როგორც პარლამენტის გარემოს დაცვისა და ბუნებრივი რესურსების კომიტეტის სხდომაზე 4 ივლისს კანონპროექტის ინიციატორმა ენერგეტიკის მინისტრის მოადგილე ირაკლი ხმალაძემ განმარტა, ცვლილებები ინვესტორებისთვის კეთდება. ნარჩენები, რომლის იმპორტის დაშვება უნდა მოხდეს ინიცირებული კანონპროექტის თანახმად, საწარმოებს ჰიდროტექტონიკური ცემენტის წარმოებისთვის ესაჭიროებათ.
სხდომას “ჰაიდელბერგცემენტის” წარმომადგენლები და თურქი ინვესტორიც ესწრებოდნენ. კომპანია “აჭარენერჯის” თურქ წარმომადგენელს, რომელიც მდინარე ჭოროხზე აშენებს ჰესებს, სხდომაზე არ დაუმალავს, რომ კანონპროექტში ცვლილება სწორედ მათი ინტერესიდან გამომდინარე შედის.
რაც შეეხება კომპანია “ჰაიდელბერგცემენტს”, მისი გენერალური დირექტორი მიქაელ ჰამპელი პირველად ჩვენთან საუბარში ადასტურებს, რომ “აჭარენერჯის” წარმომადგენლებთან მოლაპარაკებებს იწყებს. სავარაუდოდ, “ჰაიდელბერგცემენტმა” უნდა მიაწოდოს კომპანია “აჭარენერჯის” ჰესების ასაშენებელად ცემენტი. ამის შესახებ სხდომის მონაწილეებმაც ისაუბრეს. თურქულ მხარეს კი უნდა, რომ ცემენტში მაინც და მაინც ის მასალა გამოიყენონ, რომელიც თურქეთში არსებულ ნარჩენებშია.
გთავაზობთ ინტერვიუს ამ საკითხებზე კომპანია”ჰაიდელბერგცემენტის” გენერალურ დირექტორთან მიქაელ ჰამპელთან.
_ თქვენი კომპანიის ტექნიკურმა დირექტორმა ზაზა სადუნიშვილმა სხდომაზე განაცხადა, რომ 100%-ით შეუძლია, დაგვარწმუნოს, რომ აღნიშნულ ნარჩენებს ჰიდროტექტონიკური ცემენტის წარმოებისთვის არ გამოიყენებთ. თქვენ რას იტყვით?
_ თუ არსებობს საქართველოს ეკონომიკური დაინტერესება და აუცილებლად ჩაითვლება ამ ნივთიერებების იმპორტი, ჩვენი კომპანია ამას მიიღებს, მაგრამ უნდა კონტროლირდებოდეს ხარისხი. რა თქმა უნდა, ამ პროდუქტის შენახვა-გადატანისას არ უნდა დაირღვეს ეკოლოგიური პირობები.
ჩვენ ვფიქრობთ, რომ კანონი ძალიან კარგია. არ უნდა ხდებოდეს სხვა ქვეყანაში წარმოქმნილი ნარჩენის შემოტანა. ჩვენი აზრით, კანონის შეცვლა არ არის სავალდებულო, ვერ ვხედავთ ამ კანონის შეცვლის აუცილებლობას. ჩვენ გვაქვს გადაწყვეტილება ამ პრობლემასთან დაკავშირებით. ახლა ვაპირებთ, დავსხდეთ თურქულ კომპანიასთან, ვინც პრინციპში იყო ამ კანონპროექტის ინიციატორი და შევუქმნათ ისეთი ტიპის ცემენტი, რომელიც მათ სჭირდებათ. თქვენ პირველი იქნებით, პრინციპში, ვინც ეს ამბავი გაიგეთ. რაც მთავარია, ვეცდებით, მათი კომპანიისთვის ცემენტი საქართველოში არსებული მასალებიდან გამომდინარე შეიქმნას.
_ თქვენს კომპანიას პრობლემები ხომ არ შეექმნება ამ ნარჩენების ცემენტში შერევით? როგორც ვიცით, ევროპაში ამგვარი ნარჩენების ცემენტში საწარმოებლად გამოყენება აკრძალულია. გარდა ამისა, ევროპული ქვეყნები ამ ნარჩენების საკუთარი ტერიტორიებიდან გატანაზე ორიენტირებული არიან.
(“ჩვენც სწორედ მაგის გვეშინია”, _ ამატებს “ჰაიდელბერგცემენტის” წარმომადგენელი, რომელიც კითხვებს მიქაელ ჰამპელს უთარგმნის).
_ ძალიან ბევრ ქვეყანაში დაშვებულია ამ პროდუქტის დანამატად გამოყენება ცემენტში. მაგრამ მკაცრი რეგულაციით. უნდა არსებობდეს ლაბორატორია, სადაც მკაცრად გაკონტროლდება, რა პირობებში, რა რაოდენობით მოხდება მისი გამოყენება.
_ გერმანული საწარმოები თუ იყენებენ მსგავსი ტიპის ნარჩენს ცემენტის წარმოებისთვის?
_ გერმანიაშიც იყენებენ ძალიან მკაცრი რეგულაციების შემდეგ. ძალიან მცირე ოდენობით. საქართველოში კანონი რომც შეიცვალოს, ჩვენ მაინც არ გამოვიყენებთ ამ მასალას. იმიტომ რომ ორიენტირებულები ვართ საქართველოში არსებული მსგავსი ტიპის ნარჩენების გამოყენებაზე.
_ თუ გაქვთ ინფორმაცია იმის თაობაზე, რომ საქართველოში მსგავსი ტიპის ნარჩენების შემოწმება მოხდება? როგორ გეგმავს თქვენი ქარხანა, საქართველოში არსებული ნარჩენის, ან იმ შემთხვევაში თუ თურქეთიდან შემოიტანეს, მის შემოწმებას?
_ რამდენიმე ლაბორატორია არის. ერთი ტექნიკურ უნივერსიტეტს აქვს. ჩვენც გვაქვს ორი, ცემენტის და ბეტონის შესამოწმებელი ლაბორატორია. მგონი, დანარჩენს არ გააჩნია.
_ ანუ თავად თქვენს საწარმოებში შეამოწმებთ?
_ სახელმწიფომ თავის მხრივ უნდა გააკეთოს ნარჩენების ანალიზი, მაგრამ ჩვენ ჩვენს საწარმოშიც შევამოწმებთ.
ჩემი ბოლო კომენტარი იქნება, რომ კანონი არ შეიცვლება, რადგან ამის აუცილებლობა არ არსებობს. ამიტომ ჩვენი ნაბიჯების განხილვა, რა მოხდება კანონის შეცვლის შემდგომ, არ არის საჭირო.
