რომ ჩოხატაურის მუნიციპალიტეტის სპორტის განვითარების ცენტრის და სპორტული სკოლის თანამშრომლებმა, ჩოხატაურში, მდინარე სუფსის პირას ხელჩართული ჩხუბი გამართეს. ინციდენტის მონაწილენი მას შემდეგ დაიშალნენ, რაც მიმდებარე ტერიტორიაზე, რომელიც ცენტრალური გზიდანაც კარგად ჩანს, "გურია ნიუსის" კამერა დაინახეს.
ჩვენს მიერ ინციდენტის ფაქტის დაფიქსირების მცდელობას მუქარის შემცველი სატელეფონო ზარები მოჰყვა _ სპორტული სკოლის მთავარი სპეციალისტი, "ქართული ოცნების" ერთ-ერთი აქტიური სახე გია ნინიძე ტელეფონით დაგვიკავშირდა და "რჩევა-დარიგება" არ დაიშურა:
_ იქ აღმოჩნდით, სადაც არ უნდა ყოფილიყავით. შვილების პატრონი ხართ და არ დაგავიწყდეთ, რომ ჩვენც შეგვიძლია რაღაცეები გადავიღოთ, _ ასეთი იყო ნინიძის მუქარის შინაარსი.
სატელეფონო შეტყობინების დროს გვითხრეს, რომ, რომ ე.წ. "რაზბორკას" სპორტის განვითარების ცენტრის ხელმძღვანელი ზურაბ ჯინჭარაძე და სპორტული სკოლის დირექტორი, გოჩა ჯიქიაც ესწრებოდნენ. ჯიქია რესპუბლიკური პარტიის წევრია, არჩევნების დროს "ქართული ოცნების" საარჩევნო შტაბს ხელმძღვანელობდა იყო და ჩოხატაურში კოალიციის ერთ-ერთ ლიდერად მოიაზრება.
გოჩა ჯიქიას თქმით, ინციდენტი ჩხუბამდე არ მისულა და მხოლოდ შელაპარაკება იყო: _ არავითარი ხელჩართული ჩხუბი არ ყოფილა. მხოლოდ შელაპარაკება იყო ნასვამ ადამიანებს შორის.
_ ეს ინციდენტი სამუშაო საათებში მოხდა… რატომ იყვნენ თქვენი თანამშრომლები ნასვამ მდგომარეობაში? მით უმეტეს, თქვენც იქ იყავით…
_ თქვენ შეგიძლიათ ჩემი პიროვნება შეამოწმოთ. დანარჩენზე სალაპარაკოდ კი ახლა არ მცალია და მოგვიანებით ვისაუბროთ, _ გვითხრა ჯიქიამ.
ზურაბ ჯინჭარაძის განმარტებით, სუფსის პირიდან ნასვამი თანამშრომლის ოზურგეთში გამგზავრებას აპირებდნენ:
_ ჩვენი ძმაა, დათო ჩიკაშუა, მაგრამ ერთ ჭიქა ღვინოს რომ დალევს, არც ერთი საგიჟე არ ღებულობს.
_ თქვენ, ახლა თქვენს თანამშრომელზე საუბრობთ?
_ დიახ, ჩვენი ძმაა, მაგრამ ასეა ღვინოს როცა დალევს…
_ სამუშაო საათებში რატომ იყვნენ ნასვამ მდგომარეობაში?
_ ქორწილის მეორე დღე იყო და შესვენების საათებში დალიეს.
_ ეს ინციდენტი 4 საათზე მოხდა.
_ ალბათ დრო ამერია… ისე, ჩხუბი არ იყო. შელაპარაკება მოხდა და მის გაცილებას ვაპირებდით ოზურგეთში…. და მერე გავაცილეთ კიდეც…
ჩვენ შევეცადეთ მუნიციპალიტეტის გამგებლის თამაზ ჯინჭარაძის აზრიც გაგვეგო, თუმცა, გამგებელმა, იმ მიზეზით, რომ სიტუაციას არ ფლობდა, კომენტარისგან თავი შეიკავა და განმარტებების გაკეთებას შესაბამისი მტკიცებულებების წარდგენის შემდეგ დაგვპირდა.
მტკიცებულებები კი მრავლადაა _ როგორც ვიდეო, ასევე აუდიო ჩანაწერები. ჩვენ ამ მასალებს აუცილებლად გადავცემთ მუნიციპალიტეტის ხელმძღვანელობას და მათგან საჯარო მოხელეების ამგვარი საქციელის გამო რეაგირებას დაველოდებით, ხოლო სამართალდამცავი ორგანოებისგან ჟურნალისტების მიმართ მუქარის ფაქტზე კანონის შესაბამისს ქმედებას მოვითხოვთ.
