“დარგობრივი ეკონომიკის კომიტეტზე განვიხილეთ საქართველოს პარლამენტის მშენებლობის ანგარიში, რომელიც იყო წარმოდგენილი სახელმწიფო აუდიტის მიერ. იყო შეკითხვები, როგორ მოხდა თანხების მოპოვება და შემდგომ განკარგვა. თუ რა ფორმით იყო აშენებული, იყო თუ არა ცალკეული პროცედურები დაცული, მშენებლობის ნებართვის აღების კუთხით.
ნებართვის საკითხს რაც შეეხება, არის დარღვეული. ნებართვა არ არის გაცემული. სასახლე განეკუთნება მეხუთე კატეგორიის შენობას თავისი მოცულობიდან გამომდინარე. ამიტომ ამ მიმართულებით უნდა ყოფილიყო შესაბამისი ნებართვა და ხარჯთაღრიცხვები დაცული. სამომავლოდ მსჯელობა გაგრძელდება თუ რა ფორმით მოხდება ამ შენობის ექსპლუატაციაში მიღება და სამართლებრივად ყველა ამ პრობლემის მოგვარება,”_ განაცხადა სახელმწიფო აუდიტის სამსახურის ხელმძღვანელმა ლაშა თორდიამ.
საპარლამენტო უმცირესობის წევრი და ქუთაისის ყოფილი მერი, გიორგი თევდორაძე პარლამენტის შენობის უვარგისობასა და მის მდგრადობაზე წამოწყებულ ყველა საუბარს ერთ მიზანს მიაწერს, ხელისუფლების სურვილს, რომ პარლამენტი ქუთაისში აღარ იყოს.
“ყველა პრობლემა და მოარული ხმები ამ შენობასთან დაკავშირებით არ მომდინარეობს ამ შენობის პროექტიდან ან მისი მდგრადობიდან, ეს არის დაკავშირებული მის ადგილმდებარეობასთან – ქუთაისთან და მის შემკვეთთან _ მიხეილ სააკაშვილთან და ერთიან ნაციონალური მოძრაობის ხელისუფლებასთან, რომელთანაც არის გაიგივებული ეს შენობა.
ეს არის მეხუთე კატეგორიის შენობა და ამაზე ნებართვის გაცემის უფლების მქონე არ იყო თვითმმართველობა. თუკი ხელისუფლებას გააჩნია მზაობა, რომ ამ შენობასთან დაკავშირებით ჭორები შეწყდეს, ამისთვის საჭიროა მხოლოდ რამდენიმე დღიანი მუშაობა, მაგრამ ისინი მანიპულირებას ახდენენ რომ ეს შენობა არ არის მდგრადი და რადიაცული ფონია მაღალი და ზოგადად ქუთაისში არ უნდა იყოს პარლამენტი”_ განაცხადა საპარლამენტო უმცირესობის წევრმა გიორგი თევდორაძემ.
აუდიტის სამსახურის დასკვნა დღეს მთავარ პროკურატურას გადაეგზავნა.
