სოციალური სამსახურის ხელმძღვანელობიდან საოლქო საარჩევნო კომისიის წევრობამდე

და განაცხადეს, რომ ორშაბათიდან თამარ ასკურავა, რომელმაც რამდენიმე დღის წინ საკუთარი ნებით დატოვა სოციალური სამსახურის უფროსის თანამდებობა, ორშაბათიდან ოფიციალურად შეუდგება #61-ე ლანჩხუთის საოლქო საარჩევნო კომისიის წევრად მუშაობას. მისი კანდიდატურა ” თავისუფალი დემოკრატების”ხელმძღვანელის, ელგუჯა ჩხაიძის მიერ იქნა წარდგენილი.

თამარ ასკურავა: _ კიდევ ერთხელ მინდა შევეხმიანო ბოლო პერიოდში ჩემს ირგვლივ განვითარებულ მოვლენებს. ჩემთვის სამწუხაროა, რომ მიუხედავად ჩემი გულწრფელი განმარტებისა, საზოგადოებაში დღემდე რჩება კითხვითი ნიშანი ჩემი სამსახურიდან წასვლასთან დაკავშირებით. კიდევ ერთხელ განვმარტავ, რომ სამსახურიდან წასვლაზე განცხადება ყოველგვარი ზეწოლის გარეშე დავწერე და ამ ფაქტს არანაირი კავშირი არ აქვს აუდიტის სამსახურის შემოწმებასთან, არც ჩემს პოლიტიკურ შეხედულებასთან. აუდიტმა დაასრულა მუშაობა და დაიდო დასკვნა, სადაც ცალსახად წერია, რომ არანაირი შეცდომები და დარღვევა არ მქონია ამ სამსახურში. იყო რაღაც ნაკლოვანებები _ სარეკომენდაციო ხასიათისაა ეს დასკვნა. აქვე დავძენ, რომ არც ერთი პარტიის წევრი არ ვყოფილვარ. ამის შემდეგ ავიღე შესვენება მცირე ხნით. მთელი 8 წლის განმავლობაში ვხელმძღვანელობდი ამ სფეროს, მანამდე კი ძალიან სერიოზულ სამსახურს _ სოციალური მომსახურების სააგენტოს, მთელი 7 წელი ვიყავი იქ განყოფილების უფროსი და იმ სამსახურიდანაც წამოვედი ისე, რომ არანაირი დარღვევა არ მქონია.

_ გავრცელებული ინფორმაციით თქვენ გაიძულეს დაკავებული თანამდებობა დაგეტოვებინათ.

_ ეს არის სიცრუე _ არავის არ მოუთხოვია ჩემგან სამსახურიდან წასვლა.

რაც შეეხება საარჩევნო კომისიის წევრობას, “თავისუფალმა დემოკრატებმა”შემომთავაზეს ვყოფილიყავი #61 ლანჩხუთის საოლქო საარჩევნო კომისიის წევრი. მე 2012 წლის მაისში ავიღე საარჩევნო ადმინისტრაციის მოხელის სერტიფიკატი, რაც საშუალებას მაძლევს, ვიმუშაო საარჩევნო კომისიაში, ასევე ნებისმიერი დონის საარჩევნო ადმინისტრაციაში, პარტიამ განიხილა ჩემი კანდიდატურა, იმსჯელეს ამის შესახებ და მიიღეს გადაწყვეტილება, რომ მე უნდა ვყოფილიყავი ამ კომისიის წევრი. ჩემთვის მისაღებია ამ პარტიის შეხედულებები და აქედან გამომდინარე, მეც დავთანხმდი. ორშაბათიდან შევუდგები მუშაობას. ის, რომ მე ვიღაც ჩავანაცვლე, ამაზე კომენტარის გაკეთება შემიძლია _ მე საერთოდ არ ვიცნობ გოჩა ცინცაძეს _ შეიძლება გზაში შემხვედრია სადმე, ისიც არ ვიცოდი რომელი პარტიის წევრი იყო.

ელგუჯა ჩხაიძე: “ყველაზე რთული სამსახურია სოციალური სამსახური, სადაც გაჭირვებულ ადამიანებთან გაქვს ურთიერთობა. მე ვნახე თამარ ასკურავას შემართება. ანკეტა შეავსო, ვისაუბრეთ, რამაც მომცა იმის საშუალება, რომ თამარი წარმედგინა კომისიის წევრად. თუ იმ თანამშრომლებს, რომლებიც “ნაციონალების”დროს მუშაობდნენ, უნდობლობა გამოვუცხადეთ, არ იქნება სწორი _ მე ამის მომხრე არც ვყოფილვარ და არც ვიქნები. თუ ვინმეს რამე დანაშაული აქვს, ამისათვის არსებობს სპეციალური ორგანოები და იქ მოსთხოვენ პასუხს. მე ყველას ვესაუბრე თამარის შესახებ და ვერავინ დამიდო ფაქტები მის საწინააღმდეგოდ. სწორედ ამიტომ მივანიჭე უპირატესობა მას.”