დროებითი საგამოძიებო საპარლამენტო კომისიის ხელმძღვანელი ნოდარ ებანოიძე აუდიტის სამსახურის შესახებ ანგარიშზე საუბრისას აღნიშნავს, რომ ძალიან ბევრი საკითხი არსებობს, რომლითაც სამართალდამცველი უწყებები უნდა დაინტერესდნენ.
“აუდიტის სამსხური ყველაფერს აკეთებდა იმისთვის, რომ არაფერი გაეკეთებინა, არ ამოწმებდა იმ ობიექტებს, რომელთა შემოწმებაც მას კანონით ევალებოდა. აუდიტის სამსახური არ ატარებდა შემოწმებებს. თუმცა, არის რიგი კვალიფიციურად შემოწმებული ობიექტები, რომელიც თაროებზე იდო”, _ განაცხადა ნოდარ ებანოიძემ.
გენერალური აუდიტორი, ლაშა თორდია საპაუხოდ აცხადებს,რომ ისე ცუდათაც არ არის საქმე, როგორც ეს ანგარიშშია წარმოდგენილი.
_ ბატონო ლაშა, პარლამენტში, მოხსენებით გამოსვლისას განაცხადეთ, რომ მთლად ისე ცუდადაც არ არის კონტროლის პალატაში საქმე, როგორც ეს საპარლამენტო კომისიის მიერ წარმოდგენილ ანგარიშში წერია. განსაკუთრებული ყურადღება გაამახვილეთ საერთო სასამართლოების შესახებ აქტზე, რომელზეც თითქოს ხელოვნურად იყო შექმნილი აჟიოტაჟი. ამ აქტში საკმაოდ ბევრი დარღვევა იყო დაფიქსირებული, რომელსაც რეაგირება არ მოჰყოლია. თუნდაც ის ფაქტი, რომ დასრულებული აქტი, კონტროლის პალატაში 2 წლის განმავლობაში ვიღაცის უჯრაში ინახებოდა, როგორ ფიქრობთ, არ იყო დარღვევა?
_ ეგ ნამდვილად ძალიან ცუდი ფაქტია და რომ მოვიკითხე რატომ იყო ასე დიდი ხანი დაუმტკიცებელი ეს აქტი, აღმოჩნდა, რომ მიზეზი სწორედ ის იყო, რაზეც მე ვილაპარაკე. ის მასალები, რაც შიგნით იყო ასახული, აღმოჩნდა, რომ არ შეესაბამებოდა…. (მცირე პაუზის შემდეგ, ლაშა თორდიამ შეცვალა აზრი. ავტ)
… კი შეესაბამებოდა, მაგრამ რეალობა ზუსტად ისე არ იყო, როგორც აქტში ჰქონდათ ასახული ანუ თითქოს 2 მილიონი თუ 3 მილიონი ლარი იყო მითვისებული და ამ დროს ის საქონელი თუ ქონება, რომელზეც ეწერა, სხვადასხვა სასამართლოში იყო გადანაწილებული. აქ იმაზე კი არ იყო საუბარი, რომ ვიღაცამ სახლში წაიღო, უბრალოდ, ბუღალტერმა არ აღრიცხა სწორად. ეს ადამიანი ზუსტად ამის გამო სახლში გაუშვეს.
_ სწორედ ეგ ეწერა იმ აქტში, რომ დოკუმენტაციაში არ იყო აღრიცხული, აუდიტორები დოკუმენტაციას ამოწმებდნენ და სასამართლოებში ვერ ჩამოივლიდნენ ამ ქონების შესამოწმებლად. საერთო სასამართლოების დეპარტამენტის თავმჯდომარე, დიმიტრი გეგელია ჩემთან ინტერვიუში არ უარყოფს, რომ იყო ხარვეზები. მაგალითად სამხარაულის ექსპერტიზის ბიუროსთვის არამიზნობრივად გადარიცხული თანხები ავიღოთ, როცა თანხა ერიცხებოდათ იმ დასკვნებისთვის, რომლის საფასური მხარეებს უკვე გადახდილი ჰქონდათ.
_ მაგაზე მე არ ვკამათობ, ეგ ყველაფერი წერია იმ აქტში და თუ არის დანაშაულის ნიშნები, პროკურატურას აქვს ეგ მასალები და მოიკვლევენ. საუბარი მქონდა იმ ინფორმაციაზე, თითქოს, 2 მილიონი, რომელიც გამქრალი იყო, მე მაგას ვმალავდი უჯრაში.
_ უპირველეს ყოვლისა, თქვენს პერიოდში არ ხდებოდა ეგ ამბავი, ლევან ბეჟაშვილი იყო მაშინ კონტროლის პალატის თავმჯდომარე და მეორე, საუბარი იყო არა მილიონების, არამედ აქტის დამალვაზე. აქტი ხომ ნამდვილად იდო თაროზე?
_ ეს აქტი მართლაც იქ იდო, ამოვიღე და დავინტერესდი, რა ხდებოდა ამ აქტში ისეთი, ასეთი აჟიოტაჟი რომ გამოიწვია. ამის შემდეგ გავეცი დავალება, რომ დაუყოვნებლივ, მალე დაესრულებინათ ეს პროცედურა და ვეძებდი ხალხს, ვინც უშუალოდ ამ აქტის შემსრულებლები იყვნენ. ნამდვილად დასასრულებელი იყო. ხელმოწერა არც აქვს ყველა აუდიტორს გაკეთებული…
(აუდიტორები, რომლებზეც ლაშა თორდია საუბრობს, სწორედ ამ აქტზე მუშაობის პროცესში, სხვადასხვა მიზეზით გამოუშვეს კონტროლის პალატიდან, მათ შორის იყო აუდიტის ჯგუფის ხელმძღვანელიც. გთავაზობთ ამონარიდს გია ტუხაშვილის, ინტერვიუდან: გია ტუხაშვილი: “შემოწმებისას, ბევრი დარღვევა აღმოვაჩინეთ, მაგრამ ძირითადი ის იყო, რომ დაახლოებით 3 მილიონის დოკუმენტები გაქრა, დაფიქსირდა დანაკლისი. საწყობში ჰყავდათ ადამიანი, რომელიც სასაქონლო ზედნადებს წერდა ერთ ეგზემპლარად. საქონლის შეძენა ფიქსირდებოდა, მაგრამ გაცემა – აღარ. რომელ სასამართლოში რა ინვენტარი დადეს, არსად ფიქსირდებოდა, არც ინვენტარიზაცია ჩაუტარებიათ.
ამ სამი მილიონის ჩამოწერა მოინდომეს ერთ დღეს; მერე რა ქნეს, ეს აღარ ვიცი, გამომიშვეს სამსახურიდან. მე არ დამისრულებია ამ აუდიტზე მუშაობა. ერთ მშვენიერ დღეს, დამიბარეს და მითხრეს, განცხადება უნდა დაწერო და წახვიდეო. ასე შემომითვალა ბეჟაშვილმა თავისი მოადგილის, თარხნიშვილის პირით…” ავტ.)
ერთ-ერთი აუდიტორი, რომლის ხელმოწერაც უნდა ყოფილიყო, გარდაიცვალა სამწუხაროდ…
_ ის აუდიტორი, ვისზეც თქვენ ახლა საუბრობთ, სოსო ჩიქობავა იყო და ის მოკლეს…
_ მოკლეს, დიახ და მერე მაგაზეც იყო საუბარი, თითქოს რაღაც კონტროლის პალატიდან იყო შეკვეთილი და ასე შემდეგ… ერთი სიტყვით, ძაან სკანდალური აქტი გამოვიდა. შესაბამისად, ვერც ჩავასწორე წესიერად და მაგას ვამბობ, რომ ის, რაც იქ არის ასახული, ყველაფერი რეალობა არ არის.
_ საპარლამენტო კომისიის მიერ წარმოდგენილი ანგარიშის თანახმად, თქვენ გემსახურებოდათ ორი ავტომანქანა და თვეში მინიმუმ, 800 ლიტრს საწვავს ხარჯავდით. რაში გჭირდებოდათ ეს ყველაფერი? ასე იყო ნამდვილად, თუ საპარლამენტო კომისიას შეეშალა რამე?
_ ზუსტად მაგაზეა საუბარი, არ იყო აღრიცხვის სწორი სისტემა. როგორ შემეძლო მევლო ორი მანქანით? ორ მანქანაზე ნამდვილად ვერ დავჯდებოდი. აქ არის საუბარი საწვავის აღრიცხვაზე და ასე შემდეგ, არც ეგ არის ის თემა, რომელიც შეიძლება გახდეს პრობლემატური. ზუსტად იმის გამო, რომ ეს საკითხები დაისვა და მეც ვნახე, რომ მორიგე მანქანებში არ იყო გადანაწილებული ზუსტად რაღაც, თუმცა ცალკეული დეპარტამენტის უფროსები დადიოდნენ და მიწერილი იყო ჩემზე ან სხვაზე, ამაზეა საუბარი. ახლა გადავედით ელექტრონულ ბარათებზე და ზუსტად აღირიცხება, რამდენ კილომეტრს გადის, როგორ აღირიცხება ბენზინი და ტალონებით არც გადანაწილება მოხდება და არც სხვაზე მიცემა. კონკრეტულ მანქანაზე კონკრეტულად განპირობებულია საწვავი და თუ ეს საწვავი დარჩება, გადავა მეორე თვეზე, რითაც გაკეთდება ეკონომია. ამიტომ, კითხვის ნიშნები თავიდან ბოლომდე მოიხსნება და მორჩება ლაპარაკი იმაზე, რამდენი მანქანა მეყოლება და რამდენ ბენზინს დავწვავ.
_ მიუხედავად არაერთგზის მცდელობისა, წინასაარჩევნო პერიოდში არ მოგვეცა საშუალება თქვენი კომენტარი მოგვესმინა იმ ბრძანების შესახებ, რომელიც თქვენ გენერალურ აუდიტორად დანიშვნისთანავე გამოუშვით და წინასაარჩევნო პერიოდში, მედიას მკაცრი რეგულაციები დაგვიწესეთ:
“მაუწყებლებმა და გაზეთებმა ანგარიშსწორების შესახებ ინფორმაცია უნდა მიაწოდონ სახელმწიფო აუდიტის სამსახურს ანგარიშსწორების განხორციელებიდან არა უგვიანეს 24 საათისა.“ _ ასეთი ბრძანება, რომელიც არჩევნების შემდეგ სასამართლომ გააუქმა. რაში დაგჭირდათ ასეთი ბრძანების გამოცემა?
_ სასამართლომ მხოლოდ ერთ ნაწილში გააუქმა ბრძანება ანუ მედიას აღარ აქვს ვალდებულება, წარმოადგინოს ჩემთან ინფორმაცია. თუმცა, იმაზე დატოვა, რომ პარტიებმა წინასწარ გადაიხადონ და წარმოადგინონ დეკლარირება. იცით რატომ გაკეთდა ეს? იმიტომ, რომ კონკრეტული ტელევიზიები უფასოდ უკეთებდნენ რელკამირებას კონკრეტულ პარტიებს და შემდგომში, ამ თანხის გადახდა ან მოხდებოდა, ან _ არა. ჩვენი ფუნქცია კი იმაში მდგომარეობს, რომ შეღავათიანი პირობები არ ჰქონდეს რომელიმე განსაკუთრებულ ერთ ან ორ პარტიას. ამის გარდა, არსებობს ათი პარტია, რომელსაც არ უკეთებენ უფასო რეკლამებს ეს ტელევიზიები. თუ ეს ორი არ იხდის, მაშინ არც სხვებმაც უნდა გადაიხადონ, ხომ ლოგიკურია?
რამდენად სწორია და არასწორია, თქვენ, ჟურნალისტებმა განსაჯეთ.
_ ჩვენ ვცდილობდით მაგის გაგებას, მაგრამ არც თქვენ და არც თქვენი წარმომადგენლები კონტაქტზე არ გამოდიოდით და თქვენს მიერ მიღებულ ბრძანებაზე სხვას ვის შეეძლო განმარტებების გაკეთება?
_ დიახ, პრობლემა ნამდვილად იყო იმაში, რომ ჩვენ არ გვქონდა კომუნიკაცია მედიასთან და არ ვუხსნიდით, რა და რატომ ხდებოდა.
_ როგორ აპირებთ მედიასთან ურთიერთობის გაგრძელებას, ძველ რეჟიმში?
_ არა, მედიასთან ურთიერთობას ვაპირებ ძალიან ხშირად, ოღონდაც მინდა, რომ სისტემა ჩამოვაყალიბო ბოლომდე და პრეზენტაცია გავაკეთო, რა მინდა საბოლოო ჯამში. ახლა ვებგვერდის განახლებისთვის დაქირავებული მყავს ადამიანი, სადაც ხელმოწერის დღიდანვე გამოქვეყნდება აქტები და არავინ იტყვის, რომ უჯრაში ვინახავთ ან ვმალავთ სადმე. ყველა კონკრეტულ აქტთან დაკავშირებით, სადაც სასაუბრო იქნება, მოგიწვევთ და ინფორმაციას მოგაწვდით.
ნამდვილად პრობლემა იყო, რომ არ გვქონდა ურთიერთობა მედიასთან და საზოგადოებასთან. პირობას გაძლევთ, რომ ეს აუცილებლად გამოსწორდება. ამის გარეშე, შეუძლებელია, რომ ის იმიჯი, რომელიც დღეს ძალიან შელახული აქვს სახელმწიფო აუდიტის სამსახურს აღდგეს და ამისთვის ყველაფერს გავაკეთებ.
_ თქვენც იზიარებთ, ლევან ბეჟაშვილის განცხადებას იმის შესახებ, რომ აუდიტის სამსახურის იმიჯი მას შემდეგ შეილახა, რაც მას პოლიტიკური პარტიების ფინანსური მონიტორინგის სამსახური დაემატა?
_ მაგას ვიძახი მე, მაგას ვიძახი! მაგან დააზიანა სახელმწიფო აუდიტის სამსახური…
