედი აფხაზეთში ჟენიას შესახვედრად. ამის შესახებ იცის მალხაზ პაჭკორიამ”.
ცირა აბულაძის თქმით, წერილში ნახსენებ ჟენიას ოჯახში ყველა იცნობს. რუსი ეროვნების სამხედრო პირი ჟენია, იგივე ევგენი ბორისოვი, გოგიტა აბულაძემ და მისმა ოჯახმა ანაკლიაში, ე.წ რუსი სამშვიდობოების ყოფნის დროს გაიცნო.
“რუსი სამხედროები აქ დიდი ხანი იყვნენ და ჩვენ ყველას მათთან ნორმალური ურთიერთობა გვქონდა, თუმცა მას შემდეგ, რაც საქართველო დატოვეს, კონტაქტი არ გვქონია. არც იმას გვეუბნებიან, რომ მკვდარია ჩემი შვილი და არც იმას, თუ სად არის. საქმე აღძრულია, მაგრამ არანაირი ცნობები არ გვაქვს. სამი გამომძიებელი გამოვიცვალეთ და შედეგი მაინც არ არის. გამოძიება უფრო სწრაფად და სწორი მიმართულებით უნდა წავიდეს წინ,” _ ამბობს ცირა აბულაძე.
რაც შეეხება წერილში ნახსენებ კიდევ ერთ პირს, საქართველოს შინაგან საქმეთა სამინისტროს კონტრდაზვერვის დეპარტამენტის სამეგრელოს განყოფილების თანამშრომელს, მალხაზ პაჭკორიას, რომლის თანამდებობიდან გადადგომასაც აქციის მონაწილეები ითხოვენ, იგი აღნიშნულ საქმესთან კავშირს უარყოფს და აცხადებს, რომ არ იცნობდა დაკარგულ გოგიტა აბულაძეს.
აქცია მხოლოდ მაშინ დაიშალა, როცა დაკარგულის დედამ დაპირება მიიღო ძალოვანი უწყების წარმომადგენლებისგან _ სამეგრელო-ზემო სვანეთის სამხარეო მთავარი სამმართველოს უბნის ინსპექტორების, სამმართველოს უფროსის კობა კირთაძისგან და ზუგდიდის პოლიციის სამმართველოს უფროსის კობა ხარებავასგან, რომ მინისტრს შეახვედრებდნენ.
“დამპირდნენ, რომ ათი დღის შემდეგ შემახვედრებენ ირაკლი ღარიბაშვილს. მე დავთანხმდი ამ დაპირებას და თუ არ შესრულდება, უფრო მასშტაბურ აქციას მოვაწყობ”, _ უთხრა ჟურნალისტებს ცირა აბულაძემ.
