შალვა შავგულიძე იხსენებს იმასაც, რომ მოწმეებზე იყო გამუდმებული ზეწოლები, რათა მათ სასამართლო პროცესზე ისეთი ჩვენებები არ მიეცათ, რაც იმ მაღალჩინოსნების ინტერესებს დააზიანებდა, რომლებიც ამ საქმეში იყვნენ გარეულები.
ერთ-ერთი მოწმე, რომელიც მაშინ მედიისთვის ნაკლებად იყო ცნობილი და ამჟამად პროკურატურის მიერ წარმოებულ გამოძიებაში საკმაოდ მნიშვნელოვან პერსონად გვევლინება, გახლავთ ზაალ ქურციკაშვილი, რომელიც, როგორც ირკვევა, სანდრო გირგვლიანის ნაცნობი იყო და მომხდარი ინციდენტის დროს “შარდენ ბარში” იმყოფებოდა.
“მიმდინარე გამოძიებით დადგინდა, რომ “შარდენ ბარში” მომხდარი ინციდენტის შემსწრე ზაალ ქურციკაშვილი დადგენილი ჰყავდა იმჟამინდელ გამოძიებას დანაშაულის ჩადენიდან მოკლე დროში. იგი არაერთხელ შეხვდა საქმის მწარმოებელ გამომძიებელს, რომელმაც იგი მოწმის სახით დაკითხა. ქურციკაშვილის ვინაობა და ჩვენების შინაარსი მ. ბაღათურიამ შეხვედრაზე მოახსენა ვანო მერაბიშვილს. თუმცა, ზ. ქურციკაშვილის ჩვენება აღარ არსებობს შინაგან საქმეთა სამინისტროს საგამოძიებო დანაყოფის მიერ წარმოებული გამოძიების მასალებში, ასევე არ მომხდარა მისი შემდგომი დაკითხვა პროკურატურაში გამოძიების ეტაპზე. ამ მოწმის მიერ მიცემული განმარტებების საპირისპიროდ, გამოძიება წარიმართა იმ ვერსიით, თითქოს, დ.ახალაიასა და შინაგან საქმეთა მინისტრის მეუღლის სუფრასთან, გარდაცვლილ ს. გირგვლიანს რაიმე ურთიერთობა ან ინციდენტი არ ჰქონია.” _ ვკითხულობთ პროკურატურის საბრალდებო დადგენილებაში.
შალვა შავგულიძე “გურია ნიუსთან” იხსენებს, რომ მაშინ, ქურციკაშვილის, როგორც მნიშვნელოვანი მოწმის როლი ამ საქმეში არ იკვეთებოდა.
“სიმართლე გითხრათ, ზუსტად არ მახსოვს, მაგრამ როგორც მახსოვს, მისი არსებობის შესახებ ჩვენ შევიტყვეთ სხვა მოწმეთა მიერ მიცემული ჩვენებებიდან და მოვითხოვეთ მისი დაკითხვა სასამართლოზე. მან სასამართლოს მისცა ჩვენება და დაადასტურა ის ფაქტი, რომ ინციდენტის დროს ბარში იყო. ადასტურებდა სანდროს და მაისურაძეს შორის მომხდარ შელაპარაკებასაც და თქვა ისიც, რომ მაისურაძე მოგვიანებით გადაჯდა გირგვლიანის მაგიდასთან. როგორც მახსოვს, მისი ჩვენება იყო ძალიან დაბალანსებული და რაიმე ისეთ მნიშვნელოვან ფაქტს, რაც საქმის არსისთვის გადამწყვეტი შეიძლებოდა ყოფილიყო, არ შეიცავდა. თუმცა, კიდევ ერთხელ გეტყვით, რომ დეტალურად აღარ მახსოვს, რა თქვა მაშინ ქურციკაშვილმა სასამართლოზე,“ _ აცხადებს შავგულიძე.
“ს. გირგვლიანსა და თ. მაისურაძეს შორის მომხდარი შელაპარაკება შეუმჩნეველი არ დარჩა ამავე ბარში მყოფ ს. გირგვლიანის მეგობარს ზაალ ქურციკაშვილს, რომელმაც მოსალოდნელი უსიამოვნების თავიდან არიდების მიზნით, სანდრო გირგვლიანი გამოარიდა შინაგან საქმეთა მინისტრის მეუღლის თ. მერაბიშვილის სუფრას. თუმცა, ს. გირგვლიანმა განაგრძო საყვედურების გამოთქმა. ზაალ ქურციკაშვილმა რამოდენიმეჯერ შენიშვნაც კი მისცა მას და დამშვიდებისაკენ მოუწოდა. მოგვიანებით, თ. მაისურაძე გადაჯდა სანდრო გირგვლიანის მაგიდასთან, სადაც მათ შორის კვლავ გაგრძელდა საუბარი მკვეთრი ჟესტების ფონზე. ერთმანეთს შორის ურთიერთობათა გარკვევისას ს. გირგვლიანმა უცენზურო სიტყვებით მოიხსენია მინისტრის მეუღლის სუფრასთან მჯდომი შინაგან საქმეთა სამინისტროს ერთ-ერთი თანამდებობის პირი, _ ვკითხულობთ პროკურატურის დადგენილებაში.
მისი არსებობა შეუმჩნეველი არ დარჩენია არც მერაბ ბაღათურიას.
მერაბიშვილსა და მ. ბაღათურიას შორის ს. გირგვლიანის დაკრძალვიდან რამდენიმე დღეში კვლავ შედგა შეხვედრა, რომელსაც მათ გარდა, ესწრებოდნენ: დ. ახალაია და ვ. სანოძე. საუბრისას, ს.გირგვლიანის საქმის გამოძიების მიმდინარეობის შესახებ მინისტრის შეკითხვაზე, დ. ახალაიამ უპასუხა, რომ ყველაფერი კარგად იყო. თავის მხრივ, მ. ბაღათურიამ მოახსენა ივ.მერაბიშვილს, რომ გამოძიებას მოძიებული ჰყავდა პიროვნება, რომელიც ინციდენტის დროს იმყოფებოდა “შარდენ ბარში” და იძლეოდა ჩვენებას, ბარში მყოფ ს. გირგვლიანსა და შ.ს. სამინისტროს თანამშრომლებს შორის მომხდარი კონფლიქტის თაობაზე.
მოწმე ადასტურებდა ინფორმაციას, რომ იგი თავად მივიდა ს. გირგვლიანთან და გამოარიდა დ. ახალაიასა და მინისტრის მეუღლის სუფრას, რითაც შეეცადა მათ შორის კონფლიქტის აღმოფხვრას. მიღებულმა ინფორმაციამ გააღიზიანა მინისტრი და განმარტება დ. ახალაიასგან მოითხოვა.
“შარდენ ბარში” მყოფი მოწმის _ ზაალ ქურციკაშვილის ჩვენება, რომელიც თვითმხილველი იყო ს. გირგვლიანსა და დ. ახალაიას სუფრას შორის ინციდენტისა, კატეგორიულად არ შედიოდა ივ. მერაბიშვილის ინტერესებში.
რა მოხდა გამოძიების დროს, რატომ აღარ არსებობს ზ. ქურციკაშვილის ჩვენება შინაგან საქმეთა სამინისტროს საგამოძიებო დანაყოფის მიერ წარმოებული გამოძიების მასალებში და რატომ არ მოხდა მისი შემდგომი დაკითხვა პროკურატურაში, გამოძიების ეტაპზე? _ საზოგადოება, ალბათ, ამ კითხვებზეც მალე გაიგებს პასუხებს…
