კანონპროექტის მიხედვით იქმნება თანასწორობის დაცვის ინსპექტორის ინსტიტუტი, რომელიც კერძო და საჯარო სტრუქტურების, ასევე ფიზიკური პირების მიერ გამოვლენილ დისკრიმინაციის ნებისმიერ ფორმას შეისწავლის და კანონდამრღვევს სათანადო ფულად ჯარიმასაც დააკისრებს. კანონის რეგულაციის სფეროში ექცევა მედიაც, რომელიც არც თუ იშვიათად ახდენს დისკრიმინაციის წახალისებას. სიძულვილის ენა, როგორც იუსტიციის მინისტრი აცხადებს ზოგ შემთხვევაში მოექცევა ამ კანონის მოქმედების ქვეშ, ზოგ შემთხვევაში _ არა. ეს დამოკიდებული იქნება იმ შედეგსა და ზიანზე, რაც პირს მედიას საშუალების მიერ მიადგა.
“კანონით არ იქმნება რაიმე ტიპის ახალი უფლებები ვინმესთვის, ამ კანონის მიზანია, რომ დღეს უკვე არსებული და კანონით უზრუნველყოფილი უფლებებით სარგებლობისას ყველანი ვიყოთ თანასწორი კანონის წინაშე. ეს მოითხოვს იმას, რომ როგორც ერთი ნიშნით, ასევე მრავალი ნიშნით დისკრიმინაციის ყველა ფორმა აღმოიფხვრას და ამის მაკონტროლებელი მექანიზმი იყოს ეფექტური,” _ ამბობს იუსტიციის მინისტრი თეა წულუკიანი.
ხომ არ გამოიწვევს ახალი ინსტიტუტის ამოქმედება სახალხო დამცველის ფუნქციებში შეჭრას ან დუბლირებას? მინისტრი ამბობს, რომ არა, რადგან სახალხო დამცველი ისედაც ძალიან დაკავებულია ფუნდამენტური უფლებების დაცვით.
“დღეს ჩვენ გვყავს სახალხო დამცველი, რომელსაც ქვეყანაში ადამიანის უფლებების კუთხით არსებული მემკვიდრეობის გამო აქვს ძალიან ბევრი საქმე და ის რეალურად ის ისეთ ფუნდამენტურ უფლებებზე ზრუნვით არის დაკავებული, როგორიცაა სიცოცხლის ხელყოფის ფაქტების გამოძიება, წამება , არაადამიანური მოპყრობა, სამართლიანი სასამართლო თუ სხვა. იმისათვის რომ დისკრიმინაციის ყველა ფორმა აღმოიფხვრას, ჩვენ გვქონდა დახურული შეხვედრა სახალხო დამცველთან, რომელთან ერთად შევთანხმდით, რომ შევქმნათ თანასწორობის დაცვის ინსპექტორი და შევიმუშაოთ ამ ინსპექტორის სახალხო დამცველთან ისეთი ბმული რომ არ მოხდეს, მათი უფლებამოსილებების დუბლირება. ამ ინიციატივას სახალხო დამცველი ორივე ხელით მიესალმა,” _ ამბობს იუსტიციის მინისტრი.
თეა წულუკიანის თქმით, ეს კანონი უფრო აზუსტებს და ამდიდრებს კონსტიტუციურ ნორმებს, რომელიც ისედაც კრძალავს დისკრიმინაციის ყველა ფორმას.
“მოცემულ სიას კიდევ უფრო ვამდიდრებთ, ვუმატებთ ისეთ ნიშნებს, როგორიცაა შეზღუდული შესაძლებლობების ნიშნით დისკრიმინაცია, ჩვენ გვინდა რომ ამ სიაში შევიყვანოთ ფეხმძიმობის ნიშნით დისკრიმინაცია, ამ კუთხით შრომით ურთიერთობებში ხშირად ხდება ჩაგვრა და აქ შეგვაქვს ასაკის მიხედვით დისკრიმინაციაც.”
