უწყებათაშორისი კომისია მოუწოდებს საქართველოს მთავრობისა და საარჩევნო ადმინისტრაციის წარმომადგენლებს, ასევე პოლიტიკურ პარტიებს, სამოქალაქო საზოგადოებასა და საერთაშორისო მოთამაშეებს, მჭიდროდ ითანამშრომლონ საარჩევნო გარემოს გაუმჯობესების მიზნით. უწყებათაშორისი კომისია დარწმუნებულია, რომ ღია და კონსტრუქციული გარემო მნიშვნელოვანია პოტენციური პრობლემების თავიდან ასაცილებლად.
2013 წლის საპრეზიდენტო და 2014 წლის ადგილობრივი თვითმმართველობის არჩევნებისათვის საარჩევნო გარემოს შემდგომი გაუმჯობესების მიზნით, უწყებათაშორისი კომისია წარმოადგენს შემდეგ რეკომენდაციებს, რომელთაგან ნაწილი გათვალისწინებულია კომისიის უმრავლესობის მიერ, ნაწილი კი წარმოადგენს უწყებათაშორისი კომისიის თავმჯდომარის წინადადებებს:
შინაგან საქმეთა სამინისტროს, მთავარ პროკურატურას და ფინანსთა სამინისტროს
კომისიის წევრების პოზიცია: წინაასაარჩევნო პერიოდში თავი შეიკავონ საარჩევნო პროცესში ჩართული ოპოზიციის აქტივისტების, საარჩევნო შტაბის წევრებისა და მათი მხარდამჭერების ძველ საქმეებთან დაკავშირებით დაკითხვებზე დაბარებებისგან, გარდა იმ შემთხვევისა, როდესაც სისხლის სამართლის საქმის მიმართ არსებობს მაღალი საზოგადოებრივი ინტერესი ან იქმნება საპროცესო ვადის დარღვევის საფრთხე.
კომისიის თავმჯდომარი რეკომენდაცია: წინასაარჩევნო პერიოდში პარტიული აქტივისტების, საარჩევნო შტაბის წევრებისა და მხარდამჭერების ძველ საქმეებთან დაკავშირებით საგამოძიებო ორგანოებში მასობრივი დაბარება, ასევე პოლიტიკური ლიდერებისათვის წინასწარი პატიმრობის მოთხოვნა, ისევე როგორც ძალადობა ადგილობრივი თვითმმართველობის ორგანოებზე, ძალადობის ფაქტები ოპოზიციის აქტივისტთა და სხვა ჯგუფთა მიმართ და ასეთი საქმეების არასათანადო გამოძიება პრაქტიკულად შეუძლებელს ხდის არჩევნების სამართლიან და თავისუფალ გარემოში ჩატარებას.
კომისიის თავმჯდომარე მოუწოდებს შესაბამის უწყებებს, წინასაარჩევნო პერიოდში თავი შეიკავონ საგამოძიებო მოქმედებებისგან იმ პირთა მიმართ, ვინც ამა თუ იმ ფორმით აქტიურობს რომელიმე ოპოზიციური პარტიის მხარდასაჭერად, რათა გამოირიცხოს ძველი საქმეების გამოყენებით ოპოზიციური პარტიის წინასაარჩევნო კამპანიის ხელის შეშლის ან ხელისშეშლად აღქმის შემთხვევები.
კომისიის თავმჯდომარე ასევე მოუწოდებს შინაგან საქმეთა სამინისტროს და მთავარ პროკურატურას სრულფასოვნად გამოიძიოს ძალადობის ის ფაქტები, რომელსაც როგორც ოპოზიციის აქტივისტების, ასევე სხვადასხვა ჯგუფების მიმართ ჰქონდა ადგილი, რათა ძალადობის დაუსჯელობის განცდამ ხელი არ შეუწყოს შემდგომ ძალადობას.
ცენტრალურ საარჩევნო კომისიასა და საქართველოს პარლამენტს
მიუხედავად 2009 წელს ინტერფრაქციული ჯგუფის ფორმატში მიღწეული შეთანხმებისა, რომლის თანახმად, მდივნის არჩევა ოპოზიციური პოლიტიკური პარტიისგან დანიშნული წევრებისგან უნდა მომხდარიყო, საარჩევნო ადმინისტრაციამ ეს ნორმა პარლამენტის შუალედურ არჩევნებზე განსხვავებულად განმარტა. იმისათვის, რომ მომავალ საარჩევნო ადმინისტრაციაში უზრუველყოფილი იყოს ოპოზიციის სრულფასოვანი მონაწილეობა, როგორც ეს 2010 წლის ადგილობრივი თვითმმართველობის და 2012 წლის საპარლამენტო არჩევნებზე იყო, მიზანშეწონილია, ეს საკითხი გარკვეული ფორმით დარეგულირდეს.
კომისიის თავმჯდომარის პოზიცია: ცენტრალურმა საარჩევნო კომისიამ ნორმატიული აქტით დააზუსტოს საარჩევნო კოდექსის 25-ე მუხლის მე-15 პუნქტის არსი, რომელიც საუბნო საარჩევნო კომისიებში მდივნის არჩევის წესს არეგულირებს. ან პარლამენტმა აღნიშნული ნორმა უფრო მკაფიოდ განმარტოს შესაბამისს კანონში.
კომისიის უმრავლესობის პოზიცია: კომისიის წევრებს (7 წევრი) მიაჩნიათ, რომ მოცემული ნორმის ფორმულირება შეიძლება მხოლოდ საქართველოს პარლამენტის გადაწყვეტილებით შეიცვალოს და ამ გზით დარეგულირდეს აღნიშნული საკითხი, რადგანაც მუხლის მოქმედი ფორმულირება არ იძლევა შესაძლებლობას, საპარლამენტო არჩევნებში საუკეთესო შედეგების მქონე პარტიად მიჩნეული იქნეს პარტიების საარჩევნო ბლოკი. მოვუწოდებთ საქართველოს პარლამენტს, განიხილოს საკითხი საარჩევნო კოდექსის 25-ე მუხლის მე-15 ნაწილში, რომელიც ადგენს საუბნო საარჩევნო კომისიებში მდივნების არჩევის წესს, შესაბამისი ცვლილების შეტანის მიზანშეწონილობის შესახებ.
საქართველოს პარლამენტს
კომისიის თავმჯდომარის პოზიცია: უფრო მკაფიოდ განმარტოს საარჩევნო კოდექსის 51-ე მუხლის მე-14 პუნქტი, რომელიც შუალედურ არჩევნებზე კვალიფიციური საარჩევნო სუბიექტებისათვის უფასო პოლიტიკური რეკლამის გამოყოფის ვალდებულებას განსაზღვრავს, რათა კანონის არასწორი ინტერპრეტაციით ეჭვქვეშ არ დადგეს საკანონმდებლო ნორმის აღსრულება და ამომრჩეველს ინფორმირებული არჩევანის გაკეთების შესაძლებლობა მიეცეს.
კომისიის უმრავლესობის პოზიცია: კომისიის წევრების (7 წევრი) მოსაზრებით, რამდენადაც საარჩევნო პროცესში მედიის მონაწილეობისა და მისი გამოყენების წესს განსაზღვრავს საქართველოს კომუნიკაციების ეროვნული კომისია, რომელიც უზრუნველყოფს მაუწყებლის მიერ ამ კანონით დადგენილ ნორმათა დაცვის მონიტორინგს და ახდენს შესაბამის რეაგირებას ამ ნორმების დარღვევაზე, ნორმის ინტერპრეტაცია უნდა მომხდარიყო კომუნიკაციების მარეგულირებელი ეროვნული კომისიის მიერ. კომუნიკაციების მარეგულირებელმა ეროვნულმა კომისიამ კი განმარტა, რომ საარჩევნო კოდექსის 51-ე მუხლის მე-14 ნაწილში მოხსენიებული „ადგილობრივი მაუწყებლის“ ცნება არ მოიცავს იმ მაუწყებლებს, რომლებიც მაუწყებლობას ახორციელებენ საქართველოს მთელ ტერიტორიაზე. აღნიშნულიდან გამომდინარე, პარლამენტისათვის საქართველოს საარჩევნო კოდექსის 51-ე მუხლის მე-14 ნაწილის მკაფიოდ განმარტების მოთხოვნით მიმართვა კომისიის წევრებს მიზანშეუწონლად მიაჩნიათ.
საქართველოს მთავრობას, ცენტრალურ საარჩევო კომისიას და მთავარ პროკურატურას, სახელმწიფო აუდიტის სამსახურს
საქართველოს მთავრობამ თავი შეიკავოს ისეთი ქმედებებისაგან, რაც ადმინისტრაციული რესურსის მმართველი პარტიის სასარგებლოდ გამოყენებას განაპირობებს. მსგავსი ფაქტების გამოვლენის შემთხვევაში, ცენტრალურმა საარჩევნო კომისიამ ადეკვატური რეაგირება მოახდინოს მათზე. მთავარმა პროკურატურამ და სახელმწიფო აუდიტის სამსახურმა საფუძვლიანად შეისწავლონ ისეთი შემთხვევები, როცა კერძო ფულის საარჩევნო მიზნებით ხარჯვა ხდება.
კომისიის თავმჯდომარის დამატებითი პოზიცია: მთავარმა პროკურატურამ და სახელმწიფო აუდიტის სამსახურმა შეასრულონ კანონმდებლობით მათზე დაკისრებული მოვალეობა, როცა საქმე კერძო ფულის საარჩევნო მიზნით ხარჯვას ეხება.
ცენტრალურ საარჩევო კომისიას და შინაგან საქმეთა სამინისტროს
მკაფიოდ განუმარტონ შინაგან საქმეთა სამინისტროს თანამშრომლებს საარჩევნო კოდექსის 45-ე მუხლის მე-4 პუნქტით დადგენილი შეზღუდვა, რომელიც ძალოვანი უწყების წარმომადგენლებს საარჩევნო კამპანიაში მონაწილეობას უკრძალავს. სამინისტროს მაღალი რანგის თანამდებობის პირებმა საჯარო გზავნილი გაუგზავნონ უწყების თანამშრომლებს, რომ საარჩევნო კამპანიებში მათი მონაწილეობა კანონსაწინააღმდეგო ქმედებაა. ცენტრალურმა საარჩევნო კომისიამ ნორმატიული აქტით განსაზღვროს, არჩევნების დღეს, რა შემთხვევაში აქვს პოლიციას საარჩევნო უბნის სიახლოვეს ყოფნის უფლება, რათა გამოირიცხოს ზეწოლა როგორც საარჩევნო ადმინისტრაციის წარმომადგენლებზე, ასევე ამომრჩევლებზე.
შინაგან საქმეთა სამინისტროს
პროაქტიულად განუმარტოს თავის თანამშრომლებს, რომ საჯარო ადგილებში განთავსებული საარჩევნო სააგიტაციო მასალების ჩამოხსნა მათ კომპეტენციას სცილდება.
საქართველოს მთავრობას
წინასაარჩევნო პერიოდში თავი შეიკავოს მედია საშუალებებით ისეთი სარეკლამო რგოლების განთავსებისგან, რომელიც საიმიჯო ელემენტებს შეიცავს და პოლიტიკურ რეკლამად შეიძლება იქნეს აღქმული.
