ბიუჯეტიდან ყოველთვიურად რამდენჯერმე ხდება სასამართლოს მიერ დაკისრებული თანხის დაზარალებულებისთვის ჩარიცხვა. მთავარი პროკურორის მოადგილე კახა წერეთელი ამბობს, რომ წინა ხელისუფლების დროს ე. წ. სტრასბურგის საქმეები თაროებზე ჰქონდათ შემოდებული:
“ეს საქმეები წლების მანძილზე ყოველგვარი რეაგირების გარეშე თაროებზე ჰქონდათ შემოდებული. 10 სისხლის სამართლის საქმე დარჩენილი იყო რეაგირების გარეშე, მათ შორის, გირგვლიანის საქმეც, აქედან, 7 საქმე აბსოლუტურად რეაგირების გარეშე იყო დატოვებული. ესენია საყოველთაოდ ცნობილი საქმეები: “მიქიაშვილი საქართველოს წინააღმდეგ”, “დვალიშვილი საქართველოს წინააღმდეგ” , “ღარიბაშვილი საქართველოს წინააღმდეგ”, “ცინცაბაძე საქართველოს წინააღმდეგ”, “მახარაძე და სიხარულიძე საქართველოს წინააღმდეგ”, “ხაინდრავა საქართველოს წინააღმდეგ”. ეს ის საქმეებია, სადაც დასრულებული იყო წარმოება ადამიანის უფლებათა ევროპის სასამართლოში და საკითხი კონტროლისთვის გადაცემული ჰქონდა ევროსაბჭოს მინისტრთა კომიტეტს. ყველა ამ საქმის შეწყვეტის დადგენილება გავაუქმეთ და მივეცით კონკრეტული მითითებები, რომ მათზე განახლებულიყო გამოძიება”.
2012 წლიდან სტრასბურგის სასამართლოს გადაწყვეტილებების აღსასრულებლად ბოლო 8 თვის განმავლობაში პრემიერ-მინისტრმა ივანიშვილმა ათი ბრძანება გამოსცა.
ადამიანის უფლებათა ევროპული სასამართლოს მიერ საქმეზე “კაკაბაძე და სხვები საქართველოს წინააღმდეგ” 2012 წლის 2 ოქტომბერს გამოტანილი გადაწყვეტილების აღსრულებისა და საქართველოს კანონმდებლობით განსაზღვრული გადასახადის დასაფინანსებლად, საქართველოს ფინანსთა სამინისტრომ 43457(ორმოცდასამი ათას ოთხას ორმოცდაჩვიდმეტი) ევროს ეკვივალენტი ლარი გამოყო.
საქმეზე “ზაზა ცხოიძე საქართველოს წინააღმდეგ” 2012 წლის 27 ნოემბერს მეგობრული მორიგების შესახებ გამოტანილი გადაწყვეტილების აღსრულებისა და საქართველოს კანონმდებლობით განსაზღვრული გადასახადის დასაფინანსებლად გამოყოფილია 3 750 (სამი ათას შვიდას ორმოცდაათი) ევროს ეკვივალენტი ლარი.
“მიქიაშვილი საქართველოს წინააღმდეგ” 2012 წლის 9 ოქტომბერს გამოტანილი გადაწყვეტილების აღსრულებისა და საქართველოს კანონმდებლობით განსაზღვრული გადასახადის დასაფინანსებლად, 15 000 (თხუთმეტი ათასი) ევროა გამოყოფილი.
საქმეზე “ჯანიაშვილი საქართველოს წინააღმდეგ” გამოყოფილია 1 750 ევრო.
საქმეზე “გიორგი ნემსაძე საქართველოს წინააღმდეგ” 2013 წლის 14 მაისს მორიგების შესახებ გამოტანილი გადაწყვეტილების აღსრულებისა და საქართველოს კანონმდებლობით განსაზღვრული გადასახადის დასაფინანსებლად 10 000 ევროა გამოყოფილი.
საქმეზე “გაბრიელ ონიანი საქართველოს წინააღმდეგ” 2013 წლის 9 აპრილის მორიგების შესახებ გამოტანილი გადაწყვეტილების აღსრულებისა და საქართველოს კანონმდებლობით განსაზღვრული გადასახადის დასაფინანსებლად გამოყოფილია 3 750 ევრო.
საქმეზე “დავით გუჯეჯიანი საქართველოს წინააღმდეგ” 2013 წლის 14 მაისს მორიგების შესახებ გამოტანილი გადაწყვეტილების აღსრულების მიზნით 6 250 ევროა გმოყოფილი.
საქმეზე “ბონდო კიკვაძე საქართველოს წინააღმდეგ” 2013 წლის 14 მაისს მორიგების შესახებ გამოტანილი გადაწყვეტილების აღსრულების მიზნით ფინანსთა სამინისტრომ 5 ათასი ევრო გამოყო.
საქმეზე “ბაისუევი და ანზოროვი საქართველოს წინააღმდეგ” 2012 წლის 18 დეკემბერს გამოტანილი გადაწყვეტილების აღსრულების მიზნით გამოყოფილია კი 1212 ევრო გამოყოფილი.
ყველაზე დიდი თანხა გასული 8 თვის განმავლობაში საქართველოს მთავრობამ კომპანია Karmer Marble Tourism Construction Industry and Commerce LLC-ს გადაუხადა.
2013 წლის 2 იანვარს, ერთი მხრივ, საქართველოსა და მეორე მხრივ, კომპანია Karmer Marble Tourism Construction Industry and Commerce LLC-ს შორის გაფორმებული მორიგების ხელშეკრულების საფუძველზე, 2012 წლის 9 აგვისტოს საარბიტრაჟო გადაწყვეტილების აღსრულებისა და საქართველოს კანონმდებლობით განსაზღვრული გადასახადის დაფინანსების მიზნით, საქართველოს ფინანსთა სამინისტრომ 5 555 556 (ხუთი მილიონ ხუთას ორმოცდათხუთმეტი ათას ხუთას ორმოცდათექვსმეტი) ევრო გამოყო.
იუსტიციის მინისტრ თეა წულუკიანის ინიციატივით, გასული წლის ნოემბრიდან, სტრასბურგის სასამართლოს ქართული საქმეებისგან განტვირთვის პროცესი დაიწყო, რაც საქმეების საქართველოში წამოღებას გულისხმობს. მისი თქმით, პროცესი წარმატებულად მიმდინარეობს, მორიგება უკვე 30-მდე მოსარჩელესთან გაფორმდა..
“ძალიან ინტენსიურად მიმდინარეობს სტრასბურგის საქმეებთან დაკავშირებით მომჩივან მხარესთან მორიგებაზე მუშაობა. ამ დროისთვის, იუსტიციის სამინისტროს მიმართა დაახლოებით 30-მდე მომჩივანმა, მაგრამ არიან მომჩივნები, რომლებიც უშუალოდ სტრასბურგის სასამართლოს მიმართავენ მორიგების მოთხოვნით. მჯერა, რომ ყველაზე დიდი საქმეები, იქნება ეს დასხივებულების ცნობილი საქმე, სადაც სახელმწიფო უკვე რამდენიმე წელია ალოდინებს ძალიან სერიოზულად დაზიანებულ ადამიანებს და არ უხდის თანხას, რაც ეკუთვნით, ამ საქმიდან დაწყებული და რამდენიმე პატიმრის საქმით დამთავრებული, დასრულდება მორიგებით,” _ ამბობს წულუკიანი.
