პოპიაშვილი სამხატვრო აკადემიის აკადემიური საბჭოს 2012 წლის 13 ნოემბრის იმ სხდომის ოქმის ბათილად ცნობას მოითხოვდა, რის საფუძველზეც მას რექტორის თანამდებობა დაატოვებინეს.
აღნიშნულ სარჩელთან ერთად სასამართლომ განიხილა მოპასუხე ა(ა)იპ თბილისის აპ. ქუთათელაძის სახელობის სახელმწიფო სამხატვრო აკადემიის მიერ წარმოდგენილი შეგებებული სარჩელი, რომლითაც სამხატვრო აკადემია ითხოვდა 2012 წლის 09 აგვისტოს ჩატარებული, თსსა რექტორის თანამდებობის დასაკავებელი არჩევნების ბათილად ცნობას.
სამხატვრო აკადემიამ, როგორც მოპასუხემ, არ ცნო მოსარჩელე ირინა პოპიაშვილის სარჩელი, ხოლო, თავის მხრივ, ირინა პოპიაშვილმა, როგორც შეგებებულ სარჩელში მოპასუხემ, არ ცნო სამხატვრო აკადემიის შეგებებული სარჩელი.
სასამართლომ დააკმაყოფილა სამხატვრო აკადემიის შეგებებული სარჩელი და დაადგინა, რომ ირინა პოპიაშვილის სამხატვრო აკადემიის რექტორად არჩევისას, სამხატვრო აკადემიის აკადემიური საბჭოს წევრების ნება თავისუფლად არ ყოფილა გამოხატული, დადგინდა მათ მიმართ ხანგრძლივი დროის განმავლობაში, მესამე პირის მხრიდან აშკარა, დაუფარავი ზეწოლისა და მუქარის ფაქტი, რამაც განსაზღვრა აკადემიური საბჭოს ასეთი არჩევანი. ამასთან, სასამართლო, სამხატვრო აკადემიის აკადემიური საბჭოს მიერ აკადემიის რექტორის _ ირინა პოპიაშვილის უფლებამოსილების შეწყვეტის საკითხის განხილვისას დაეყრდნო “მეწარმეთა შესახებ” საქართველოს კანონის ნორმებს, “საქართველოს სამოქალაქო კოდექსის” 35-ე მუხლის მე-4 ნაწილის დანაწესის შესაბამისად და არა “საქართველოს შრომის კოდექსის” ნორმებს.
აკადემიურმა საბჭომ, ირინა პოპიაშვილის რექტორის თანამდებობიდან გათავისუფლებისას, ირინა პოპიაშვილის ქმედებები შეაფასა რექტორზე დაკისრებული მოვალეობების არასათანადო შესრულებად, რაც დაედო საფუძვლად მისი უფლებამოსილების შეწყვეტას.
