_ სახურავი გადახადა საცხოვრებელ სახლებს, საბავშვო ბაღებს, კორპუსებს; დააზიანა ელგადამცემი ხაზები ბოძებითურთ; წააქცია მრავალწლიანი ხეები; მოსახლეობას გაუნადგურა სავარგულები; ქალაქ წალენჯიხის ცენტრში, ახლადკეთილმოწყობილ პარკში ძირფესვიანად მოგლიჯა წიწვოვანი ხეები, აყარა დეკორატიული ფილები, სანაგვე ურნები.
დაზარალებული მოსახლეობა მოინახულეს წალენჯიხის მუნიციპალიტეტის გამგებელმა გოგა გულორდავამ და რაიონის პირველმა პირებმა.
სტიქიის შედეგად დაზარალებულ მოსახლეობასთან სამეგრელო-ზემო სვანეთის გუბერნატორი თენგიზ გუნავა ჩავიდა, რასაც ადგილობრივი მოსახლეობის პროტესტი მოჰყვა. ადგილობრივი მოსახლეობის ნაწილი აცხადებს, რომ მათ პრეზიდენტის წარმომადგენლის დახმარება არ სჭირდებათ. გუბერნატორმა მათ პასუხი არ გასცა, დატოვა პარკის ტერიტორია და ბაზრის მიმდებარე ტერიტორიაზე გადავიდა, თუმცა, ხალხის გარკვეული ჯგუფი უკან გაჰყვა და “შენ რა უფლება გაქვს, აქ ჩამოხვიდე!” , “წადი, გადაშენდი!”-ის ძახილით აიძულეს გუნავა წალენჯიხა დაეტოვებინა. სიტუაციის განმუხტვისათვის შემთხვევის ადგილზე პოლიციის თანამშრომლები მივიდნენ.
სამეგრელო-ზემო სვანეთის გუბერნატორი, შემთხვევის ადგილზე მისულ სამართალდამცველებს უმოქმედებაში ადანაშაულებს: “რამდენიმე ადამიანმა გამოხატა აგრესია, იქვე იდგნენ პოლიციის მუშაკები. ვწუხვარ, რომ დღეს პოლიცია მსგავს ინციდენტებზე რეაგირებას ვერ ახდენს,” _ აცხადებს თენგიზ გუნავა.
ამჟამად ზარალის დამთვლელი მუდმივმოქმედი კომისია უკვე სწავლობს ზარალის ოდენობას და უახლოეს დღეებში გახდება ცნობილი ზარალის საერთო რაოდენობა. ამ ეტაპზე მიმდინარეობს გაწმენდითი სამუშაოები, რომელშიც ჩართულია წალენჯიხისა და ზუგდიდის სამაშველო ბრიგადები. მიმდინარეობს ელგადამცემი ხაზების აღდგენა, მოსახლეობას ურიგდება ბრეზენტი.
სტიქიამ წალენჯიხის მუნიციპალიტეტს ზარალი რამდენიმე დღის წინაც მიაყენა _ 29 მაისს, დაახლოებით 4 საათზე, ამინდის მკვეთრ გაუარესებას მოჰყვა ჭექა-ქუხილი, რამაც ხოკოს ტერიტორიიდან 27 კილომეტრის დაშორებით თეკანათის სუბალპურ საძოვრებზე მყოფი პირუტყვი დააფრთხო. პირუტყვმა იქვე მდგარ წიფლის ხეს შეაფარა თავი. ხეზე მეხის დაცემის შედეგად ადგილზე დაიხოცა 40 თხა და დაშავდა _ 5. კლდოვანი ქანების არსებობის გამო პირუტყვის დამარხვა ვერ მოხერხდა, რის გამოც მოხდა მათი განადგურება _ დაწვა.
