გაძვირდება თუ არა მედიკამენტები და როგორ აპირებს ამ საკითხის დარეგულირებას ჯანდაცვის სამინისტრო, ამ კითხვით ჯანდაცვის მინისტრს, დავით სერგეენკოს მივმართეთ.
_ ბატონო დავით, გაქვთ თუ არა რაიმე ზომები მიღებული, რათა არ მოხდეს მედიკამენტების გაძვირება და საერთოდ, რა ხდება ამ საკითხთან დაკავშირებით?
_ ამ საკითხთან დაკავშირებით ხდება შემდეგი: ჩვენ გვაქვს წინასწარი შეფასებით ერთობ ეფექტური პროექტი, როგორ უნდა დავარეგულიროთ აღნიშნული საკითხი. ეს გახლავთ ბეწვის ხიდზე გასავლელი გზა, ერთი მხრივ არ უნდა დაზარალდეს კერძო ბიზნესი, რადგან ამას მოყვება დომინოს ეფექტი. ერთგან შეეხები ერთ კომპანიას და შესაძლოა, ამას გამოძახილი ჰქონდეს რომელიღაც შავი ზღვისპირა ბორდში. ამიტომ, ამას უნდა ძალიან გააზრებული და ფაქიზი მიდგომა, რაც გამოიხატება იმაში, რომ ზოგადად, პოლიტიკის დონეზე, ხელი უნდა შევუწყოთ ადგილობრივ წარმოებას. იმ მედიკამენტების მიწვდომადობას, რომელიც ხარჯეფექტურია, ხელი უნდა შევუწყოთ. ეს რომ მოხდეს, საჭიროა ქვეყანაში შეიქმნას წამლის ხარისხის კონტროლის ძალიან გამართული სამსახური. პირველ რიგში, ამის გაკეთებას ვაპირებთ და საკითხი ამ წელსვე მოგვარდება.
ამაში ადგილობრივი წარმოებაც უნდა იყოს დაინტერესებული და ვფიქრობ, ეფექტურად ვითანამშრომლებთ. ამით საბოლოო წერტილი დაესმება იმ გაუთავებელ მსჯელობას, რომ კი არის შედარებით იაფი, მაგრამ არ ვარგა და ასე შემდეგ. ამას აქვს თავისი წესი და აუცილებლად გავაკეთებთ ყველაფერს, რაც ფასებზე გავლენას იქონიებს შემცირებისკენ.
მეორე გახლავთ რეალური კონკურენტუნარიანი ბაზრის ხელშეწყობა და მისი გახსნა ახალი მოთამაშეებისთვის. ხარისხი და მიწვდომადობა არის უმძლავრესი მექანიზმი, რომ ეს საკითხი დარგულირდეს.
ჯანდაცვითი ბიზნესი განსაკუთრებულია გასაგები მიზეზების გამო. სახელმწიფოს აქვს პრიორიტეტი, რომ ისევე როგორც ხორციელდება სახელმწიფო პროგრამები დიაბეტზე, სახელმწიფო განახორციელებს კიდევ ერთ პროექტს, მაღალი არტერიული წნევის და ძალიან დიდი ალბათობით, სახელმწიფო პროგრამით ასეთი პაციენტების მედიკამენტებით უზრუნველყოფა მოხდება. ეს იქნება სახელმწიფოს შეკვეთა და ამ შეკვეთის ფარგლებში, ჩვენ უფლებამოსილები ვიქნებით, დავაწესოთ ჩვენი მოთხოვნები.
მოსალოდნელ რისკებზე, რაც მედიკამენტების შესაძლო გაძვირებას უკავშირდება, ჩვენ წინამოსამზადებელი პერიოდი დავასრულეთ და ალბათ ზაფხულის მეორე ნახევრიდან ამ პროექტის განხორციელება დიწყება.
_ რამდენიმე თვის წინ, პრემიერმა დააანონსა თავისი მეგობრის ფარმაცევტული კომპანიის შესაძლო შემოსვლის შესახებ ქართულ ბაზარზე, შემდეგ თქვენ ინტერვიუში განაცხადეთ, რომ აწარმოებდით მოლაპარაკებებს. ელოდებით ახალი მოთამაშეების შემოსვლას ქართულ ბაზარზე?
_ ჩვენ ვიზრუნეთ იმაზე, რომ დაგვესრულებინა მოსამზადებელი პერიოდი, რომელიც საშუალებას მისცემდა არა ერთ რომელიმე კონკრეტულ მოთამაშეს ბაზარზე შემოსასვლელად, არამედ ნებისმიერს, რომელსაც ამის სურვილი გაუჩნდებოდა. დიახ, ჩვენ ველოდებით ახალი მოთამაშეების შემოსვლას ბაზარზე, რადგან მათ შევუქმნით მომზიდველ პირობებს. ეს არ იქნება ერთი რომელიმე კომპანიისთვის. ბაზარი ღია იქნება ყველასთვის.
