მისი განცხადებით, ამ საქმეში ბევრი რამ ისევ გამოსაძიებელი და გასარკვევია. დასადგენია, სად გადის გიორგი ჩემიასა და იმ მოსამართლეების პასუხისმგებლობის საკითხის ზღვარი, რომლებიც სანდრო გირგვლიანის საქმეს განიხილავდნენ. მანანა კობახიძის განცხადებით, ის რომ, საქმეში არ ფიგურირებდა მელნიკოვის, სალაყაიას, ახალაიას და სანოძის გვარები, ბევრ კითხვის ნიშანს აჩენს. მისივე თქმით, ამ თემით იუსტიციის უმაღლესი საბჭო უნდა დაინტერესდეს, რადგან არ შეიძლება იმ მოსამართლეების იგნორირება და მათთვის ხელის დაფარება, რომლებიც გირგვლიანის საქმეს განიხილავდნენ.
“ამ საქმეში კონკრეტულ პირებს ბრალი არ ჰქონდათ წაყენებული და არ იკვეთებოდა ბრალდება. ბრალდებული პირები არ იყვნენ ახალაია, თაკო სალაყაია, მელნიკოვი და სანოძე, მერაბიშვილი _ ადამიანები, რომლებიც განარიდეს საქმეს. საქმე არ იყო გამოძიებული და კონკრეტული პირები არ იყვნენ პასუხისგებაში მიცემულნი. ცხადია, მაშინდელი მოქმედი სისხლის სამართლის კოდექსი არ იძლეოდა საშუალებას, რომ ეს საქმე დაბრუნებულიყო წინასწარ გამოძიებაში. ამიტომ მოსამართლე, ცხადია, სასამრთლოში მათ ბრალს ვერ წაუყენებდა. თუმცა, აქვე უნდა გაიმიჯნოს, სად იყო და სად არის ჩემიას პასუხისმგებლობა. სად არის მოსამართლის პასუხისმგებლობა? რამდენადაც მთელი რიგი სასამართლო პროცედურები იქ დარღვევით წარიმართა. პრაქტიკულად, სასამართლო ერთ მხარეს, ამ შემთხვევაში ბრალდებულის მხარეს იხრებოდა. ჩვენ კარგად გვახსოვს იმ სასამართლო პროცესებზე, პროკურორებისთვის იმის უფლების მიცემა, რომ მათ ტელეფონებზეც ესაუბრათ და ბრალდებულებთან ყოფილიყვენ მუდმივ კავშირში, რომ იქ შეეთანხმებინათ პოზიციები.ეს გარემოებები, რა თქმა უნდა, ბევრ პასუხისმგებლობას აკისრებს თავად გიორგი ჩემიას. ამიტომ მე ვფიქრომ, რომ იუსტიციის უმაღლესმა საბჭომ კეთილი უნდა ინებოს და იმსჯელოს ამ საკითხზე, რადგან საქმე უკვე გაიხსნა, არ შეიძლება ამ საქმის განმხილველი მოსამართლეების იგნორირება და მათზე ხელის დაფარება. აუცილებლად შესაბამისმა ორგანომ, ამ შემთხვევაში იუსტიციის საბჭომ, უნდა იმსჯელოს, რამდენად ადეკვატური იყო გიორგი ჩემიას და სხვა მოსამართლეების ქმედებები, რომლებიც გირგვლიანის საქმე განიხილავდნენ. ეს ყველაფერი გამოძიების თემაა. ეს უნდა იყოს გამოძიებული და ამაში დიდი როლი ეკისრება იუსტიციის უმაღლეს საბჭოს“, _ განაცხადა ,,გურია ნიუსთან“ საუბრისას პარლამენტის ვიცე-სპიკერმა მანანა კობახიძემ.
შეგახსენებთ, რომ გიორგი ჩემიამ ,,გურია ნიუსთან„ ექსკლუზიურ ინტერვიუში სანდრო გირგვლიანის საქმეზე ისაუბრა. მან განაცხადა რომ ამ შემთხვევაში მოსამართლეს არანაირი ბერკეტი არ გააჩნდა, რომ საქმე დამატებით გამოძიებაში დაებრუნებინა ან შეეცვალა კვალიფიკაცია. გიორგი ჩემიას განცხადებით, მან გირგვლიანის საქმე კანონის სრული დაცვით წარმართა და მიუხედავად იმისა, რომ საქმეში არსებული დეტალები არასრულყოფილად მიაჩნდა, სამართლებრივი ბერკეტებოდან გამომდინარე, ვერაფერს შეცვლიდა.
