გასულ წელს, ამხანაგობის ერთ-ერთმა დამფუძნებელმა გიორგი ზურაბიშვილმა სიცოცხლე თვითმკვლელობით დაასრულა.ზურაბიშვილის ადვოკატი და შვილი თვითმკვლელობამდე მიყვანაში “ცენტრ პოინტსა” და “დექსუსს” ადანაშაულებენ.
დადგენილებაში “რუსუდან კერვალიშვილის ბრალის შესახებ” ნათქვამია:
“2004 წელს გაფორმდა ხელშეკრულება ამხანაგობა “თაბუკაშვილი-88”-სა (შემდგომში “ამხანაგობა”) და “ცენტრ პოინტი ჯგუფი”-ს დამფუძნებლებთან დაკავშირებულ სააქციო საზოგადოება “ევრაზიის საინვესტიციო სააგენტო”-ს (შემდგომში „სააგენტო”) (დამფუძნებლები: ვახტანგ რჩეულიშვილი – წილი 25 %, გურამ რჩეულიშვილი – 25 %, რუსუდან კერვალიშვილი – 25 %, შპს “კონსალტინგისა და მენეჯმენტის ჯგუფი” – 25 %; სამეთვალყურეო საბჭოს წევრები: მაია რჩეულიშვილი, ვახტანგ რჩეულიშვილი, ირაკლი მინდელი) შორის. ამ ხელშეკრულების თანახმად “სააგენტო” უზრუნველყოფდა “ამხანაგობის” დაკვეთით თბილისში, თაბუკაშვილის ქუჩა ##7,9,11,11ა,16,18,19-ში დაწყებული ბინათმშენებლობის დასრულებას და ამ ვალდებულების შესასრულებლად 3.500.000 აშშ დოლარის ფინანსური რესურსის მოძიებას. გარდა ამისა, ზემოაღნიშნული ხელშეკრულება ითვალისწინებდა, რომ “ამხანაგობის” ახალ წევრებს ამხანაგობაში გაწევრიანების საწევრო შენატანი (ანუ უძრავი ქონების ნასყიდობის ღირებულება) გადაეხადათ “სააგენტო”-ს საბანკო ანგარიშზე.
“ამხანაგობა”-სთან ხელშეკრულების გაფორმების შემდგომ “სააგენტო”-მ 2004 წლის 05 ივლისს “თი ბი სი ბანკთან” გაფორმებული სასესხო ხელშეკრულების საფუძველზე მიიღო მიზნობრივი საბანკო კრედიტი 3.500.000 აშშ დოლარის ოდენობით, რომლის მიზანი იყო თაბუკაშვილის ქუჩაზე მიმდინარე მშენებლობის დაფინანსება. კრედიტის სანაცვლოდ, იპოთეკით დაიტვირთა თაბუკაშვილის ქუჩაზე მდებარე ამხანაგობის კუთვნილი მიწის ნაკვეთი, ასევე “ცენტრ პოინტი ჯგუფის” დამფუძნებლების მაია რჩეულიშვილის და რუსუდან კერვალიშვილის საცხოვრებელი ბინები.”
როგორც ადვოკატი მარინე კორძაძე ამბობს, ზურაბიშვილის სოცოცხლე “დექსუსისა” და “ცენტრ პოინტის” დაუსრულებელ ფინანსურ პირამიდებს შეეწირა. მისივე მტკიცებით,”ცენტრ პოინტმა” 10 კორპუსის 50 ოჯახის მიერ გადახდილი თანხა (თითოულს, სულ მცირე, 50 ათასი დოლარი ჰქონდა გადახდილი) მიითვისა და ასობით ადამიანი ქუჩაში დატოვა.
ამხანაგობა “თაბუკაშვილი 88” 1988 წელს, ლევან თაბუკაშვილის ქუჩაზე მაცხოვრებლებმა დააფუძნეს, რის შემდეგაც მათ დაიკანონეს ის ტერიტორია, რომელზედაც მათივე სახლები იყო განთავსებული. ამის შემდეგ, ამხანაგობამ ძველი ავარიული სახლები დაანგრია და ახალი ათსართულიანი კორპუსის მშენებლობა წამოიწყო.
თაბუკაშვილის 7-ში მშენებარე კორპუსების კომპლექსს, რომელსაც “სააკაძის კომპლექსად” მოიხსენიებენ, შპს “ცენტრ-პოინტი” ამხანაგობა “თაბუკაშვილი-88″-სთან ერთად აშენებდა. 2008 წელს კი კომპანია “ცენტრ პოინტმა” თავი გაკოტრებულად გამოაცხადა და 2010 წლიდან კომპანიის ქოლგის ქვეშ გაერთიანებული 15-მდე ამხანაგობა და რამდენიმე ათეული შპს, მართვაში კომპანია “დექსუსს” გადასცა.
მართვაში “დექსუსის” შემოყვანის შემდეგ, მან “თაბუკაშვილი-88”-ის წევრებს ხელშეკრულების პირობების შეცვლის შესახებ აცნობა. კერძოდ, 18%-იანი დამატებითი ღირებულების გადასახადის გარდა, მათ თითოეულ კვადრატულ მეტრზე $ 100 გადახდაც დაეკისრათ.
ამავდროულად განხეთქილება მოხდა ამხანაგობის წევრებს შორისაც. ამხანაგობის თავმჯდომარე ზურაბ თაბუკაშვილმა ამხანაგობიდან გარიცხა რამდენიმე დამფუძნებელი, მათ შორის, აწგადარცვლილი გიორგი ზურაბიშვილიც.
“თაბუკაშვილი-88”-ის დაზარალებულმა მობინადრეებმა, რომლებიც წლების მანძილზე ელოდებოდნენ მშენებლობის დასრულებას,ზარალის ანაზღაურება ამხანაგობის დამფუძნებლებს, მათ შორის, ზურაბიშვილსაც მოსთხოვეს.მათ ინტერესებს ადვოკატი ბექა ბადრიაშვილი იცავდა, რომელმაც სასამართლოს თანადამფუძნებლების ქონების დაყადაღების მოთხოვნით მიმართა. ზურაბიშვილს ყველაფერი დაუყადაღეს, მათ შორის მამაპაპისეული სახლიც, რის შემდეგაც, როგორც მისი ოჯახი ამბობს, მან სიცოცხლე თვითმკვლელობით დაასრულა.
ხელისუფლების შეცვლის შემდეგ, დაზარალებულმა მენაშენეებმა “ცენტრ-პოინტის” საქმის გამოძიების მოთხოვნით არაერთი აქცია გამართეს პროკურატურასთან. ისინი მაია რჩეულიშვილის და რუსუდან კირვალიშვილის დასჯას მოითხოვდნენ. ცოტა ხნის წინ, “ცენტრ-პოინტის” დამფუძნებლებმა პირობა დადეს, რომ ზარალს აანაზღაურებდნენ, თუმცა პირობა ვერ შეასრულეს. პროკურატურა მათ 400 მილიონის მითვისება-გაფლანგვას ედავება.
