(გურია ნიუსი, ჩოხატაური) _ ამ ბოლო დროს, ჩოხატაურში მაწანწალა ძაღლების რიცხვმა იმატა, რაც სერიოზულ საფრთხეს უქმნის ადგილობრივ მოსახლეობას. ტელეფონით ერთ-ერთი მაღაზიის აღშფოთებული მფლობელი დაგვიკავშირდა და დახმარება გვთხოვა: _ საღამოს საათებში მაღაზიაში ვერავინ შემოდის, ვერც გარეთ გავდივარ მაწანწალა ძაღლების მომრავლების გამო. ორი დღის წინ ქუჩაში პატარა ბავშვი დაკბინა. იქნებ, რამე გვიშველოთ და გაარკვიოთ, რას ფიქრობს ხელისუფლება ამ საკითხთან დაკავშირებით, _ წუხდა ქალბატონი.
ჩვენ დავუკავშირდით რეგიონის კომუნალური მომსახურების ცენტრის წარმომადგენელს გოგი მაღლაფერიძეს: _ მე ნურაფერს დამაბრალებთ, როგორც კი ხელშეკრულებას გამიფორმებენ, მდგომარეობა იმ დღიდან მოწესრიგდება, _ ამბობს იგი.
შემდეგ უშუალოდ ხელშეეკრულების გაფორმებაზე პასუხისმგებელ პირს, მუნიციპალიტეტის გამგებელს, გია გიორგაძეს მივმართეთ, რომელმაც გვიპასუხა, რომ ხელშეკრულება გაფორმდება და პრობლემაც 2 დღეში მოგვარდება. როგორც წესი, “პრობლემის მოგვარებაში” უპატრონო ძაღლების ლიკვიდაცია იგულისხმება, თუმცა, არავინ აქცევს ყურადღებას, რომ ცხოველებს, მათ შორის პატრონებისგან მიტოვებულ ძაღლებსაც, საერთაშორისო კონვენციები იცავს. ქვეყანაში, სადაც ადამიანთა უფლებების დარღვევა არც თუ იშვიათად ხდება, ძაღლების უფლებებზე საუბარი ბევრს აღიზიანებს, მაგრამ მაწანწალა ძაღლების მომრავლებაც ხომ ჩვენი _ მათი პატრონების ბრალია და არა თავად ცხოველების! ამ პრობლემის საუკეთესო გადაწყვეტა იქნება, თუ ოთხფეხა მეგობრებს არ მოვიძულებთ, უპატრონოდ არ გადავაგდებთ, თანამოქალაქეებსაც დამშეული ცხოველებისგან დასაკბენად არ გავიმეტებთ; ხოლო ხელისუფლება დემოკრატიულ ღირებულებებზე საუბრის გარდა, კონკრეტული საქმითაც დაკავდება და სისხლიანი სასაკლაოს მოწყობის ნაცვლად, პრობლემას ისე მოაგვარებს, როგორც ეს ცივილიზებულ ქვეყნებშია მიღებული.
