კომისიის თავმჯდომარის, თინა ხიდაშელის განცხადებით, ძალიან ბევრი საკითხი დგას დღის წესრიგში, თუმცა, ყველაზე მნიშვნელოვანი სარეკლამო ბაზარი, ინტერესთა კონფლიქტი და კომპანიებისთვის გადასახადების დაწესებაა, რომელიც, შესაძლოა, არაკანონიერად, არათანაბარ პირობებში ხდებოდა. კომისია ასევე შეისწავლის კომუნიკაციების ეროვნული კომისიის წევრების საქმიანობებსაც.
ხიდაშელის განცხადებით, ყველაზე მეტად ჩანს ირაკლი ჩიქოვანის ინტერესთა კონფლიქტი, ვინაიდან ყველასთვის კარგად არის ცნობილი მისი წილების შესახებ სარეკლამო კომპანიებში.
“ჩვენ რამდენიმე მიმართულებით ვმუშაობთ. რაც დავალებული გვაქვს, ეს არის კომისიის წევრების საქმიანობის შესწავლა _ დაწყებული ინტერესთა კონფლიქტიდან, დამთავრებული, გადაწყვეტილებების კანონიერების შემოწმებით. ერთ-ერთი დიდი თემა, რომელზეც ახლა ჩვენ ვმუშაობთ, არის სარეკლამო ბაზარი და როგორ არეგულირებდა ამ საკითხს კომისია. აქ ჩანს ყველაზე მეტად ბატონი ირაკლი ჩიქოვანის ინტერესთა კონფლიქტი, ვინაიდან ცნობილია მისი წილების შესახებ სარეკლამო კომპანიაში. ამასთანავე, კანონის პირდაპირი მოთხოვნაა, რომ ინტერესთა კონფლიქტი დგინდება არა მხოლოდ პირდაპირი, არამედ არაპირდაპირი ინტერესების პირობებშიც. ასეთი არაპირდაპირი ინტერესი იკვეთება მასსა და “რუსთავი 2”-ის დირექტორის გეგეშიძესთან მიმართებაში _ პრაქტიკულად, ყველა ბიზნესში, რომელიც მედიას უკავშირდება, ისინი პარტნიორები არიან. ამასთანავე, არის პრობლემები პორტირების ნაწილში _ ჩვენ ამასაც ვიკვლევთ. მოსაკვლევია ის საკითხი, კანონზომიერად ხდებოდა თუ არა კომპანიებისთვის გადასახადების დაწესება, თუ ეს იყო რაღაც დახარკვა და დამატებითი ფულის ამოღება მობილური ოპერატორებისგან. ასევე, კვლევის საგანია არათანაბრობა, როდესაც სახელმწიფო ბიუჯეტიდან ხდებოდა თანხების გამოყოფა სხვადასხვა ტელევიზიებისთვის, სხვადასხვა ფორმით _ რიგ შემთხვევებში ეს იყო რეკლამით, რიგ შემთხვევაში _ გადაცემების პირდაპირი დაფინანსებით და სპონსორობით. ჯერ პირველად სამუშაოებს ვატარებთ და ივლისიდან დავიწყებთ საჯარო სხდომებს და არა ექსპერტების მოსმენას, არამედ იმ პირების მოსმენას საგამოძიებო რეჟიმში, რომელთაც ეხებათ ეს საკითხი,” _ განაცხადა დროებითი საგამოძიებო კომისიის თავმჯდომარემ თინა ხიდაშელმა.
საპარლამენტო უმცირესობის წევრის ლევან ბეჟაშვილის განცხადებით, კვლევის დასრულებამდე რთულია შედეგებზე საუბარი, თუმცა, ამ დროისთვის ის კვლევა, რომელიც “საერთაშორისო გამჭვირვალობამ” წარმოადგინა ჩიქოვანის მიმართ, გარკვეულ კითხვებს აჩენს.
“კომისიის დღევანდელ სხდომაზე მოვისმინეთ “საერთაშორისო გამჭვირვალობის” მოხსენება, რომელიც ეხება 2011 წლამდე პერიოდს. შემდგომ გარკვეული წყვეტა არის მონიტროგინგში. ჩვენ კომისიას ექნება საშუალება, გავაგრძელოთ შესწავლა და უფრო მეტი ინფორმაცია მივიღოთ ამასთან დაკავშირებით _ ჰქონდა თუა არა ბატონ ჩიქოვანს ინტერესთა კონფლიქტი და ასე შემდეგ. ჯერჯერობით ვართ ინფორმაციის მიღების და დამუშავების პროცესში, რაც შემდგომში მოგვცემს საშუალებას ჩავატაროთ კვალიფიციური ანგარიში და დავადგინოთ არსებობდა თუ არა ინტერესთა კონფლიქტი მის საქმიანობაში. ის ინფორმაცია, რომელიც არასამთავრობო ორგანიზაციებმა წარმოადგინეს, გარკვეულ კითხვის ნიშნებს სვამს. არსებობს ვარაუდი ან ეჭვი, მაგრამ საბოლოო გადაწყვეტილება უნდა მივიღოთ მას შემდეგ, რაც საბოლოო შედეგები დაიდება”, _ განაცხადა ლევან ბეჟაშვილმა “კომუნიკაციების მარეგულირებელი ეროვნული კომისიის” საქმიანობის შესახებ.
