შეხვედრა შეკვეთილში დაახლოებით 17:00 საათზე დაიწყო და მედიის წარმომადგენლებისთვის დახურული აღმოჩნდა. როგორც ჩვენთვის გახდა ცნობილი, დავით უსუფაშვილი და დავით ბაქრაძე კომენტარებს ქუთაისში, საქართველოს პარლამენტში გააკეთებდნენ.
პირველი კომენტარი 20:00 საათზე დავით ბაქრაძე გააკეთა. მან შეხვედრა პოზიტიურად შეაფასა და ჟურნალისტებთან საუბრისას განაცხადა, რომ ხელისუფლებასთან და ოპოზიციას შორის დიალოგი აუცილებელია.
“ის, რომ დიალოგი შედგა, პოზიტიურად უნდა შეფასდეს. ხელისუფლებასაც და ოპოზიციასაც ეკისრება პასუხისმგებლობა, რომ ქვეყანა შერიგების და დიალოგის გზით ატაროს. ჩვენს ქვეყანას ახლა დამშვიდება სჭირდება. ეს შეხვედრა იქნება სიგნალი როგორ უცხოელი ინვესტორებისათვის, ისე შიდა საზოგადოებისათვის. მსგავსი ტიპის შეხვედრები საჭიროების შემთხვევაში, მომავალშიც გაიმართება.
შეხვედრაზე შევთანხმდით იმაზე, რომ უახლოეს პერიოდში შეიქმნება სახელმწიფო საკონსტიტუციო კომისია, რომელშიც უმცირესობის წევრებიც იქნებიან წარმოდგენილი. კომისია საქართველოსათვის მომავალი 10-15 წლის განმავლობაში ოპტიმალური კონსტიტუციის მოდელის შემუშავებაზე არაფორსირებულ რეჟიმში იმუშავებს”. _ განაცხადა ბაქრაძემ.
მეორე საკითხი, რომელზეც მხარეებმა შეთანხმების მიღწევა შეძლეს, “ნაციონალური მოძრაობის” წინასაარჩევნო კამპანიის დაფინანსებას შეეხება. ბაქრაძის თქმით, პარტიის რამდენიმე შემომწირველი პოლიციაში იყო დაბარებული, თუმცა შეთაანხმების პირობის მიხედვით, “ნაციონალების” ფინანსურ მხარდამჭერებს პოლიციაში აღარ დაიბარებენ.
დავით ბაქრაძის ინფორმაციით, მესამე საკითხი, რომელსაც საუბარი შეეხებოდა, “ნაციონალების” მიერ საპარლამენტო ცხოვრებისათვის გამოცხადებული ბოიკოტის შეწყვეტას შეეხებოდა. როგორ ბაქრაძე ამბობს, ამ ეტაპზე ეს შესაძლებელია და მისი რეკომენდაცია უმცირესობის მიმართ პარლამენტში დაბრუნება იქნება, თუმცა ბაქრაძე აქვე აღნიშნავს, რომ ბოიკოტის შეწყვეტის შესახებ გადაწყვეტილებას უმცირესობა შიდა კონსულტაციების შედეგად მიიღებს.
შეხვედრის დეტალებზე კომენტარი არ გაუკეთებია პარლამენტის თავმჯდომარეს, დავით უსუფაშვილს. ჩვენს მიერ მოპოვებული ინფორმაციით, შეკვეთილში შემდგარ შეხვედრაზე მან და პრემიერ-მინისტრმა გააგრძელეს თათბირი.
