როგორც დოკუმენტშია აღნიშნული, კვლევითი ეტაპის ფარგლებში, გენგეგმაზე მომუშავე ჯგუფის მიერ, ყველაზე სენსიტიურად ზღვის სანაპიროს საკითხი შეფასდა.
„უფრო სიღრმისეულმა ანალიზმა, შესაბამის დარგობრივ ექსპერტებთან კონსულტაციებმა, თანამედროვე და ისტორიული მასალის გაცნობამ ცხადჰყო, რომ აღნიშნული პრობლემა საქართველოს შავი ზღვის სანაპიროს შუა მონაკვეთებში ყველაზე აქტიურადაა წარმოდგენილი და ფოთიც ამ არეალში ყვება. ყველაზე შესამჩნევად ეს პრობლემა მალთაყვის სანაპიროზე ისახება, სადაც 50 წლის შუალედში, ზღვის წარეცხვით, ქალაქმა დაახლოებით 117 ჰექტარი ტერიტორია დაკარგა და ეს პროცესი ახლაც გრძელდება.
აქედან გამომდინარე, ამ ტერიტორიის მიმართ წარმოდგენილია 2 სავარაუდო სცენარი:
სცენარი 1 – ტრადიციული მეთოდებით მოხდეს მასალის შემოტანა და ხელოვნურად მოიზვინოს სანაპირო. ეს შესაძლებელია განხორციელდეს ეტაპობრივად და ამით აღდგეს სანაპიროს ეს ნაწილი. თუმცა, აუცილებლად შესაბამისი დეტალური კვლევებია ჩასატარებელი იმაზე, თუ რამდენად მდგრადია ეს მიდგომა გრძელვადიან პერსპექტივაში და რა პერიოდულობით იქნება აღნიშნული სამუშაოები ჩასატარებელი;
სცენარი 2 – მოეწყოს მყარი ინფრასტრუქტურა ნაპირსამაგრების სახით. რადგან, რიონის არხიდან შემომავალი ნატანი ზღვას ერევა სამხრეთის მიმართულებით, წყალი საკმაოდ დაბინძურებულია და შესაბამისად, კლასიკურად პლაჟად ამ არეალში სანაპიროს განვითარებას პოტენციალი არ გააჩნია. აქედან გამომდინარე, შესაძლოა სანაპიროს გამაგრებასთან ერთად განსხვავებული ფუნქციაც შეიძინოს ქალაქმა.
აუცილებლად უნდა აღინიშნოს ის ფაქტი, რომ უფრო დეტალური გადაწყვეტილებებისა და საპროექტო დოკუმენტაციის მოსამზადებლად, საჭიროა მთლიანი სანაპიროს დეტალური შესწავლა,“ – ნათქვამია გენერალური გეგმის დოკუმენტში.
ამასთან, როგორც დოკუმენტაციიდან ირკვევა, გეგმასთან დაკავშირებით, შეხვედრები გაიმართა სხვადასხვა დაინტერესებულ ჯგუფებთან, მათ შორის ფოთის მერიის, საკრებულოს, ასევე სხვადასხვა სამსახურების წარმომადგენლებთან.
ამ განხილვების ფარგლებში, გარემოსდაცვითი კუთხით გამოიკვეთა, რომ ქალაქი არ არის მზად კლიმატის ცვლილებისთვის. შეხვედრის მონაწილეებმა აღნიშნეს, რომ სანაპირო ზოლზე უკვე განხორციელდა დროებითი ნაპირსამაგრი სამუშაოები, თუმცა აუცილებელია გრძელვადიანი და სისტემური გეგმის შემუშავება სანაპირო დაცვის თვალსაზრისით.
„გარემოსდაცვით ჭრილში გამახვილდა ყურადღება რიონისა და შავი ზღვის ურთიერთობის რღვევაზე. გამოიკვეთა, რომ ჩრდილოეთის მხრიდან დინების დარღვევის გამო, ზღვა ასხამს ქვიშას და პორტთან ნავმისადგომების ფუნქციონირებას აფერხებს. ამასთან, კუნძულის უბანში განხორციელებული ქვების ჩაყრა მხოლოდ დროებითი გამოსავალია – საჭირო იქნება განმეორებითი ჩარევა. სპეციალისტებმა აღნიშნეს, რომ 2003 წელს ჩატარებული პროგნოზის თანახმად, უარეს შემთხვევაში, 2028 წლისთვის მალთაყვის უბნის ნახევარზე მეტი შესაძლოა ზღვამ წაიღოს.
ამასთან, სოციალურ ჭრილში ითქვა,რომ სახეზეა ახალგაზრდებისა და ბავშვებისათვის განკუთვნილი სივრცეების დეფიციტი. აღინიშნა, რომ ახალგაზრდებს ქალაქში თითქმის არ აქვთ დასაკავებელი ან მისასვლელი სივრცეები, რაც ხელს უშლის მათ განვითარებასა და ქალაქში დარჩენის მოტივაციას. მიუხედავად იმისა, რომ მერია გარკვეულწილად აფინანსებს სტუდენტების სწავლის საფასურს, მაინც არსებობს სერიოზული დემოტივაცია ქალაქში ცხოვრებასთან და განათლების მიღებასთან დაკავშირებით.
შეხვედრაზე საუბარი შეეხო იმასაც, რომ ქალაქში განათლების ზოგადი დონე დაბალია და ასევე მაღალია უმუშევრობის მაჩვენებელი. დასაქმებულების უმეტესობას მინიმალური ხელფასი აქვთ, რაც ქმნის უპერსპექტივობის განცდას,“ – ნათქვამია დოკუმენტში.
