“100 000 ლარიან კლიპზე უარი ვთქვი და ეს ფული ონკოჰემატოლოგიურ ბავშვებს მოხმარდება”

აი, ეს არის ჩვენი ამოცანა, რომ მოვიცვათ მთელი მწკრივი დაწყებული პროფილაქტიკიდან, დამთავრებული დაავადების სწორი მართვით. ეს სწორი მართვა არ გულისხმობს მხოლოდ დიაგნოსტიკას და მკურნალობას, მოიცავს ხარჯეფექტურ მკურნალობას, პერსონალის გადამზადებას, შესაბამისი აღჭურვილობის შეძენას და ასეთი სტრუქტურების ეფექტურ მენეჯმენტს.  ასეთ ფართო ფრონტის გეგმა გვაქვს  განსახორციელებელი და პირველ შეთანხმებებს მივაღწიეთ კიდეც. ეს ყველაფერი აქტიურ ფაზაში გადავა სექტემბრის მეორე ნახევრიდან.” _ აცხადებს “გურია ნიუსთან” ინტერვიუში ჯანდაცვის მინისტრი დავით სერგეენკო.

რის ხარჯზე ხორციელდება საყოველთაო ჯანდაცვა და რა იქნება ის პრიორიტეტები, რისთვისაც თანხები დაიზოგება?

_ ბატონო დავით, სახელმწიფოს საყოველთაო ჯანდაცვის პროგრამა, ალბათ იაფი არ უჯდება. საიდან მოხდა თანხის აკუმულირება, რას დააკელით ბიუჯეტი და როგორ მოხდა მისი “გადასროლა” საყოველთაო ჯანდაცვის მიმართულებით? რაიმე სხვა დარგი ხომ არ დაზარალდა ამით?

_ ამ პროექტს, ჩვენ ვახორციელებთ იმ არსებული ბიუჯეტის ფარგლებში, რაც დაგვხვდა ხელისუფლებაში მოსვლის მომენტში.  ჯერჯერობით, ახალი შემოსავლები არ შეგვიქმნია. ამოცანა და მეთოდოლოგია იყო, რომ ნებისმიერი  არა აუცილებელი ხარჯი, რომელიც შეიძლებოდა არ გაწეულიყო, შევამცირეთ დ პრიორიტეტული მიმართულების ხარჯი გავზარდეთ. სწორედ ამან მოგვცა ჯანდაცვის ბიუჯეტის გაორმაგების შესაძლებლობა. ანუ, არა აუცილებელი ხარჯები შევკვეცეთ.

_ რომელი მიიჩნიეთ ასეთ მიზანშეუწონელ ხარჯებად?

_  მაგალითად, ადმინისტრაციული ხარჯები, რომელიც ჯანდაცვის სამინისტრომ 8 მილიონით შეამცირა შარშანდელთან შედარებით. ასეთი იყო უამრავი.

_ შემთხვევით, პიარ-კამპანიასაც ხომ არ შეუმცირეთ ხარჯი? როგორც ამბობენ, თქვენ უარი თქვით ძვირადღირებულ კლიპებზე თუნდაც ისეთი დიდი პროექტის გასაპიარებლად, როგორიც საყოველთაო ჯანდაცვაა. თქვენი სამინისტრო და ზოგადად, სამინისტროები, წინა ხელისუფლების დროს, პიარში გაცილებით მეტ თანხას ხარჯავდნენ, ვიდრე საქმეში, რომელსაც აპიარებდნენ… ფიქრობთ, რომ რეკლამა არ გჭირდებათ?

_ მოდით ასე ვთქვათ,  პიარი არის აუცილებელი და განუყოფელი ნაწილი ნებისმიერი აქტივობის და  ჩვენ ეს კარგად გვაქვს გააზრებული. ჩვენი მიდგომა პიართან მიმართებაში გახლდათ ხარჯეფექტური და არა იაფიანი. ეს სხვადასხვა მცნებებია. ჩვენ თანხები დავზოგეთ, რათა ზედმეტი ფული არ დაგვეხარჯა და ჭარბი აჟიოტაჟი არ შეგვექმნა ამ მიმართულებით. ეს იმას არ ნიშნავს, რომ საზოგადოების ინფორმირებულობას რაიმე დავაკელით. ყველა ის მიმართულება, რაც აუცილებელია საზოგადოების ინფორმირებულობისთვის: ბეჭდური პრესა, ელექტრონული მედია,  დოკუმენტური ფილმები, ეს ყველაფერი გაკეთებულია.

ერთ მაგალითს  მოგიყვანთ: ჩვენ შეგვეძლო გაგვეკეთებინა სპეციალური შეკვეთით ე.წ კრეატიული კლიპი, რომლის ხანგრძლივობაც იქნებოდა 10 წუთი და პიარის სპეციალისტების აზრით, ასახავდა პროექტის მთავარ ნიშანსვეტებს.

როდესაც დავთვალეთ ხარჯები, ეთერში გასვლის ჩათვლით, ეს გვიჯდებოდა სადღაც 100 ათასის ფარგლებში. ჩვენ ჩავთვალეთ, რომ ეს  ფული ისევ ონკოჰემატოლოგიით დაავადებული ბავშვებისთვის და ანალოგიური პრიორიტეტებისთვის მოგვეხმარა.

მაგრამ, არც პიარის მიმართულება დავკეტეთ და შევძელით ხარჯეფექტურად, ზუსტად ასეთივე საინფორმაციო ფილმის გადაღება, რომელიც ეთერში დიდი წარმატებით ტრიალებს. კიდევ ერთი მომენტი, რაც პიარს შეეხება _ ჩვენ, მთელი ამ ხნის განმავლობაში, საზოგადოებას ვაწვდიდით ინფორმაციებს, უბრალოდ კონკრეტული ციფრების დაანგარიშებები, რაც ახლა თქვენს ხელთ არის,  მიდიოდა განუწყვეტლივ და ასეთი ბუკლეტების გამოშვება შევძელით პროექტის დაწყებამდე არც ისე დიდი ხნის წინ. ამიტომ შეიქმნა შთაბეჭდილება, თითქოს, არ გავაგებინეთ ხალხს. გავაგებინეთ ყველაფერი. უბრალოდ, არ გადავუხადე კლიპის ავტორებს 100 000 ლარი და იგივე საქმე, შეიძლება ბევრად უფრო ხარისხიანი, გავაკეთეთ გაცილებით იფად.