ზურაბ ჭანტურია: _ წლების წინ შევიძინე ფერმის შენობა. მივდევ მესაქონლეობას, ჩვენი ოჯახის ერთადერთი შემოსავალი სწორედ ესაა. ფერმის მიმდებარე ტერიტორიის მიწა ხალხმა საყანედ გამოიყენა. ასე რომ, სულ პატარა მიწაზე დგას შენობა და ხშირად საქონელი აბიბინებულ ბალახს რომ ხედავს, არღვევს ღობეს და გადადის ყანებში, რაც არა ერთხელ გამხდარა დავის საგანი ჩემსა და იმ ყანების პატრონებს შორის. შაბათ საღამოს მე და ჩემმა მეუღლემ საქონელი დავაბინავეთ. კვირას დილით კი ფერმის ეზოში შესასვლელ კარებთან კამეჩის თავი დაგვხვდა, საქონლის ტანი კი ფერმაში იყო დაგდებული. დავრეკეთ პოლიციაში. პოლიცია მალევე მოვიდა, მეუღლე ერთ პოლიციელთან ერთად ადგილზე დარჩა, მე კი განყოფილებაში წამიყვანეს ჩვენების მისაცემად. პოლიციის უფროსიც გამესაუბრა. ამ დროს ფერმაში ვეტექიმი მიუყვანიათ, შეუმოწმებიათ საქონელი რითია მკვდარი, ხორცის ვარგისიანობაც შეამოწმეს და შეაფასეს კიდეც 500 ლარად. ზაქი იყო, ერთი წლის კამეჩი. პირუტყვის ტანი დავმარხეთ, რადგან სიცხის გამო ხორცი უვარგისი აღმოჩნდა, თავი კი მაქვს შენახული.
_ პოლიციაში რა გითხრეს?
_ საქმე აღიძრა და მოკვლევას ჩავატარებთო.
_ ბატონო ზურაბ, თუ ეს ქურდობის მიზნით გააკეთა ვინმემ, რატომ არ წაიღო დაკლული საქონელი?
-_ არ მგონია ეს ქურდის ნახელავი იყოს, დარწმუნებულიც ვარ.
_ ეჭვი გაქვთ ვინმეზე?
_ რამდენიმე დღის წინ ერთმა ადამიანმა მითხრა, საქონელს მოგიკლავენო, გამაფრთხილა. ხომ გითხარით, იყო შემთხვევები, საქონელმა გაარღვია ღობე და გადავიდა ყანებში. კონკრეტული გვარებიც დამისახელა, მაგრამ ამ ეტაპზე თავს შევიკავებ გამჟღავნებისგან. ამიტომაც ვფიქრობ, რომ ეს გაფრთხილება იყო, ან დაშინება, ან შურისძიება საქონელზე გათელილი ყანის გამო.
_ პოლიციაში თუ დაუსახელეთ ეს გვარები?
_ კი, რა თქმა უნდა, ყველაფერი ჩაიწერეს და ძიება დაწყებულიაო, მითხრეს, მაგრამ ჯერ პასუხი არ ჩანს.
_ ჯერ სულ ორი დღეა გასული შემთხვევიდან. ბატონო ზურაბ, თუ პოლიციაში საქმე აღიძრა, ჩვენთან რატომ მობრძანდით, რით შემიძლია დაგეხმაროთ?
_ მინდა ეს ყველაფერი გაჟღერდეს. რა ვიცი, კი მითხრეს ძიება დაწყებულიაო, მაგრამ ნამდვილად არის დაწყებული? და თან მინდა გითხრათ _ შაბათ საღამომდე ველოდები პასუხს, მერე ავიღებ ფერმის საბუთებს, დავწერ წერილს და წავალ ბიძინა ივანიშვილის რეზიდენციასთან. ამ ადამიანის გარდა არავისი აღარ მჯერა და მინდა ვკითხო _ ხომ ამბობს ახალი მთავრობა, სოფლის მეურნეობას ვუწყობთ ხელსო? რა გავაკეთო, თუ მიწა არ მექნება, მარტო ფერმის შენობაში საქონელი როგორ მოვამრავლო? რა ვქნათ მე და ჩემნაირებმა? რაღაც კანონი ხომ უნდა იყოს, რომ შევძლოთ მეურნეობის გაფართოება? იმედი მაქვს, რეაგირების გარეშე არ დატოვებთ ჩემს გასაჭირს. შეიძლება ვინმეს გაეცინოს ამაზე, მაგრამ რა ვქნა, ოჯახი მყავს, ავადმყოფი მამა, შვილები და მესაქონლეობაა ჩემი ოჯახის ერთადერთი შემოსავალია.
ზურაბ ჭანტურიასთან საუბრის შემდეგ აბაშის პოლიციაში მივედით, სადაც ჩვეული პასუხით გამოგვისტუმრეს _ “მიმართეთ პრეს-ცენტრს.”
“გურია ნიუსმა” საკუთარი წყაროების საშუალებით გაარკვია, რომ პოლიციაში საქმე აღიძრა 259-ე მუხლის პირველი ნაწილით, რაც გულისხმობს “პირუტყვზე განსაკუთრებული სისასტიკით მოპყრობას”. ამჟამად მიმდინარეობს ინტენსიური გამოძიება.
