პარლამენტის დროებით საგამოძიებო კომისიას კი, რომლის ხელმძღვანელიც საპარლამენტო უმრავლესობის წევრი, ნოდარ ებანოიძე გახლავთ, მიაჩნია, რომ მასალები იმდენად სერიოზულია, მათი შესწავლით პროკურატურა უნდა დაინტერესდეს:
“კომისია თვლის, რომ სახელმწიფო აუდიტის სამსახურის 2012 წლის საქმიანობა, დასკვნაში ასახული აუდიტის სამსახურის საქმიანობის ყველა მიმართულების გათვალისწინებით, უნდა შეფასდეს უარყოფითად.
კომისიის დასკვნა და შესაბამისი დანართები, დასკვნაში ასახული კანონდარღვევების სამართლებრივი შეფასების მიზნით, უფლებამოსილების მიხედვით განხილვისა და რეაგირებისთვის, წარედგინოს საქართველოს მთავარ პროკურატურას”. _ ვკითხულობთ წარმოდგენილ ანგარიშში.
ფაქტები კი, რომელმაც ლევან ბეჟაშვილის აღშფოთება გამოიწვია და “ბოდვად” მოიხსენია, ასე გამოიყურება. აქვე შეგახსენებთ, რომ ეს მხოლოდ მცირე ჩამონათვალია იმ ანგარიშიდან, რომელიც საპარლამენტო კომისიამ წარმოადგინა.
ლევან ბეჟაშვილის “შავი საპრემიო ფონდი” დამალული სამუშაო ადგილების ხარჯზე
როგორ ხდებოდა დასაქმების პრობლემის წინაშე მდგარ საქართველოში შტატების გადამალვა და ამის ხარჯზე პრემიების გაცემა, პარლამენტის წინაშე წარდგენილ ანგარიშში ვკითხულობთ:
“წლების მანძილზე, მათ შორის 2012 წელს, კონტროლის პალატა საქართველოს პარლამენტისგან ითხოვდა და იღებდა პრაქტიკულად 2-ჯერ გაზრდილ საშტატო რიცხოვნობას და მის შესატყვის დაფინანსებას, რითაც საბიუჯეტო კლასიფიკაციის შესაბამის მუხლებში ხელოვნურად ქმნიდა საბიუჯეტო თანხების ეკონომიას, რასაც ასევე მრავლობითი კანონდარღვევით, ყოველგვარი დასაბუთებისა და ობიექტური საფუძვლების გარეშე, რეალურად 350-400 შტატზე გათვლილ დაფინანსებას ფაქტობრივად ხარჯავდა საშუალოდ 200-220 პირით დაკომპლექტებულ სამსახურზე;
ამ ფონზე, პრაქტიკულად 40-50%-იანი ვაკანტური ადგილების პირობებში, არ ჯერდებოდა ყოველი წლის სახელმწიფო ბიუჯეტის კანონით კუთვნილ 7-8 შტატგარეშე მოსამსახურეს და ითხოვდა საქართველოს მთავრობისგან ნებართვას და მათ რაოდენობას ასევე ყოველგვარი დასაბუთების, საჭიროებისა და გათვლების გარეშე ზრდიდა 50 მოსამსახურემდე;
იმ საქმიანობისთვის, რომელიც წესით შტატში მყოფ მოსამსახურეებს, კერძოდ, ხელმძღვანელ თანამდებობის პირებს უნდა განეხორციელებინათ, შტატგარეშე მოსამსახურეებს, ყოველგვარი რეალური საქმიანობის განხორციელებისა და მინიმალური დატვირთვის გარეშე, უნიშნავდა მათ ყოველთვიურ შრომის ანაზღაურებას, რომელიც რიგ შემთხვევებში აღემატებოდა ქვეყნის მინისტრისთვის გათვალისწინებულ სარგოს – თვეში 3 540 ლარს.”
ირენა მელუა _ ლევან ბეჟაშვილის თანაშემწე მინისტრის ხელფასზე ორჯერ მეტი პრემიით
განსაკუთრებით საინტერესოა ლევან ბეჟაშვილის თანაშემწის, ადმინისტრაციის ყოფილი უფროსის, ირენა მელუას ჯილდოები და პრემიები, რომელიც მას დანიშვნიდან სამ დღეშიც კი აქვს მიღებული.
ვინ არის კონტროლის პალატის თანამშრომელი ირენა მელუა? ლევან ბეჟაშვილის თანაშემწე, 2005 წელს, როდესაც გიგა ბოკერია იურიდიული კომიტეტის თავმჯდომარის მოადგილე იყო, აღნიშნული კომიტეტის აპარატის თანამშრომელი გახლდათ.
მოგვიანებით, ის კონტროლის პალატაში ბეჟაშვილის თანაშემწე იყო, რომელიც თავმჯდომარეს თითქმის ყველა მივლინებაში თან ახლდა.
“გურია ნიუსის” ინფორმაციით, მან ბეჟაშვილს დიდი დახმარება გაუწია კახეთშიც, როდესაც ბეჟაშვილი მაჟორიტარის რანგში წინასაარჩევნო კამპანიას აწარმოებდა.
ირენა მელუა – ზემოაღნიშნული კაბინეტის უფროსად დაინიშნა 26.03.2010 წელს. გენერალური აუდიტორის 18 ივლისის N1/132 ბრძანებით განთავისუფლდა ამ თანამდებობიდან და დაინიშნა ადმინისტრაციული დეპარტამენტის უფროსად, ხოლო გენერალური აუდიტორის N1/219 ბრძანებით 1 ნოემბრიდან მუშაობდა ადგილობრივი თვითმმართველობის ერთეულების ბიუჯეტების აუდიტის
არაფრით გამორჩეული საქმიანობის მიუხედავად, 2012 წლის განმავლობაში, სარგოს სახით მას დარიცხული ჰქონდა 26 800 ლარი, ხოლო პრემიის სახით – 30 000 ლარი, ანუ სარგოზე 3 200 ლარით მეტი.
როგორც საპარლამენტო კომისიის ანგარიშშია წარმოდგენილი, “ივლისის თვეში, სარგოს გარდა, პრემიის სახით, ლევან ბეჟაშვილის 2 ბრძანებით – 2012 წლის 11 ივლისის N107/37 და 2012 წლის 20 ივლისის N127/37, ანუ ცხრადღიანი შუალედით, ერთი და იგივე ფორმულირებით – სამსახურებრივი მოვალეობის სანიმუშო შესრულებისათვის, ირენა მელუამ მიიღო ერთდროული ფულადი ჯილდო როგორც გენერალური აუდიტორის კაბინეტის უფროსმა 2500 ლარის და დანიშვნიდან 2 დღეში, როგორც ადმინისტრაციული დეპარტამენტის უფროსმა, 3750 ლარის ოდენობით, ჯამში 6250 ლარი. ხაზგასმითაა აღსანიშნავი, რომ ივლისის თვეში ოფიციალურ დოკუმენტებში ირენა მელუას გვარი მხოლოდ ერთ დოკუმენტში ფიგურირებს, ისიც 20 ივლისიდან შვებულებაში გასვლაზე”.
ირენა მელუას სამსახურებრივი მოვალეობის სანიმუშო შესრულებისათვის, წახალისების სახით ერთდროული ფულადი ჯილდო თვეების მიხედვით დარიცხული აქვს: იანვარში, თებერვალში, აპრილსა და მაისში – 2200 – 2200 ლარი, მარტში – 3500 ლარი, ივნისში – 3300 ლარი, ივლისში – 6250 ლარი, აგვისტოსა და სექტემბერში – 2500 ლარი, ოქტომბერში – 1250 ლარი, ნოემბერში – 0 და დეკემბერში – 1900 ლარი. საყურადღებოა, რომ საქართველოს მინისტრის ოფიციალური სარგო თვეში 3 540 ლარს შეადგენს.
ნათია მოგელაძის სამსახურის პრემიები
კომისიის მიერ შესწავლილი მასალებით ირკვევა, რომ მაისში, პოლიტიკური პარტიების მონიტორინგის სამსახურის ყველა თანამშრომელმა პრემია მიიღო ხელფასის 100%-ის ოდენობით, სულ 25025 ლარი.
ნათია მოგელაძემ, პოლიტიკური პარტიების მონიტორინგის სამსახურის უფროსმა – 2500 ლარი; გიორგი ამირანაშვილმა, სამსახურის უფროსის მოადგილემ – 2200 ლარი; ლევან მერაბიშვილმა, კონსულტანტმა – 700 ლარი; მინდია ჯორთმენაძემ, ექსპერტ-ანალიტიკოსმა – 1500 ლარი; მამუკა ფიფიამ, ექსპერტ-ანალიტიკოსმა – 1500 ლარი; ანნა ქორიძემ, ექსპერტ-ანალიტიკოსმა – 1500 ლარი; თენგიზ გეწაძემ, ექსპერტ-ანალიტიკოსმა – 1500 ლარი; თეიმურაზ ნაჭყებიამ, ექსპერტ-ანალიტიკოსმა – 1500 ლარი, პაატა ბურდულმა, ექსპერტ -ანალიტიკოსმა – 1500 ლარი; გაგა ჩარქსელიანმა, ექსპერტ-ანალიტიკოსმა – 1500 ლარი; მამუკა ხორგუანმა, ექსპერტ-ანალიტიკოსმა – 1500 ლარი; კახა საჯაიამ, ექსპერტ-ანალიტიკოსმა – 1500 ლარი; ლაშა კვირკვაიამ, ექსპერტ-ანალიტიკოსმა – 1500 ლარი; პაატა კუბლაშვილმა, ექსპერტ-ანალიტიკოსმა – 1500 ლარი; ემზარ ღარიბაშვილმა, ექსპერტ-ანალიტიკოსმა – 1500 ლარი; ვენერა ქოიავამ, მთავარმა კონსულტანტმა – 925 ლარი; ირინა ლომსაძემ, სპეციალისტმა – 700 ლარი.
საერთო ჯამში, ეს არის 14850 ლარით, ანუ 146%-ით მეტი კონტროლის პალატის ყველა, 88 აუდიტორიდან 11-ის მიერ ერთად აღებულ პრემიასთან შედარებით.
პარლამენტარ მარიამ საჯაიას დედა ბეჟაშვილის პრივილეგირებულ–პრემირებულთა სიაში
2012 წლის მაისში, ადგილობრივი თვითმმართველობის ბიუჯეტების აუდიტის დეპარტამენტის აპარატის უფროსმა ნაზი არონიამ, რომელიც საპარლამენტო უმცირესობის წევრის, პარლამენტარ მარიამ საჯაიას დედა გახლავთ, პრემიის სახით მიიღო 2200 ლარი, რაც თითქმის 3-ჯერ აღემატება ამავე დეპარტამენტის 30 თანამშრომლის მიერ მიღებულ პრემიას, მაშინ როცა, დეპარტამენტის უფროსის მოვალეობის შემსრულებელსა და არცერთს, დანარჩენი 11 სპეციალისტიდან, პრემია არ მიუღია, ხოლო 19 აუდიტორს შორის, მხოლოდ ერთმა, უფროსმა აუდიტორმა მიიღო 850 ლარის ოდენობით.
ნაზი არონიას საანგარიშო პერიოდში სარგოს სახით დარიცხული ჰქონდა 26 400 ლარი, ფულადი ჯილდოს სახით 18 900 ლარი. რაც შეეხება საანგარიშო პერიოდში მის მიერ შესრულებულ სამუშაოს, 2012 წლის განმავლობაში ნაზი არონიას სახელზე ფიქსირდება სულ 3 დოკუმენტი. აქედან 1 დოკუმენტი დაეწერა 2012 წლის 1 მაისს და წარმოადგენდა ინფორმაციას მცხეთის მუნიციპალიტეტის მიერ 1 კვარტალში ბიუჯეტის შესრულების შესახებ. მეორე დოკუმენტით მის მიერ გაცემულია დახასიათება პარლამენტში სტაჟირების გავლასთან დაკავშირებით და მესამე დოკუმენტი არის მისი განცხადება კუთვნილი შვებულების შესახებ.
მიუხედავად იმისა, რომ როგორც ზემოთ აღინიშნა, პირველი დოკუმენტი მას მხოლოდ 2012 წლის 1 მაისს დაეწერა, ნაზი არონიას, სამსახურებრივ მოვალეობათა სანიმუშოდ შესრულებისთვის ფულადი ჯილდოს სახით მარტის თვეში, დარიცხული აქვს 4600 ლარი, ხოლო აპრილის თვეში 2200 ლარი, ასევე მაისის თვეშიც 2200 ლარი. ხაზგასმითაა აღსანიშნავი შემდეგი გარემოება: 2012 წლის 11 ივლისს გამოიცა გენერალური აუდიტორის N2/051 ბრძანება, ნაზი არონიასთვის მიმდინარე წლის 16 ივლისიდან 15 აგვისტომდე 2012 წლის კუთვნილი ანაზღაურებადი შვებულების – 30 კალენდარული დღის მიცემის შესახებ. 2012 წლის 20 ივლისს, მიუხედავად იმისა, რომ ნაზი არონია იმყოფებოდა კუთვნილ შვებულებაში და შეჩერებული ქონდა სამსახურებრივი ურთიერთობა, გამოიცა გენერალური აუდიტორის (ლ. ბეჟაშვილის) ბრძანება N127/37, სამსახურებრივი მოვალეობის სანიმუშო შესრულებისათვის, ნაზი არონიაზე ერთდროული ფულადი ჯილდოს სახით 2200 ლარის გაცემის შესახებ. გარდა ამისა, ნაზი არონიას ბინის დაქირავება 2012 წელს სახელმწიფოს დაუჯდა 4500 ლარი.
საპარლამენტო კომისიის ჯგუფის ხელმძღვანელი ნოდარ ებანოიძე “გურია ნიუსთან” აცხადებს, რომ სახელმწიფო აუდიტის სამსახური მთელი ამ წლების განმავლობაში სრულიად მმართველი პოლიტიკური ძალის დაკვეთებს ასრულებდა, რის გამოც სამსახურმა ფუნქცია სრულიად დაკარგა. დროებითი საგამოძიებო კომისიის თავმჯდომარე ფიქრობს რომ ანგარიშის მომზადებისას ბევრი ისეთი საკითხი გამოიკვეთა რაზეც გამოიძიება აუცილებლად უნდა დაიწყოს.
