გურიის ვიცე-გუბერნატორი: “ხალხს ჯერ ისევ ოცნება აქვს დაპირებული სამუშაო ადგილების ნაცვლად”

გურიის ვიცე-გუბერნატორი, პაატა მანჯგალაძე “გურია ნიუსთან” აცხადებს, რომ საქმეს აკეთებენ, ოღონდ არა პომპეზურად. რაც შეეხება გუბერნიის გაცხადებულ მხარდაჭერას “ნაციონალური მოძრაობისადმი”, ამის შესახებ ჩვენი ინტერვიუდან შეიტყობთ

_ ბატონო პაატა, ბოლო პერიოდში, ქვეყანაში მნიშვნელოვანი ცვლილებები ხდება, თუნდაც თვითმმართველობის რეფორმებთან დაკავშირებით. ამ ყველაფრის გათვალისწინებით, გუბერნიის მხრიდან, არანაირი აქტივობა არ შეიმჩნევა. რჩება ისეთი შთაბეჭდილება, რომ თქვენთან ადამიანები მხოლოდ სახელფასო სარგოებისთვის არიან დასაქმებულები. რით ახსნით თქვენს პასიურობას? იმით ხომ არა, რომ გუბერნიის ინსტიტუტს მაინც გაუქმებას უპირებენ?

_ გასაგებია თქვენი კითხვის კონტექსტი, მომეწონა თქვენი შეფასება ბოლო პერიოდში, ქვეყანაში ძალიან მნიშვნელოვანი ცვლილებების თაობაზე, მაგრამ მართალი გითხრათ, თუ მოქალაქეების პოზიციიდან  შევხედავთ, რაიმე ხელშესახებ ცვლილებებზე, მით უფრო პოზიტიური კუთხით საუბარი მგონი ნაადრევია. ხალხს ჯერ ისევ ოცნება აქვს დაპირებული,  განახევრებული ტარიფებისა და  ახალი სამუშაო ადგილების ნაცვლად.

თვითმმართველობის რეფორმაც მხოლოდ კეთილი სურვილების დონეზეა და რა შეფასება უნდა გავაკეთო?
რაც შეეხება გუბერნიის საქმიანობის თქვენეულ შეფასებას, ვერც მაგაში დაგეთანხმებით. აქ ძალიან ბევრ პროფესიონალი მუშაობს და ყოველგვარი ხმაურის გარეშე კეთილსინდისიერად ასრულებს თავის მოვალეობას. პასიურობაც ახსენეთ დიახ, სამართლებრივი აქტების ზედამხედველობის ნაწილში ყველაფერი ძველებურადაა, მაგრამ რაც შეხება სამთავრობო პროგრამებისა და პროექტების მიმდინარეობის კოორდინაციას და ზედამხედველობას, სამწუხაროდ უნდა დაგეთანხმოთ, ჯერ ამ მიმართულებით სერიოზული არაფერი ხდება და თუ მხედველობაში მივიღებთ 2012 წელს, რა დროსაც 50 მილიონზე მეტი დაიხარჯა ასეთ პროექტებში, ხოლო წელს მხოლოდ 7 მილიონია გამოყოფილი. შედარებით პასიურობაც იმის შედეგია, რომ უმეტესი პროექტები ჯერ დაწყებულიც არ არის და მოდით მიზეზებს ახლა ნუ ჩავუღრმავდებით და სამთავრობო პროგრამების ოდენობისა და ვადების თაობაზე პასუხს მე ნუ მომთხოვთ.

_ რადგან წელს ნაკლებია პროექტები და დაფინანსება, ადამიანებთან გასვლა და მათი პრობლემების მოგვარება აღარ ღირს? როგორც მინიმუმ, მათთან დალაპარაკება და მათი პრობლემების მოსმენა მაინც?

_ კი აუცილებლად, გვაქვს ჩვენ მუდმივი შეხვედრები მოსახლეობასთან, მაგრამ ამას უფრო საქმიანად და ნაკლებ პომპეზურად ვაკეთებთ, თანაც ეს ხომ არ არის მათთან კომუნიკაციის ერთადერთი გზა, ისინიც დაუბრკოლებლად მოდიან ჩვენთან.  მოგეხსენებათ, გამგეობისგან განსხვავებით, ჩვენთან შესახვედრად, მათთვის არავითარი ბარიერი არ არსებობს.

_ და, გამგეობაში რა ბარიერები არსებობს?

_ ძალიან ბევრი ადამიანი მოგვმართავს, რომ საშვთა სისტემის გამო ვერ ახერხებენ ხელმძღვანელ პირებთან შეხვედრას.

_ შორიდან რომ ადევნებთ თვალს იმ მოვლენებს, რაც გამგეობასა და საკრებულოში ხდება, ეთანხმებით მათ პოლიტიკას თუ ფიქრობთ, რომ აზრი არ აქვს ჩარევას? ან თუნდაც თქვენი პოზიციის დაფიქსირებას?

_ საქართველოს კანონმდებლობით გამიჯნულია მმართველობისა და თვითმართველობის ფუნქციები. შესაბამისად, სამხარეო ადმინისტრაციას მხოლოდ კანონით განსაზღვრულ შემთხვევებში შეუძლია გაატაროს კანონით დადგენილი ღონისძიებები. ამდენად, ვიდრე არ არსებობს ის პირობები, რასაც კანონი ადგენს, არ არსებობს ჩვენი ჩარევის საჭიროებები. რაც შეეხება მოსაზრებებს ან რჩევებს მას ყოველთვის გამოვთქვამთ.

_ სამაგიეროდ, თქვენ და გუბერნატორი აქტიურად ჩანხართ იმ აქციებზე, რომელიც ვანო მერაბიშვილის მხარდასაჭერად ეწყობა. ანუ ის, რომ გუბერნიის ინსტიტუტი წინასაარჩევნოდ ჩართული არ იყო “ნაციონალური მოძრაობის“ მხარდამჭერ პოლიტიკაში, ეს მითი აღარ არსებობს?

_ საინტერესო კითხვაა და თუ ამ კითხვას კარგ ანალიზს გავუკეთებთ, ანუ მის ანალიზში შევალთ (როგორც ახლა მოდაშია ხოლმე), მისი ლოგიკით მეც შემიძლია გამოვთქვა ვარაუდი და გკითხოთ, თქვენ ბუნებით მეოცნებე ხომ არ ბრძანდებით? ეს ხუმრობით, ახლა სერიოზულად თუ მივუდგებით, მართლა ვერ ხვდები, რა საერთოა ვანო მერაბიშვილის მხარდამჭერ აქციაზე წასულ პარტიის აქტივისტებსა და გუბერნიის პოლიტიკურ ნეიტრალიტეტს შორის.

_ ეს იგივეა, ახლა მე რომ გკითხოთ, რა საერთოა ბიძინა ივანიშვილსა და “ქართულ ოცნებას” შორის-თქო. ადამიანი გულშემატკივრობს მას, ვისი იდეოლოგიაც მისთვის მისაღებია, ასე არ არის? რატომ სხვების დაკავებას არ აპროტესტებდით თქვენ და გუბერნატორი?

_ მაგალითად ვისას? იმ 200-ზე მეტი პოლიტპატიმრის ხომ არა, რომელთა სახელები მხოლოდ ოჯახის წევრებმა თუ იციან?

_ თქვენივე გუნდის წევრების საქმეები რომ ავიღოთ, არც უგულავას პროცესზე მომიკრავს თქვენთვის თვალი და არც ბაჩო ახალაიას. პარტიის გენმდივნობა იყო მთავარი კრიტერიუმი?

_ არა, რატომ? მე მაგალითად ნიკა გვარამიას სასამართლო პროცესზე ორჯერ ვიყავი და  გენმდივნობაც არ არის პატარა საქმე და თანაც პროცესი აქვე, ქუთაისში იყო.

_ პირადად თქვენს მიმართ არაერთი განცხადება გაკეთებულა ახალი ხელისუფლების წარმომადგენლების მხრიდან, ადგილობრივ თუ საკანონმდებლო დონეზე. ისინი თვლიან, რომ თქვენ ხართ მანდ “ნაციონალური მოძრაობის” იდეოლოგიის გამტარებელი. თავის სოციალურ ქსელში ოზურგეთის მაჟორიტარმა ზვიად კვაჭანტირაძემ ასეთი განცხადებაც კი გააკეთა: “გურიის ნაციონალი ვიცე-გუბერნატორი გვეხვეწება დაგვაკავეთო, დაგვიჭირეთო, გვეკითხება რატომ არ აკავებთ არავისო, რატომ არ უყენებთ ახალ ბრალდებებს ნაციონალებსო. მე მართლა დამაფიქრა ამ შეკითხვებმა!” მგონი, თქვენზეა საუბარი…

_ ბოლო 10 წლის განმავლობაში, რაც საჯარო სამსახურში ვარ, არცერთი პარტიის წევრი არ ვყოფილვარ. მაგრამ, ეს იმას არ ნიშნავს რომ ქვეყანაში მიმდინარე პროცესებზე ჩემი მოსაზრება არ მქონდა.
არც პარტიულობა მიმაჩნია მომაკვდინებელ ცოდვად პირიქით თუ ცნობილ გამოთქმას მოვიშველიებ “პური მეპურემ გამოაცხოსო,” გამოდის პოლიტიკა პოლიტიკოსმა უნდა გააკეთოს და არა ლოტბარმა, ფეხბურთელმა ანდა ჯამბაზმა.
რაც შეეხება თქვენს მიერ ნახსენებ განცხადებას, თითქოს ჩვენ მათ ჩვენსავე დაკავებას ვეხვეწებით, ეს არის მისი ავტორისგან საკითხის უტიფარი ურტრირება, რომლის მიზანი ალბათ მათი ბნელი სურვილის რეალობად ქცევის ოცნებაა. რაზეც ვიტყვი “ძაღლი ყეფს ქარავანი მიდის.”

_ არჩევნების დროს გურიაში ტრენერად იყავით მოვლინებული “ცესკოდან”, ამბობთ, რომ  აბსოლუტურად დამოუკიდებელი იყავით. ამის შემდეგ, ძალიან მალე “ნაცმოძრაობის” ასეთი ასეთი ერთგული გახდით? აქედან გამომდინარე ჩნდება ის ეჭვები, რომ მაშინაც ამ პარტიის ინტერესებს ემსახურებოდით…

_ დიდი მადლობა ამ კითხვისათვის. თქვენ ამბობთ, რომ ტრენერი ვიყავი და ჩემმა ამჟამინდელმა საქმიანობამ გააჩინა თქვენს წინა საქმიანობაზე ეჭვიო. მე მიხარია, რომ ჩემმა ახლანდელმა და არა მაშინდელმა საქმიანობამ გააჩინა ეჭვი და თანაც მხოლოდ ეჭვი, იმიტომ, რომ ბუნებაში არ არსებობს ამის დამადასტურებელი არცერთი რეალური ფაქტი.
რაც შეეხება თქვენი კითხვის მეორე ნაწილს, ვფიქრობ ჩემი ამ პარტიისადმი სიმპათია გააძლიერა ამ ბოლო დროს ქვეყანაში განვითარებულმა მოვლენებმა. ამასთან, მართლაც ძალიან მწყდება გული, რომ საქართველოში არ არსებობს ქვეყნის ინტერესების “ნაციონალურ მოძრაობაზე” უკეთ დამცველი ძალა.

_ რაც შეეხება იმ 1700 ლარს, რომელიც კონტროლის პალატაში მუშაობისას შვებულების დროს აიღეთ და ახლახანს უკან დაგაბრუნებინეს, თანხა რომ დაგერიცხათ, არ დაინტერესდით, რისი იყო? ყველა ადამიანმა იცის, რა რაოდენობის ხელფასს იღებს. თუ თვლით, რომ გეკუთვნოდათ, უკან რატომ დააბრუნეთ?

_ ჩამერიცხა თანხა და საჭიროების მიხედვით ვიღებდი სახელფასო ბარათიდან და თუ შვებულებაში გასვლის თარიღსა დ ჯილდოს მიღების ვადას შორის რაიმე უზუსტობა იყო, ყურადღება არ მიმიქცევია. შემდეგ დამირეკა საფინანსო სამსახურმა და მოხდა ხელახალი გადაანგარიშება და შვებულებაში ყოფნის პერიოდში გაცემული თანხა დავუბრუნე შესაბამისი სამსახურის სათანადო ანგარიშზე თანხის უკან გადარიცხვით.