“გურია ნიუსი” რუსუდან ბერიაშვილს დაუკავშირდა, რომელიც საექსპერტო ჯგუფში სახალხო დამცველის ინიციატივით, ალტრენატიული ექსპერტის სტატუსით იყო ჩართული. ბერიაშვილმა ექსპერტიზის შედეგებზე კომენტარი არ გააკეთა.
_ სისხლის სამართლის საპროცესო კოდექსის მიხედვით ხელწერილი მაქვს დადებული, მაგრამ რა ინფორმაცია შემიძლია მოგაწოდოთ, რაც თქვენ გამოძიებისგან არ გაქვთ? მიმართეთ გამოძიებას და ყველა ინფორმაციას მიიღებთ.
_ გამოძიება არ ასაჯაროვებს ექსპერტიზის შედეგებს.
-თუ გამოძიება არაფერს ამბობს, ესე იგი, გამოძიების ინტერესებიდან გამომდინარე მოქმედებს და ამაზე მეტს მე ვერაფერს გეტყვით.
შს სამინისტროს პრესსამსახურის ხელმძღვანელის განცხადებით, ლაფანყურის საქმეს ცალკეული დოკუმენტების გარდა, გრიფით “საიდუმლო” არ ადევს, თუმცა, შს მინისტრი ამ საქმეზე საუბრისას ყოველთვის მოკლე და ზოგადი კომენტარებით შემოიფარგლება. წინასწარ დაანონსებული სკანდალური ვერსიის ფონზე, რამაც მოგვიანებით სახალხო დამცველის ანგარიშშიც ჰპოვა ასახვა, გამოძიებას ჯერ-ჯერობით არავინ დაუკავებია. მათ შორის, კვლავ მოწმის სტატუსით იკითხებიან კონტრდაზვერვის სამსახურის ის თანამშრომლებიც, რომლებიც თავიდანვე გამოცხადდნენ დამნაშავეებად. რამდენიმე მათგანი ამ დრომდე ინარჩუნებს სამსახურს, ზოგიც ახალი მინისტრის ხელში დაწინაურდა.
პანკისის ხეობაში ლაფანყურზე უკვე იშვიათად ლაპარაკობენ. აქაურ მოსახლეობას ბევრი სოციალური პრობლემა აწუხებს, გარდა ამისა, ისინი ფიქრობენ, რომ დამნაშავეს შარიათული სასამართლო გამოავლენს და შესაბამის განაჩენსაც გამოუტანს.
ლაფანყურში შეიარაღებული ჯგუფის წევრების ლიკვიდაციასთან დაკავშირებით სხვადასხვა ვერსია ვრცელდება; ბევრს სჯერა, რომ ახალგაზრდები მძინარეები დახოცეს,ზოგიც ზურგიდან, ღალატით სიკვდილზე საუბრობს.
“ჩვენ გვინდა, ექსპერტიზამ ყველა ამ კითხვას გასცეს პასუხი და ბოლოსდაბოლოს გავიგოთ, როგორ დახოცეს ჩვენი შვილები,” _ უთხრა “გურია ნიუსს” გარდაცვლილი ბაჰაუდინ ალდამოვის მამამ გვამების ექსჰუმაციის დღეს.
ექსპერტიზის ჩატარება 8 თვის შემდეგ ბევრმა დაგვიანებულად ჩათვალა. გვამების შორსწასული ლპობის გამო, ღირებული ინფორმაცია დაიკარგა, თუმცა, ამის მიუხედავად, ჭირისუფლები, საკუთარი რელიგიის საწინააღმდეგოდ, ცხედრების ამოთხრას დათანხმდნენ.
“ძილის დროს მოხდა მათი ლიკვიდაცია თუ საბრძოლო გადაადგილების დროს, ამის გარკვევა რთული საქმე იქნება. ფაქტობრივად, ამას ექსპერტი ვერ დაადგენს, ეს გამოძიების გასარკვევია. მაგრამ ექსპერტს შეუძლია თქვას, რა დაზიანება იყო, სად იყო ის განლაგებული და ეს იმ შემთხვევაში, თუ რბილი ქსოვილები და განსაკუთრებით კანი, არ არის ისეთი ლპობის პროცესში, რომ რაიმეს გარჩევა შეუძლებელი იყოს.
ყურადსაღებია გარემოება: ეს გვამები ადრე გაკვეთილი იყო თუ არა. ამბობენ, რომ დასკვნა დაწერილია, მაგრამ არავის უნახავს არც დასკვნა და არც გაკვეთილი გვამი. საექსპერტო ბიურო რამდენადაც ვიცი, კომენტარს არ აკეთებს, ეს არის სახელმწიფო საექსპერტო დაწესებულება და უნდა თქვას, გვამები იყო თუ არა გაკვეთილი და შესაბამისად, ინახება თუ არა მათთან დასკვნა. მათი მხრიდან დუმილი მეტ ეჭვს აჩენს,” _ უთხრა სასამართლო -სამედიცინო ექსპერტმა ალექსანდრე გეჯაძემ “გურია ნიუსს”.
გავრცელებული ინფორმაციით, ლაფანყურის სპეცოპერაციის წლისთავზე, შს სამინისტრო გამოძიების მიმდინარეობის შესახებ გარკვეულ ინფორმაციას გაასაჯაროვებს. სავარაუდოდ, სწორედ ამ დროს გახდება ცნობილი სასამართლო-სამედიცინო ექსერტიზის შედეგიც.
