შოთა თარხნიშვილი, გენერალური აუდიტორის პირველი მოადგილე – 48 050 ლარი; გიორგი ლაცაბიძე, გენერალური აუდიტორის მოდგილე – 39 425 ლარი; კახაბერ კირტავა, კონტროლის პალატის თავმჯდომარე აჭარის ა/რ-ში – 37500 ლარი; დევი ვეფხვაძე, გენერალური აუდიტორის მოადგილე – 36 000 ლარი; ნათია მოგელაძე, პარტიების ფინანსური მონიტორინგის სამსახურის უფროსი – 34 315 ლარი; ზვიად ხოფერია, სამმართველოს უფროსი – 32 550 ლარი; ნატო ზაალიშვილი, იურიდიული დეპარტამენტის უფროსი – 30 512 ლარი; ვახტანგ კეჟერაძე, დეპარტამენტის უფროსს – 30 500 ლარი; ირენა მელუა, კაბინეტის უფროსი – 30 000 ლარი; გიორგი ალასანია, დეპარტამენტის უფროსი – 28 370 ლარი.
აღნიშნული თანხა, 54 722 ლარით (18,7%-ით) მეტია ყველა აუდიტორზე დარიცხულ პრემიასთან შედარებით (292 500 ლარი, ხელფასის 32%).
განსაკუთრებით საინტერესოა ლევან ბეჟაშვილის თანაშემწის, ადმინისტრაციის ყოფილი უფროსის, ირენა მელუას ჯილდოები და პრემიები, რომელიც მას დანიშვნიდან სამ დღეშიც კი აქვს მიღებული.
ვინ არის კონტროლის პალატის თანამშრომელი ირენა მელუა? ლევან ბეჟაშვილის თანაშემწე, 2005 წელს, როდესაც გიგა ბოკერია იურიდიული კომიტეტის თავმჯდომარის მოადგილე იყო, აღნიშნული კომიტეტის აპარატის თანამშრომელი გახლდათ.
მოგვიანებით, ის კონტროლის პალატაში ბეჟაშვილის თანაშემწე იყო, რომელიც თავმჯდომარეს თითქმის ყველა მივლინებაში თან ახლდა.
“გურია ნიუსის” ინფორმაციით, მან ბეჟაშვილს დიდი დახმარება გაუწია კახეთშიც, როდესაც ბეჟაშვილი მაჟორიტარის რანგში წინასაარჩევნო კამპანიას აწარმოებდა.
ირენა მელუა – ზემოაღნიშნული კაბინეტის უფროსად დაინიშნა 26.03.2010 წელს. გენერალური აუდიტორის 18 ივლისის N1/132 ბრძანებით განთავისუფლდა ამ თანამდებობიდან და დაინიშნა ადმინისტრაციული დეპარტამენტის უფროსად, ხოლო გენერალური აუდიტორის N1/219 ბრძანებით 1 ნოემბრიდან მუშაობდა ადგილობრივი თვითმმართველობის ერთეულების ბიუჯეტების აუდიტის დეპარტამენტის აპარატის უფროსის ერთ-ერთ მოადგილედ.
თუმცა, კონტროლის პალატამ შემოწმებაზე შესულ საპარლამენტო კომისიას ვერ დაუსაბუთა კომისიას ვერ დაუსაბუთეს ადგილობრივი თვითმმართველობის დეპარტამენტში აპარატის, თავისი უფროსით და ორი მოადგილით, საჭიროება, მაშინ როცა იგივე ფუნქციებს, რასაც აპარატის უფროსი და მისი ორი მოადგილე ასრულებს, აჭარის და აფხაზეთის, ასევე სხვა აუდიტის დეპარტამენტებში, ახორციელებს საქმის მწარმოებელი ან სპეციალისტი ბევრად ნაკლები სარგოთი და ფაქტობრივად უპრემიოდ.
2012 წლის განმავლობაში, თავმჯდომარის რეზოლუციით, კაბინეტის უფროსის სახელზე და მის 5 თანამშრომელზე აუდიტის სამსახურში 3271 შემოსული დოკუმენტიდან არცერთი დოკუმენტი არ დაწერილა. ირენა მელუას სახელზე წლის განმავლობაში შემოსული იყო სულ 3 წერილი, მისი სახელით კი გაგზავნილი იქნა 55 წერილი. აქედან 54 ეხებოდა ერთსა და იმავე საკითხებს. კერძოდ 34 წერილი 3 თებერვალს გაგზავნილი იქნა სხვადასხვა საერთაშორისო ორგანიზაციაში, რომლებსაც იწვევდნენ ახლად შექმნილი პოლიტიკური პარტიების ფინანსური მონიტორინგის სამსახურის საქმიანობის გასაცნობად. ამავე საკითხებზე დამატებით, 6 თებერვალს იგივე შინაარსის 20 წერილი გაეგზავნა სხვადასხვა ორგანიზაციას. საანგარიშო პერიოდში ირენა მელუას სახელზე შემოსული იყო 3 წერილი, გაცნობითი ხასიათის, რომელთაც პასუხი არ სჭირდებოდა. ამავე პერიოდში ირენა მელუას მიერ მომზადებული იყო 3 წერილი, რომელთაგანაც ერთი ეხებოდა თანამშრომლის მივლინებას, მეორე – განცხადება კუთვნილ შვებულებაზე და მესამე – განცხადება 31 ოქტომბერს სამსახურიდან განთავისუფლებაზე. სხვა ოფიციალურ დოკუმენტებში, როგორც გასულ, ისე შემოსულ და შიდა მოხმარების დოკუმენტებში, ირენა მელუას გვარი არ ფიგურირებს.
ზემოაღნიშნული არაფრით გამორჩეული საქმიანობის მიუხედავად, 2012 წლის განმავლობაში, სარგოს სახით მას დარიცხული ჰქონდა 26 800 ლარი, ხოლო პრემიის სახით – 30 000 ლარი, ანუ სარგოზე 3 200 ლარით მეტი.
როგორც საპარლამენტო კომისიის ანგარიშშია წარმოდგენილი, “ივლისის თვეში, სარგოს გარდა, პრემიის სახით, ლევან ბეჟაშვილის 2 ბრძანებით – 2012 წლის 11 ივლისის N107/37 და 2012 წლის 20 ივლისის N127/37, ანუ ცხრადღიანი შუალედით, ერთი და იგივე ფორმულირებით – სამსახურებრივი მოვალეობის სანიმუშო შესრულებისათვის, ირენა მელუამ მიიღო ერთდროული ფულადი ჯილდო როგორც გენერალური აუდიტორის კაბინეტის უფროსმა 2500 ლარის და დანიშვნიდან 2 დღეში, როგორც ადმინისტრაციული დეპარტამენტის უფროსმა, 3750 ლარის ოდენობით, ჯამში 6250 ლარი. ხაზგასმითაა აღსანიშნავი, რომ ივლისის თვეში ოფიციალურ დოკუმენტებში ირენა მელუას გვარი მხოლოდ ერთ დოკუმენტში ფიგურირებს, ისიც 20 ივლისიდან შვებულებაში გასვლაზე”.
ირენა მელუას სამსახურებრივი მოვალეობის სანიმუშო შესრულებისათვის, წახალისების სახით ერთდროული ფულადი ჯილდო თვეების მიხედვით დარიცხული აქვს: იანვარში, თებერვალში, აპრილსა და მაისში – 2200 – 2200 ლარი, მარტში – 3500 ლარი, ივნისში – 3300 ლარი, ივლისში – 6250 ლარი, აგვისტოსა და სექტემბერში – 2500 ლარი, ოქტომბერში – 1250 ლარი, ნოემბერში – 0 და დეკემბერში – 1900 ლარი. საყურადღებოა, რომ საქართველოს მინისტრის ოფიციალური სარგო თვეში 3 540 ლარს შეადგენს.
ირენა მელუას კოორდინატების დადგენა ამ ეტაპზე ვერ მოვახერხეთ. მისი რაიმე სახის საკონტაქტო ინფორმაცია არც აუდიტის სამსახურის ვებგვერდზეა მოცემული. მისი სურვილის შემთხვევაში, სიამოვნებით მოვისმენთ განმარტებებს, თუ რა სახის სამუსაოების შესრულებაში იღებდა ამ რაოდენობის პრემიას.
“კომისიის ხელთ არსებული მასალების ანალიზისას, გამოიკვეთა საქართველოს კონტროლის პალატაში (აუდიტის სამსახურში) პრემიების არამართლზომიერი განაწილების ტენდენცია.
კერძოდ, 2008-2012 წლებში პრემიები მეტწილად კონტროლის პალატის თავმჯდომარის მოადგილეებს, თავმჯდომარის კაბინეტსა და ადმინისტრაციულ პერსონალს შორის ნაწილდებოდა მაშინ, როცა აუდიტორები, რომელთა საქმიანობაზე მნიშვნელოვანწილად არის დამოკიდებული სამსახურის ეფექტიანი საქმიანობა, ხშირად პრემიების გარეშე რჩებოდა, იშვიათად კი მათთვის საპრემიო თანხის მხოლოდ მცირე ნაწილს იმეტებდნენ. შესაბამისად, არ ხდებოდა აუდიტორების წახალისება და სტიმულირება, მათზე დაკისრებული მოვალეობების ეფექტიანად და ხარისხიანად შესრულების თვალსაზრისით, რაც გარკვეულწილად აისახა კიდეც აუდიტის სამსახურის მუშაობაზე”. _ ნათქვამია ანგარიშში, რომელიც კონტროლის პალატის შემსწავლელმა საპარლამენტო კომისიამ წარადგინა.
