საინტერესოა, რას ფიქრობენ ამ საკითხთან დაკავშირებით ის ადამიანები, რომლებიც, საკუთარი შეხედულებების მიუხედავად, ამ შეხედულებებს მოვლენის გაშუქების დროს თითქმის არასდროს არ გამოთქვამენ _ ეს ადამიანები ჟურნალისტები არიან.
ჩვენ სხვადასხვა ქალაქის ჟურნალისტებს დავუკავშირდით და ერთი კითხვა დავუსვით:
_ ეთანხმებით თუ არა მარიხუანას დეკრიმინალიზაციის მოთხოვნას?
ზვიად ბიაშვილი: “არა, მე არ ვემხრობი მარიხუანას დეკრიმინალიზაციას, იმიტომ რომ, მარიხუანას მავნებლობა დამტკიცებულია _ იწვევს მამაკაცებში უშვილობას და ნერვულ აშლილობას. თრიაქი კაცს უფრო მშიშარას ხდის. ღვინო პირიქით _ აგულიანებს.”
ამირან ბუტურიშვილი: “მე მარიხუანას კი არა, სიგარეტსაც არ ვეწევი და მისი წინააღმდეგიც ვარ. რა დროს მარიხუანაა, ისედაც დაბოლილები ვართ ქართველები, ხან ევროპისგან და ხან ამერიკისგან (პოლიტიკურად). ხომ გაგიგია, მოცლილი კაცი ერთ ადგილას მახათს იყრიდაო თუ იმ ადგილს უყრიდა მახათშიო? საქართველო ისედაც იღუპება და ახლა მარიხუანის დროა?! გახსოვს, ალბათ, რაღაც უცხოური სერიალი გადიოდა ტელევიზიით, მთავარი გმირი იყო ხუანი და მთელი საქართველო იმით იყო დაბოლილი, ახლა ხუანი არ კმარა და მოვიდა მარი-ხუანი? სისულელეა!”
შორენა გონგლაძე: “ვთვლი, რომ ეს კრიმინალია, თუმცა, მე უფრო სხვა რამეზე მინდა პასუხის მიღება _ რატომ გააქტიურდნენ ასე არასამთავრობო ორგანიზაციები? ჯერ ლგბტ, შემდეგ მარიხუანას დეკრიმინალიზაცია… ამასთან ერთად ხელისუფლების ლიბერალიზმი და საერთოდ, ამ ყველაფერზე პასუხი ხელისუფლებისგან უფრო საინტერესო იქნებოდა. თუმცა ერთი რამ უკვე ნათელია: არც წინა და არც ამჟამინდელ ხელისუფლებას ეროვნული არაფერი გააჩნია _ ამის თქმა დღეს უკვე დარწმუნებით შემიძლია.”
ირმა მესხია: “მარიხუანას დეკრიმინალიზაცია ქვეყანას სერიოზული პრობლემის წინაშე დააყენებს.
ვფიქრობ აბსოლუტურად სხვა რამეა მოსაფიქრებელი. ახლა რა მდგომარეობაა და დეკრიმინალიზაციის შემდეგ რა მოხდება? მომხმარებელია, ავად არის, რას ეტყვი? ვერაფერს. მარიხუანას შესაძენად ფული უნდა, რომელიც არ აქვს, არ მუშაობს, არაფერს არ აკეთებს _ სად წავა? მოიპარავს, ვინმეს დააყაჩაღებს. საქართველოს მომავალი თაობა არ ეყოლება.
ასე სწრაფად ამის გადაწყვეტა, იმის გამო, რომ ვიღაცა ითხოვს, არ შეიძლება. მესმის, რომ მოქალაქეების უფლება უნდა დაიცვას სახელმწიფომ, მაგრამ კეთილი ინებოს და ჩემიც დაიცვას.
მომცეს გარანტია, რომ მარიხუანას დეკრიმინალიზაციით ჩემი უფლებები არ შეიზღუდება, კრიმინალი არ მოიმატეს.”
შორენა სიხარულიძე: “მარიხუანას ლეგალიზების წინააღმდეგი ყოველთვის ვიქნები, რადგან ის მომავალ თაობას აჩლუნგებს და ადებილებს.”
გოჩა ნაჭყებია: “მავნე ჩვევა ნებისმიერის ჯანმრთელობაზე უარყოფითად აისახება და ვფიქრობ, რომ თუ მოხდა მარიხუანას ლეგალიზება, ეს ცუდ გაგრძელებას ჰპოვებს და შესაძლოა მერე უკვე ნარკოტიკებზეც იგივე მოითხოვონ. ეს შეუქცევადი პროცესი იქნება.”
ვერიკო ჯიბლაძე: “ჩემს პირად აზრს დავაფიქსირებ, არ ვამბობ, რომ მაინცდამაინც სისხლის სამართლის დანაშაულია, მაგრამ არ ვარ მომხრე თავისუფლად იქნას დაშვებული, თაობების ტვინის სიმდაბლეს ვერაფრით დავუჭერ მხარს. როგორც ვიცით, მარიხუანას ინტენსიური მოხმარება საზიანოა ჯანმრთელობისთვის. ამიტომ უნდა აიკრძალოს თავისუფლად გამოყენება, შესაბამისი ზომები უნდა გატარდეს ასაკრძალად. შვილები გვეზრდება და ამას ვერ შევეგუებით, ყოველ მოსახვევში მარიხუანას თავისუფლად მოიხმარება დაუშვებელია.”
შალვა ჯოხაძე: “სპეციალისტების ერთი ნაწილის მოსაზრება იმასთან დაკავშირებით, რომ მარიხუანა ნარკომანიის კარიბჭეა. მით უმეტეს, არ არის მისაღები ასეთი კამპანიის დაწყება ცნობილი ადამიანების მიერ, რომლებიც ვიღაცისთვის მისაბაძ მაგალითს წარმოადგენენ. მიმაჩნია, რომ ეს არის პროპაგანდა და ნარკომანიის პროპაგანდას ვერასოდეს გავამართლებ.”
ნიკო ბელიაშვილი: “მე მომხრე ვარ. დეკრიმინალიზაცია უნდა მოხდეს, მაგრამ დასახვეწია ეს საკითხი. ვინც დეკრიმინალიზაციას ითხოვს, უნდა ესმოდეს, რომ ჯერ დასახვეწია კანონმდებლობა, შესაცვლელია ინფრასტრუქტურა, საინფორმაციო-საკონსულტაციო ცენტრები მაინც. როგორ უნდა გააკონტროლოს სახელმწიფომ მარიხუანას მოყვანის საკითხი? ვთქვათ, თუ არ ვისჯები სისხლის სამართლის პასუხისმგებლობით, მაშინ თავისუფლად შემიძლია სახლში, ქოთანში მოვიყვანო მარიხუანა? ამ შემთხვევაში რა ხდება? აი, ასეთი მსგავსი ნიუანსები ბლომად არის დასარეგულირებელი.”
თამარ ხვედელიძე: “საერთოდ არ ვეთანხმები არანაირი ნარკოტიკის მოხმარებას, მაგრამ რადგან მარიხუანა უფრო სუსტი მოქმედების ნარკოტიკია, შეიძლება, ალბათ, სასჯელიც ნაკლები იყოს.”
ილია მარტყოფლიშვილი: “არა, არც ვუერთდები და არც ვეთანხმები.”
თეა ჩეჩელაშვილი: “დღეს ისეთი დრო დადგა, ისედაც ბევრი დანაშაული არაოფიციალურად დეკრიმინალიზებულია. არ ვეთანხმები _ კიდევ ერთი აღვირის ახსნა აღარ უნდა ჩვენ საზოგადოებას.”
ზვიად სეხნიაშვილი: “ძალიან მძიმე თემაა. მოზარდები იოლად ეჩვევიან მარიხუანას და როცა მხოლოდ ჯარიმით დასჯა იქნება, ფულიანი მამების წყალობით იმედი ექნებათ, რომ პრობლემა არ ექნებათ. ამასობაში გაგვინადგურდება ერის საჯიშე თაობა, ჩვენი მომავალი, თორემ საციხედ რომ არ უნდა გაიმეტო ადამიანი, ეს ისედაც ვიცი. მერე ისე იქნება, როგორც ჰოლანდიაში _ ქუჩებში დაიწყებენ დაბოლებას. მეტი პრობლემა აღარაა საქართველოში? ბავშვები შიმშილით იხოცებიან _ ესაა მთავარი და არსებითი. ერი და სამშობლო მარტო პატრიარქის და ბიძინას დასაცავი არაა, ყველა უნდა დავდგეთ ურყევად. წვრილმანის დათმობაც კი უკვე ღალატია, არადა დასათმობიც აღარაფერი არ გვაქვს უკვე!”
