ქალაქის ორი ვიცემერის პოსტი ამ დროისთვის ვაკანტურია _ რეორგანიზაციის სახელს ამირან ძოწენიძის და კოტე რატიანის სკამები შეეწირა.
ადგილობრივი თვითმმართველობა საკადრო წმენდას რეორგანიზაციას უწოდებს და გათავისუფლებულებს შანსს აძლევს, სამსახურისთვის საატესტაციო კონკურსზე იბრძოლონ. თუმცა, თანამდებობებიდან გაშვებულებს და როგორც თავად უწოდებენ თავიანთ თავს, “ქუჩაში გამოყრილებს” სასამართლო გზით ურჩევნიათ სამსახურეობრივი დავების გადაჭრა.
ამირან ძოწენიძე მის გათავისუფლებაში სააატესტაციო კომისიის ერთ-ერთი წევრს ზურაბ ხურციძეს ადანაშაულებს და აცხადებს, რომ ხურციძე მათ ჯერ კიდევ არჩევნებამდე ემუქრებოდა: თუ მის შვილს არ დაასაქმებდნენ, მაშინ “ნაციონალური მოძრაობის” წევრების წინააღმდეგ გარკვეული სახის ღონისძიებებს გაატარებდა.
არასამთავრობო ორგანიზაცია “საჩინოს” ხელმძღვანელი ზურაბ ხურციძე ამ ბრალდებებს უსაფუძვლოს და პოლიტიკურად მოტივირებულს უწოდებს და ამბობს, რო “მისმა ორგანიზაციამ პირველმა დაიწყო ბრძოლა ქალაქის “ნაციონალი” მერის გადასაყენებლად, რომლის ხარჯზე ბევრი ხელს ითბობდა. სწორედ ეს ვერ აპატიეს მას “ნაციონალური მოძრაობის” წევრებმა.”
თუმცა, ამირან ძოწენიძე ქუთაისის მერიაში ნეპოტიზმის ფაქტზეც საუბრობს და აღნიშნავს რომ რეორგანიზაციის ფარგლებში, ერთ-ერთი სამსახურის უფროსად, სწორედ ზურაბ ხურციძის შვილი ხათუნა ხურციძე დაინიშნა.
“საჩინოს” ხელმძღვანელს ამ საკითხზე თავისი პასუხები აქვს: “ზურაბ ხურციძე რა შუაშია მთავრობასთან ან მაგათ გათავისუფლებასთან? არც მერი ვარ, არც ვიცემერი. თუმცა, ჩემი შვილობა არ ნიშნავს, რომ სადმე არ დაიწყო მუშაობა. ამ საკითხებთან არაფერ შუაში ვარ. ვარ “საკონკურსო საატესტაციო” კომისიის წევრი არასამთავრობო ორგანიზაციის სახელით. ჩემი მისამართით მსგავსი განცხადებების კეთდება იმიტომ, რომ მე დავიწყე პირველმა ქალაქის მერის გადაყენების საკითხზე ფიქრი და ბოლოს ეს გავახორციელეთ კიდეც _ “ერთიან ნაციონალურ” მოძრაობას ხელში არ ჩავუგდეთ ქალაქი. ისინი ხელს ითბობდნენ ქუთაისის მერის თანამდებობაზე ყოფნით და ვერ აიტანეს, რომ მისი სახით საყრდენი გამოვაცალეთ. სწორედ ამიტომ კეთდება ჩემი მისამართით დღეს ეს განცხადებები,” _ აღნიშნა არასამთავრობო ორგანიზაცია “საჩინოს” ხელმძღვანელმა და მერიის საკონკურსო საატესტაციო კომისიის წევრმა, ზურაბ ხურციძემ.
ქალაქის ვიცე-მერები დღეს დილით, მერის დიმიტრი კოპალიანის ბრძანებით გაათავისუფლეს და ბრძანების ფურცელში გათავისუფლების მიზეზად, თანამდებობრივი მოვალეობების უხეშად დარღვევა ჩაუწერეს. ამირან ძოწენიძის თქმით, მას დასუფთავების სამსახურის ბიუჯეტის მილიონ 400 000 ლარით დაგეგმვას, ხოლო კოტე რატიანს კიკვიძისა და რამდენიმე ქუჩაზე მიმდინარე სამუშაოებისთვის თანხების არგაცემას ედავებიან; ქალაქის მერიაში კი მათ გათავისუფლებას მიმდინარე რეორგანიზაციით ხსნიან.
ვინ გახდება რეორგანიზაციული წმენდის მორიგი სუბიექტი, ვის დასდებენ ბრალს პოლიტიკური ნიშნით გათავისუფლებებში და დასრულდება თუ არა ერთთვიანი რეორგანიზაცია, ამაზე ზუსტი პასუხი, როგორც ჩანს, არც რეორგანიზაციის ავტორებს არ აქვთ.
