ბრალდებულებს ბრალი ედებოდათ სხვადასხვა მძიმე და განსაკუთრებით მძიმე დანაშაულების ჩადენაში. მიუხედავად ამისა, ახალციხის რაიონული სასამართლოს მოსამართლე გოჩა ჯეირანაშვილმა მამუკა ხვედელიანის, სერგო სამსონიძის, ალექსანდრე ბლიაძის, გიორგი ბლიაძისა და გიორგი ლომიძის მიმართ გამამართლებელი განაჩენი გამოიტანა.
პროკურატურაში აცხადებენ, რომ დასაბუთებული განაჩენი ჯერ არ მიუღიათ. განაჩენის მიღების შემდეგ გადაწყდება მისი გასაჩივრების საკითხი.
პროკურატურა სასამართლოსკენ იშვერს ხელს, სასამართლო კი გამოძიების არაკომპეტენტურობაზე მიუთითებს. გაუპატიურება-წამებაში გამართლებული პოლიციის მაღალჩინოსნები ამ დრომდე კომენტარს არ აკეთებენ, პარალელურად კი ბორჯომში ვრცელდება ინფორმაცია, რომ პატიმრობიდან ახლად გათავისუფლებული პოლიციის ყოფილი უფროსი მოტოციკლეტით გადაადგილდება და ხალხს იარაღით აშინებს. ამ ინფორმაციას “გურია ნიუსთან” კატეგორიულად უარყოფს ხვედელიანის ადვოკატი.
“გურია ნიუსის” ინფორმაციით, ხვედელიანს ერთ-ერთი დაზარალებული შვილის მკვლელობაში ადანაშაულებს და ამ საქმეს ახლა პროკურატურა იძიებს. დეტალებს ამ საქმის შესახებ, “გურია ნიუსი” მოგვიანებით შემოგთავაზებთ.
დაზარალებულების განცხადებით, მოსამართლე გოჩა ჯეირანაშვილის ხელში რაიმე სამართლის მიღწევა შეუძლებელი იყო. მათივე განცხადებით, ის ვანო მერაბიშვილის ერთგული კადრი იყო სამცხე-ჯავახეთში.
საკმაოდ საინტერესოა გოჩა ჯეირანაშვილის ავტობიოგრაფიული მონაცემები, რომელიც ასე გამოიყურება:
იუსტიციის საბჭოს ვებგვერდზე მოცემული მონაცემებით, გოჩა ჯეირანაშვილი 2002 წლიდან 2009 წლის ჩათვლით პოლიციის სტრუქტურაში მუშაობდა.
2002-2004 წლებში მუშაობდა ახალციხის შს რაიონული განყოფილების კრიმინალური პოლიციის არასრულწლოვანთა საქმეების უფროს ინსპექტორად.
2004-2005 წლებში მუშაობდა სამცხე-ჯავახეთის სამხარეო შს მთავარი სამმართველოს კრიმინალური პოლიციის სს სამძებრო სამმართველოს კორუფციასთან ბრძოლის განყოფილების უფროსი ინსპექტორად.
2005-2006 წლებში სამცხე-ჯავახეთის სამხარეო შს მთავარი სამმართველოს სს სამძებრო განყოფილების გამომძიებლად.
2006-2007 წლებში ახალციხის რაიონის შს განყოფილების კრიმინალური პოლიციის ჯგუფის უფროს გამომძიებლად.
2007-2009 წლებში სამცხე-ჯავახეთის საოლქო პროკურატურის საგამოძიებო ნაწილის უფროს გამომძიებლად.
ამავე პერიოდში, მამუკა ხვედელიანი გახლდათ სამცხე-ჯავახეთის მთავარი სამმართველოს ბორჯომის სამმართველოს უფროსი.
“გურია ნიუსი” ამასთან დაკავშირებით დაუკავშირდა უზენაესი სასამართლოს პრესსამსახურს. ჩვენი კითხვა მდგომარეობდა შემდეგში:
“მაშინ როდესაც მოსამართლე გოჩა ჯეირანაშვილი მუშაობდა სამცხე-ჯავახეთის საოლქო პროკურატურის საგამოძიებო ნაწილის უფროს გამომძიებლად, მამუკა ხვედელიანი იყო ბორჯომის სამმართველოს უფროსი. აღნიშნული უწყება ექვემდებარებოდა იმ უწყებას, სადაც მუშაობდა ჯეირანაშვილი, ანუ საოლქო პროკურატურა უწევდა ზედამხედველობას.
ხომ არ ფიქრობთ, რომ გოჩა ჯეირანაშვილს არ უნდა განეხილა იმ ადამიანების საქმე, რომელიც იმ უწყებას ექვემდებარებოდა, სადაც თავად მუშაობდა და სავარაუდოდ, მათ გარკვეული ურთიერთობები ექნებოდათ ერთმანეთთან?“
უზენაეს სასამართლოში გაგვიცხადეს, რომ ამ საკითხზე მათ კომენტარის გაკეთება არ სურთ.
უწყებათა დაქვემდებარების შესახებ კი მთავარ პროკურატურაში განმარტავენ:
“ბორჯომის პოლიციის სამმართველო არის სამცხე-ჯავახეთის პოლიციის მთავარი სამმართველოს შემადგენელი ნაწილი, ხოლო რაც შეეხება პროკურატურას, პროკურატურა მთელს სამმართველოში ზედამხედველობას უწევს იმ ორგანოებს, სადაც მიმდინარეობს საგამოძიებო მოქმედებები, მათ შორის პოლიციასაც.”
სტრუქტურულად, სამცხე-ჯავახეთის საოლქო პროკურატურაც ზედამხედველობას უწევდა სამცხე-ჯავახეთის პოლიციას, რომლის შემადგენელი ნაწილი იყო ბორჯომის პოლიცია.
აქედან გამომდინარე, რთული დასაჯერებელია, რომ ჯეირანაშვილსა და ხვედელიანს შორის თუ ახლო მეგობრული არა, კოლეგიალური ურთიერთობები მაინც არ ყოფილიყო.
გოჩა ჯეირანაშვილი ძალიან მალევე, 2009 წელს დაინიშნა წალკის რაიონული სასამართლოს მოსამართლედ და მივლინებული იყო ახალციხის რაიონულ სასამართლოში მოსამართლის უფლებამოსილების განსახორციელებლად. ამავე წლის აპრილიდან ის ახალციხის რაიონული სასამართლოს მოსამართლედ დაინიშნა.
სწორედ მისი სასამართლოს თავმჯდომარეობის პერიოდში “მოღვაწეობდა” პოლიციის სამმართველოს უფროსი მამუკა ხვედელიანიც და ყველა ის ფაქტი, რაზედაც პროკურატურა პოლიციის მაღალჩინოსნებს უყენებდა, სწორედ ამ პერიოდში ხდებოდა.
ჩვენი წყაროს ცნობით, გოჩა ჯეირანაშვილი დაახლოებული პირი იყო ვანო მერაბიშვილის ყოფილ მოადგილესთან, ამირან მესხელთან, რომელიც ამჟამად ძებნაში იმყოფება.
ამირან მესხელი ვანო მერაბიშვილის მოადგილე იყო წლების განმავლობაში, ის მერაბიშვილის მარჯვენა ხელად ითვლებოდა. მესხელი კურატორობდა უშიშროების სამსახურს, მას ემორჩილებოდა სოდ-ი, კუდ-ი და სხვა კიდევ რამდენიმე დეპარტამენტი. მესხელი მონაწილეობდა სვანეთში ევგენი აფრასიძის ოჯახის წინააღმდეგ ჩატარებულ სპეცოპერაციაში, რომელიც მსხვერპლით დასრულდა. ამ სპეცოპერაციის ჩატარების დროს, 24 მარტს ვანო მერაბიშვილი უშიშროების საბჭოს მდივანი იყო, მესხელი კი მისი მოადგილე.
