ოზურგეთის მუნიციპალიტეტის სოფელ ბაღდადში (ცხემლისხიდის თემი) მცხოვრები ჟენია ცეცხლაძე, რომელმაც ოზურგეთის საავადმყოფოში რამდენიმე დღის წინ გაიკეთა საკმაოდ რთული ოპერაცია (ამოკვეთეს ნაღვლის ბუშტი), თავს მხნედ გრძნობს და ორ დღეში, როგორც ექიმები გვეუბნებიან, უკვე საავადმყოფოდან შინ გაწერენ.
_ უეცარი შეტევა მომცა, ყველაფერი მტკიოდა, ვერ მივხვდი, რის ბრალი იყო. სასწრაფოდ გადმომიყვანეს საავადმყოფოში და ღმერთმა ამათ უშველოთ, გადამარჩინეს. ექიმმა ტიტე მგელაძემ გამიკეთა ოპერაცია. ორ დღეში სახლში წავალ, _ გვეუბნება ჟენია ბებო და ფოტოს გადაღებზე გვთანხმდება, თან მორიდებული ღიმილით ხუმრობს, ძალიან ვერ გავიცინებ, ყველა კბილი ჯერ არ ამომსვლიაო.
სიმპათიური, ფუმფულა, სასიამოვნოდ მოსაუბრე ქალბატონი, იმდენად კარგად გამოიყურება, რომ მნახველი შეეჭვდება, საუკუნე თუ კარგა ხნის წინ მოიტოვა უკან.
კითხვაზე ნამდვილად 108 წლის არის თუ არა, კვლავ იღიმება:
_ კარგად კი არ მახსოვს ჩემი დაბადების წელი, მაგრამ პასპორტი აგერ არის, ნახეთ, 1911 წლის 5 მაისს რომ ვარ დაბადებული, წერია პირადობის მოწმობაში.
_ ცოტა რაიმეს თუ გვიამბობთ თქვენი ბიოგრაფიიდან?
_ ცოტა გვიან კი დავქორწინდი. ნინიძის ქალი ვარ. მეუღლე ადრე გარდამეცვალა. მერე ერთადერთი შვილიც მომიკვდა… და 40 წლის შვილიშვილი. ბევრი სიმწარეც ვნახე. დიდხანს სიცოცხლემ ესეც იცის. ძალიან მიჭირს საუბარი. ორი შვილიშვილი მყავს და ოთხი შვილთაშვილი, ძალიან მივლიან.
_ პენსიის გარდა, რამე დახმარება თუ გაქვთ სახელმწიფოსგან?
_ ერთხელ სამასი ლარი მომცეს. მეტი არაფერი.
_ საახალწლოდ ან სარვამარტოდ ხელისუფლებისგან თუ იღებთ მოლოცვას?
_ არა, მაგრამ მთავრობამ რა იცის? სოფელში ხომ აქვთ ჩემი მონაცემები. აქედან თუ არ უთხრა ვინმემ, იქ რა იციან. ყველა კარგად იყოს. რა ვქნა…
_ ქალბატონო ჟენია, საახალწლოდ აუცილებლად გესტუმრებით, ჩვენს ქვეყანას დამდეგი წლის მილოცვა თქვენგან განსაკუთრებით დაშვენდება.
_ აუცილებლად, ნენა, თუ მივაღწიე, კი, თუ არადა, ახლა მიულოცეთ, _ თბილ სიტყვებს თბილი ღიმილი მოაყოლა და ხელიც დაქნევით დაგვემშვიდობა.
ოზურგეთის მუნიციპალიტეტის საკრებულოს წევრი სოფელ ცხემლისხიდიდან, ქალბატონი ლალი სიჭინავა, „გურია ნიუსთან“ ამბობს, რომ როგორც ხანდაზმულ პენსიონერს, ქალბატონ ჟენია ცეცხლაძეს , კანონის თანახმად, წელიწადში ერთხელ 300 ლარის ოდენობით ეძლევა დახმარება.
_ როდის გაიკეთა ოპერაცია არ გაგვაგებინეს, თუმცა, როცა მოვიდა მისი ოჯახის წევრი, მომზადდა შუამდგომლობა ჩვენგან და მუნიციპალიტეტის მერიიისგან, ქალბატონ ჟენია ცეცხლაძეს ჩაერიცხება 500 ლარი პირად ანგარიშზე, _ გვითხრა ოზურგეთის მუნიციპალიტეტის მერის წარმომადგენელმა სოფელ ცხემლისხიდში შოთა მახარაძემ.
