“მთელი ქვეყანა ერთმანეთსაა მონატრებული”

ჯგუფის წევრებმა ისაუბრეს ფოლკლორის საღამოს შესახებ, რომელიც მომავალში უნდა გაიმართოს.

ეთერ თათარაიძე, ფოლკლორის სახელმწიფო ცენტრის ზეპირსიტყვიერების მიმართულების ხელმძღვანელი: _ ვაპირებთ, საქართველოს ყველა კუთხეში ჩავატაროთ ფოლკლორის საღამო, შემდეგ კი საუკეთესოები შეირჩევა და თბილისში ჩატარდება დიდი ღონისძიება. გურიაშიც სერიოზულ კვლევებს ვგეგმავთ ზეპირსიტყვიერების მიმართულებით. ჩვენ თითქმის ყველა სოფელს ვეწვევით, რათა მოვიპოვოთ ზეპირსიტყვიერების ნიმუშები _ ლექსები, ლეგენდები, ლოცვა, ანდაზა, მითი და სხვა. იმედია, კულტურის ცენტრისა და ადგილობრივი ხელმძღვანელობის თანადგომით, საინტერესო და ნაყოფიერ ექსპედიციას ჩავატარებთ, რის შედეგადაც მივიღებთ სრულყოფილ მასალას, რითაც წარვდგებით საზოგადოების წინაშე. მთელი საქართველო ერთმანეთსაა მონატრებული. ურთიერთობების აღსადგენად და გასაღრმავებლად ასეთი სახის ღონისძიებები ძალიან მნიშვნელოვანია. ვაპირებთ იუმორის საღამოს ჩატარებასაც _ ერთ ტურს ჩავატარებთ გურიაში, ხოლო რჩეულებს წავიყვანთ თბილისში. ასე რომ, დავიწყოთ ამ მეტად საჭირო და სასარგებლო საქმისთვის მზადება, უფრო მეტად გავაცოცხლოთ საქართველოს ყველა კუთხე და კვლავ წარმატებით გავაგრძელოთ ჭეშმარიტი ეროვნული საქმე, რომელსაც ნაყოფიერად უძღვებოდა ამ საქმისთვის თავდადებული ადამიანი _ ვახუშტი კოტეტიშვილი.

საექსპედიციო ჯგუფის წევრები ჩოხატაურიდან აჭარის მაღალმთიან სოფლებში გაემგზავრნენ, შემდეგ კი ისინი ისევ გურიას ეწვევიან.