ბარათაშვილმა, რომელიც სოფლის მეურნეობის სამინისტროს თანამშრომლებს და შპს “მექანიზატორის” დირექტორის მოადგილე მამუკა ივანიაძეს იცავს, დღეს პრესკონფერენცია გამართა და პროკურატურა პატიმარზე ზეწოლაში დაადანაშაულა.
რამდენიმე საათში კი მთავარი პროკურატურის პრესსამსახურმა ადვოკატის ბრალდებებს შემდეგი შინაარსის განცხადებით უპასუხა.
“ადვოკატ სოსო ბარათაშვილის განცხადება იმის თაობაზე, რომ ბოლო დღეების განმავლობაში ბრალდებულ მამუკა ივანიაძესთან ხორციელდებოდა არასაპროცესო მოქმედებებით მუშაობა, არის სრული სიცრუე. არათუ ბოლო დღეებში, არამედ ბრალდებულ მ. ივანიაძის საპყრობილეში მოთავსების დღიდან, არც ერთი პროკურორი და გამომძიებელი არ ყოფილა მასთან. ასევე სიცრუეა ადვოკატ ბარათაშვილის განცხადება იმის თაობაზე, რომ ბრალდებულის განცხადება გადაიგზავნა შსს ანტიკორუფციულ სააგენტოში. მითითებული განცხადება შემოსულია პროკურატურაში, რადგან პროკურატურა არის განცხადების ადრესატი და არ გადაგზავნილა არსად.
მაშინვე, როდესაც საქმის მწარმოებელი ორგანოსათვის ცნობილი გახდა, რომ ბრალდებული მამუკა ივანიაძე ითხოვდა პროკურორთან შეხვედრას, სწორედ მისი უფლებების, კერძოდ დაცვის უფლების სრულყოფილად განხორციელების მიზნით, გამოძიების მიერ მოხდა მისი სამივე ადვოკატის ს. ბარათაშვილის, რ. კირკიტაძისა და ი. ჯანაშვილის ინფორმირება იმის თაობაზე, რომ მონაწილეობა მიეღოთ ბრალდებულთან ჩასატარებელ საპროცესო მოქმედებებში.
ბრალდებულთან შეხვედრამდე მამუკა ივანიაძემ განცხადებით მომართა პროკურატურას, რომლითაც ის უნდობლობას უცხადებდა ადვოკატ სოსო ბარათაშვილს და მის საადვოკატო ბიუროს.
აღნიშნული განცხადების თაობაზე ადვოკატი სოსო ბარათაშვილი ინფორმირებული იქნა საპრყობილეში ყოფნის დროს.
ნაცვლად იმისა, რომ ადვოკატ სოსო ბარათაშვილის გაერკვია ბრალდებულის პოზიცია, დატოვა საპყრობილის ტერიტორია, რის შემდგომაც საგამოძიებო ორგანომ მიიღო გადაწყვეტილება ადვოკატის დასწრების გარეშე არ შეხვედროდნენ ბრალდებულს და მათ მიერ, ბრალდებულთან კონტაქტის გარეშე მოხდა საპყრობილის დატოვება,” _ნათქვამია განცხადებაში.
“გურია ნიუსი”ადვოკატ სოსო ბარათაშვილს დაუკავშირდა, რომელიც ამბობს, რომ პროკურატურის ეს განცხადება გაუაზრებელი და დაუსაბუთებელია.
“პროკურატურის ეს განცხადება გაუაზრებელი და დაუსაბუთებელია იმიტომ, რომ მათ უნდა უპასუხონ ორ მთავარ კითხვას. პირველი, როდის მოხდა და როგორ მოხდა რომ მამუკა ივანიაძის მიერ მთავარი პროკურორის სახელზე დაწერილი განცხადება დილის 11 საათზე უკვე მოტანილი ჰქონდათ ციხეში და მეორე, რამ განაპირობა რომ “მექანიზატორის” საქმეში ბრალდებულები ბოლო 2 დღის განმავლობაში გადაიყვანეს უფრო უარეს პირობებში, ვიდრე აქამდე იყვნენ.”
სოსო ბარათაშვილის თქმით, პროკურატურას ამ დრომდე არ გააჩნია მამხილებელი მტკიცებულებები და სწორედ ამის გამო, სასამართლოსთან შეთანხმებით, 1 თვითა და 20 დღით გადასწია საქმის წინასასამართლო მოსმენა.ადვოკატის მტკიცებით, პროკურატურა ამ გზით დამატებითი მტკიცებულებების მოპოვებას ზეწოლის შედეგად მიღებული აღიარებითი ჩვენებებით ხარჯზე ცდილობს.
დღეს დილით გლდანის საპყრობილეში მისულ ადვოკატს ციხის უფროსის მოადგილის კაბინეტში გამომძიებელი შარდენ კოპალიანი და პროკურორი შოთა რიჟამაძე დახვდნენ. მათ ბარათაშვილს განუცხადეს, რომ მამუკა ივანიაძემ მას, როგორც ადვოკატს, გამოუცხადა უნდობლობა, მისცა აცილება და სურს სახაზინო ადვოკატის აყვანა.
“მოვითხოვე, ეჩვენებინათ დოკუმენტი, სადაც ივანიაძემ თავისი მოთხოვნები განაცხადა. მაჩვენეს მისი ხელნაწერი, რომელიც დაწერილი იყო მთავარი პროკურორის _ არჩილ კბილაშვილის სახელზე. განცხადება დათარიღებული იყო გუშინდელი დღით _ კვირა დღით, 16 ივნისით. დავინტერესდი როგორი წესით მოხდა ამ წერილის გადაგზავნა მთავარ პროკურორთან, შემდეგ ანტიკორუფციულ სამსახურში და როგორ მოხდა, რომ 11 საათისათვის ყველა ინსტანცია მოიარა ამ წერილმა? მათ ამ კითხვებზე პასუხი არ გააჩნდათ,” _ აცხადებს სოსო ბარათაშვილი “გურია ნიუსთან”.
