(გურია ნიუსი, ლანჩხუთი) _ ბოლო დროს ჩრდილში გადასულმა ლანჩხუთელ ოპოზიციონერთა ნაწილმა ერთობლივი პრესკონფერენცია გამართა. მათ სკანდალური განცხადებები გააკეთეს როგორც ხელისუფლების, ასევე, ოპოზიციის ნაწილის წინააღმდეგ.
მარიკა თურნავა, ლანჩხუთის საკრებულოს ფრაქცია “ქრისტიან-დემოკრატების” თავმჯდომარე:
_ თბილისში იმართება 8 ოპოზიციურ პარტიასა და ხელისუფლებას შორის მოლაპარაკება, რათა საარჩევნო გარემო გაუმჯობესდეს. დღეს ბევრს საუბრობენ იმაზე, თითქოს ეს მოლაპარაკება არაფრის მომცემია. გადავწყვიტეთ, შევკრებილიყავით და მედიის საშუალებით მოსახლეობისთვის გვეთქვა ის, რაც ხდება რეალურად. ე.წ. “რვიანის” შემადგენლობაში მყოფი იმ პარტიის წარმომადგენლები მოვიწვიეთ პრესკონფერენციაზე, რომლებსაც ოფისები აქვთ ლანჩხუთში. ყველა მოვიდა გარდა ერთისა _ ეს გახლავთ “კონსერვატორი” მაკა კვირკველია.
მოლაპარაკებები ხელისუფლებასთან საარჩევნო გარემოს გაუმჯობესებასთან დაკავშირებით გაგრძელდება და ალბათ, შედეგიანი იქნება. გასულ კვირას აშშ-ს სახელმწიფო მდივნის მოადგილის თანაშემწე თინა ქეიდენაუ ოპოზიციას შეხვდა. მან გარკვეული მითითებანი დატოვა, რომლის გათვალისწინება ხელისუფლებას აუცილებლად მოუწევს. დღეს რევოლუციების მოწყობის დრო არ არის _ ეს ქვეყანას კარგს არაფერს მოუტანს. სჯობს ცივილიზებულად მოხდეს ხელისუფლების ჩანაცვლება. ქეიდენაუმ ბევრი რამ გაიგო არსებული სიტუაციის შესახებ. ვფიქრობთ, ხელისუფლება გარკვეულ დათმობაზე წამოვა და ერთხელ და სამუდამოდ შეიქმნება ნორმალური საარჩევნო გარემო, რომელიც საშუალებას მოგვცემს, სწორი არჩევანი გავაკეთოთ.
რომან ბიწაძე, “რესპუბლიკური პარტიის” ლანჩხუთის ორგანიზაციის თავმჯდომარე:
_ დღეს ყველა შევიკრიბეთ მაკა კვირკველიას გარდა, რომელმაც საკუთარი თავი ჩვენს მიღმა დააყენა. ის რატომღაც “რვიანს” დამცინავად უყურებს და თანამშრომლობს “სახალხო კრებასთან”. ჩემი ინფორმაციით, მისმა ზემდგომმა ფუნქციები შეუჩერა “სახალხო კრებაში”. კვირკველიას გადასაწყვეტია, სად და როგორ იქნება.
მიუხედავად სკეპტიკური განცხადებებისა, “რვიანის” რიგები არათუ შემცირდა, პირიქით გაიზარდა _ უკვე 14 პარტიაა გაერთიანებული მოლაპარაკების ფორმატში. 8 პარტიამ შეინარჩუნა ერთიანობა, მიუხედავად განსხვავებული ხედვისა და ორიენტაციისა. ვფიქრობთ, რომ ეს მოლაპარაკება შედეგიანი იქნება. ხელისუფლება დღეს იძახის, რომ, თითქოს, ჩვენ არ გვინდა მაჟორიტარი დეპუტატები. ეს არის მტკნარი სიცრუე. ჩვენ ვითხოვთ ნორმალურ საარჩევნო გარემოს და იმას, რომ ბარიერი იყოს 50%-ი მაინც, მაგრამ ეს ხელს არ აძლევს “ნაციონალურ მოძრაობას” და აკაკი მინაშვილს. ეს კაცი საკუთარი კანდიდატის დამარცხებას ქვეყნის დამარცხებად მიიჩნევს.
ერთი საგულისხმო ფაქტიც უნდა გავახმოვანო _ პირველად მოხდა, ალბათ, ამერიკის დიპლომატიის ისტორიაში, რომ ელჩმა ჯონ ბასმა ტელევიზიებს თავისი კომენტარი თარგმანთან ერთად მიაწოდა, რათა შემდეგ რაიმე არ დაემახინჯებინათ. ტელევიზიებმა აქაც იყოჩაღეს და ბასის კომენტარს ნაკლები დრო დაუთმეს. სამაგიეროდ, მთვრალი მედვედევის ცეკვა აჩვენეს დიდხანს.
ელგუჯა ჩხაიძე, “თავისუფალი დემოკრატების” ლანჩხუთის ორგანიზაციის თავმჯდომარე:
_ ბოლო დროს არჩევნებს მაისში იმიტომ ატარებენ, რომ ამ დროს ხვნა-თესვისთვის აქტიური პერიოდია. მაშინ არიგებს ხელისუფლება საწვავს, ეს არ არის ქრთამი?! წელს არჩევნები არ არის და არავის არაფერი გახსენებია. ლესიდან ლანჩხუთამდე 400 ჰექტარი მიწიდან მხოლოდ მე მაქვს დახნული 2000 მეტრი ფართობი. ჩვენი ბიუჯეტიდან ოზურგეთის პოლიციისთვის ჯიპი რომ ვიყიდეთ, ნორმალურია?! განა იმდენი ფული გვაქვს, რომ ოზურგეთისთვის ვყიდულობთ ჯიპს? ხელისუფლება ბიუჯეტის ფულებით აჭარაში კონცერტებს მართავს. რა გვემღერება და გვეცეკვება? ხალხი მშიერი კვდება, სოფლის მეურნეობის მინისტრი კი დედალი და მამალი ძროხაო, გაიძახის. ეს კაცი მინისტრი უნდა იყოს?! ხელისუფლება არჩევნებში ადმინისტრაციულ რესურსს _ სამსახურები იმისთვის არის შექმნილი, რომ ხელისუფლებას ემსახურონ და არა ხალხს. დილიდან საღამომდე კომპიუტერზე თამაშობენ, არჩევნების დროს კი რვეულით და პასტით დარბიან და აგიტაციას ეწევიან. სამსახურებში ძირითადად როგორი ხალხი ინიშნებიან, ყველამ იცის _ ესენი არიან კუდის და პოლიციის თანამშრომელთა ახლობლები.
დავით წულაძე, “ახალი მემარჯვენეების” ლანჩხუთის ორგანიზაციის თავმჯდომარე:
_ კარგად მახსოვს, გასული საუკუნის 90-იანი წლებში როგორი ცხოვრება იყო. საკრებულომ გამგებლად დამნიშნა და მესამე დღეს გადავდექი _ ფოთის აღება მიბრძანეს და არ გავაკეთე. დღეს რევოლუციების დრო აღარ არის _ ცივილიზებულად უნდა გადავწყვიტოთ პრობლემები. თუ მოლაპარაკება ჩიხში შევა, ჩვენ ადეკვატურები ვიქნებით. ვფიქრობთ, რომ პირველი ივნისისთვის გამოცხადდება “რვიანის” გადაწყვეტილება _ რა როგორ იქნება.
პრესკონფერენციაზე გაკეთებულ განცხადებებზე კომენტარისთვის “გურია ნიუსი” გურულ კონსერვატორთა ლიდერს მაკა კვირკველიას დაუკავშირდა. მისი თქმით, იგი პრესკონფერეციის ჩატარების თაობაზე საქმის კურსში არავის ჩაუყენებია:
_ მე ხელისუფლების შეცვლის მომხრეთა რიგებში ვარ. ვიცი, რომ ჩემი პარტიის ლიდერი ზვიად ძიძიგური ე.წ. “რვიანის” ფორმატში მონაწილეობს და აქედან გამომდინარე, არავისთვის მითქვამს, რომ ისინი ვერაფერს მიაღწევენ. არც ვინმესთვის დამიცინია. ეს არის ტყუილი. რაც შეეხება ჩემს “სახალხო კრებასთან” კავშირს, მე ვარ მათთან და ამის კანონიერი უფლება მაქვს. არავის არაფერი აუკრძალავს და შეუჩერებია ჩემთვის. ამაზე ლაპარაკს, უმჯობესია იმაზე იმსჯელონ, რა დღეშია მოსახლეობა. მე ვარ ეროვნული საბჭოს გურიის რეგიონის კურატორი, ჩვენს საბჭოში შედის ორი პარტია: “კონსერვატორები” და “ხალხის პარტია”, გვაქვს ოფისი და ძველებურად ვაგრძელებ პარტიულ საქმიანობას, _ ამბობს კვირკველია.
