ნოდარ ებანოიძის განცხადებით, აუდიტის ანგარიშის შედგენა-დამტკიცების პროცედურა, როგორც ამას კონტროლის პალატის 2012 წლის პრაქტიკა გვიჩვენებს, დროშია გაწელილი. რიგი ანგარიშები დიდი ხნის დაგვიანებითაა დამტკიცებული, ზოგიერთი კი საერთოდ დამტკიცების გარეშეა გადაგზავნილი აუდიტის ობიექტებზე.
საკმაოდ ვრცელი მოხსენების ერთ-ერთი ყველაზე საინტერესო დეტალი, რასაც ნოდარ ებანოიძემ ხაზი გაუსვა კონტროლის პალატის თანამშრომლებსა და პროკურატურას შორის არაფორმალური ურთიერთობა გახლავთ.
“ძალიან საინტერესოა ის ფაქტიც, რომ კომისიის მუშაობის პერიოდში, მეტად მნიშვნელოვანი რამ გაირკვა. აუდიტის სამსახურის თანამშრომლებსა და პროკურატურას შორის არაფორმალური ურთიერთობები არსებობდა, რსაც ისინი საუბრებშიც ადასტურებდნენ. ასეთი პრივატული საუბრებით წყდებოდა, გადაეგზავნათ პროკურატურისთვის მასალები თუ არა” _ განაცხადა ნოდარ ებანოიძემ.
“გურია ნიუსის” ინფორმაციით, ერთ-ერთი ასეთი”თაროზე შემოდებული” ფაქტი იყო საერთო სასამართლოების საქმე, რომელიც სწორედ ნოდარ ებანოიძის მიერ ნახსენები “პრივატული საუბრებით” მიიჩქმალა.
ჯერ კიდევ 2010 წელს აქტში დაფიქსირებული იყო ზედმეტად გაწეული სასამართლო-საექსპერტო ხარჯები, ზოგიერთ შემთხვევაში კი აღნიშნული მომსახურების ანაზღაურება გადასწორებული მიღება-ჩაბარების აქტების მიხედვით ხდებოდა. აღნიშნული ფაქტი, რეაგირებისთვის მაშინვე გადაეგზავნა პროკურატურას, მაგრამ, ამ ორმა უწყებამ ერთმანეთში მოილაპარაკა…
საერთო სასამართლოების მიერ ექსპერტიზის ბიუროს ანგარიშზე გადარიცხული იყო თანხები, რომელიც სინამდვილეში, პროცესის მონაწილე მხარეებს აქვთ გადახდილი. უფრო მეტიც, გამოიკვეთა 4 სისხლის სამართლის და 1 სამოქალაქო საქმე, რომლის მასალებშიც სასამართლო ექსპერტიზის ბიუროს დასკვნები საერთოდ არ არის, მაგრამ ექსპერტიზის ბიუროდან დეპარტამენტში წარმოდგენილი ფორმა N5-ის საფუძველზე გადაირიცხა 4 390 ლარი. საერთო ჯამში, ზედმეტად გადახდილი თანხის ოდენობამ 37 075 ათასი ლარი შეადგინა. დიმიტრი გეგელია ამ ფაქტს არ უარყოფს:
_ რაც შეეხება “ლევან სამხარაულის სახელობის ექსპერტიზის ბიუროსთვის” გაწეული საქმიანობის ანაზღაურებას და აქ არსებულ პრობლემებს, გაცნობებთ რომ აღნიშნული საკითხი მაკონტროლებლის მიერ გადაგზავნილი იქნა საქართველოს მთავარ პროკურატურაში, რომელმაც 2010 წლის 19 ნოემბერს მიიღო დადგენილება და შეწყვიტა წინასწარი გამოძიება სისხლის სამართლის კანონით გათვალისწინებული ქმედების არარსებობის გამო. პროკურატურამ მიიჩნია, რომ ორ საბიუჯეტო ორგანიზაციას შორის არსებული ხარვეზის აღმოფხვრა მიზანშეწონილი იყო უწყებებს შორის ურთიერთშედარების მოხდენით. 2011წლის 30 აგვისტოს შედგა ურთიერთშედარების აქტი და სსიპ საერთო სასამართლოების დეპარტამენტის სასარგებლოდ ჩათვლილი იქნა 37 075 ლარი…
