ინსტიტუტის ფუნდამენტური კვლევები ედო საფუძვლად სუბტროპიკული მეურნეობის განვითარებას არა მხოლოდ ყოფილ საბჭოთა კავშირში, არამედ მსოფლიოს ჩაის და ციტრუსოვნების გადამამუშავებელ ყველა კლასიკურ ქვეყანაში.
ამჟამად ინსტიტუტს უკიდურესად უჭირს. ამის მიზეზია ერთი მხრივ, ჩაისა და სუბტროპიკული მემცენარეობის დარგის, როგორც აგრარული დარგის ერთ-ერთი წამყვანი მიმართულების განადგურება, მეორე მხრივ, ე.წ. ბენდუქიძისეული “რეფორმა” ანასეულში. აგრარული დარგის და აგრარული მეცნიერების განადგურებაში ბრალი პირველ რიგში, პრეზიდენტს მიუძღვის _ “ბენდუქიძე მისი მარჯვენა ხელი იყო” (სამწუხაროდ, არის დღემდე), რომელმაც ძალადობისა და უსამართლობის დემონსტრირებით “წარმატებით” დააგვირგვინა მეცნიერების გენოციდი.
აგრარული უნივერსიტეტის დაქვემდებარებაში გადასვლის შემდეგ, ბენდუქიძემ, რომელსაც “აგრარული დარგის მესაფლავეს” უწოდებენ, დაარღვია ჩვენი ინსტიტუტის, როგორც მსოფლიოში ცნობილი სხვა კვლევითი ცენტრების სტრუქტურა, მიითვისა შენობები, ტერიტორიები, როგორც ანასეულში, ისე ჩაქვში, ფილიალში. ბენდუქიძე-გოცირიძის ე.წ. კომისიამ დარგის საბოლოო განადგურების მიზნით უკანონოდ და უსაფუძვლოდ გაათავისუფლა მეცნიერთა დიდი ნაწილი ცოდნის, პროფესიონალიზმის, გამოცდილებისა და ასაკისაგან დამოუკიდებლად, ფიქტიური, მოჩვენებითი ატესტაციის ჩატარებით, გააუქმა ინსტიტუტის წამყვანი ლაბორატორიები, რის შედეგად ამჟამად თითქმის ნულის ტოლია ინსტიტუტის სამეცნიერო კვლევების შედეგების გამოყენება სუბტროპიკული დარგის (მეჩაიეობა, მეციტრუსეობა, სხვა კულტურები) რეაბილიტაციისათვის. ამ დარგების აღდგენისა და მეცნიერებისა და წარმოების კავშირის გარეშე კი შეუძლებელია დასავლეთ საქართველოს რეგიონებში მოსახლეობის სოციალურ-ეკონომიკური მდგომარეობის გაუმჯობესება.
ინსტიტუტის თანამშრომლებმა და მეცნიერებათა დოქტორებმა არაერთხელ მივმართეთ ზემდგომ ორგანოებს. ვითხოვდით და ვითხოვთ ინსტიტუტი გამოეყოს აგრარულ უნივერსიტეტს და სსიპ-ის სახით დაექვემდებაროს სოფლის მეურნეობის სამინისტროს, დაუბრუნდეს ინსტიტუტს უკანონოდ გათავისუფლებული მეცნიერები და პროფესიონალები. ჩვენს თხოვნაზე რეაგირება არ მომხდარა.
მიმდინარე პერიოდში ბენდუქიძემ ახალი ტემპით განაგრძო ინსტიტუტის განადგურება. აგრარულ უნივერსიტეტთან მიერთებული 14 ინსტიტუტიდან ჩაის, სუბტროპიკული კულტურების და ჩაის მრეწველობის ინსტიტუტი ერთადერთია დღეისათვის, რომელიც აკმაყოფილებს საინიციატივო ჯგუფის მიერ (გ. დვალი და სხვ.) შემუშავებული განათლებისა და მეცნიერების რეფორმის კონცეფციაში აღნიშნულ კრიტერიუმებს უნივერსიტეტთან მიერთებული ინსტიტუტების გამოყოფის შესახებ. ჩვენი ინსტიტუტის აღდგენა-გამოყოფა ამჟამად პირდაპირ ბრძანებით შეიძლება. ამჟამად საფრთხე დაემუქრა ინსტიტუტის ძირითად მოქმედ კორპუსს _ ხუთსართულიან შენობას, მასში განთავსებულ ლაბორატორიებს და აპარატურას, მათ შორის მუშა მდგომარეობაში არსებულ და მომუშავე, გარემონტებულს (ჩვენი სახსრებითაც კი), ისევ გრძელდება მეცნიერთა და სპეციალისტთა გათავისუფლებები, ინსტიტუტის თანამშრომელთა რაოდენობა დაიყვანა 10 მეცნიერზე და მათი გადაყვანა დაგეგმილი აქვს ბიბლიოთეკის შენობაში. საფრთხე ემუქრება ინსტიტუტის ტერიტორიებს, ფილიალების არსებობას, უნიკალური ბიბლიოთეკის ფონდს (ინტელექტის მოშორების შემდეგ ბიბლიოთეკების განადგურებაა სწორედ ის უპირველესი, რითაც დაიწყო ბენდუქიძემ თბილისის სამეცნიერო-კვლევითი ინსტიტუტების განადგურება) და ა. შ. იმ მიმართულებით, რომ შეუძლებელი გახდეს ინსტიტუტის აღდგენა-გამოყოფა. ეს პროცესი სასწრაფოდ შეჩერებას მოითხოვს, სანამ ჯერ კიდევ გვიან არ არის.
ბატონო ბიძინა, ძველი ხელისუფლება მეცნიერებს ისე მოგვექცა, როგორც სახელმწიფო დამნაშავეებს. მოუთმენლად ველოდებით თქვენს ეფექტურ ნაბიჯებს მეცნიერების აღდგენისათვის და მეცნიერთა ფიზიკური გადარჩენისათვის. ნუ მისცემთ საშუალებას ბენდუქიძეს საბოლოოდ გაანადგუროს ერთ დროს სუბტროპიკული დარგის მსოფლიოში ცნობილი უძლიერესი ინსტიტუტი.
მიგვაჩნია, რომ აგრარული დარგის რეაბილიტაციის საქმეში აქტიურად უნდა ჩაერთონ მეცნიერები. ინსტიტუტში შემუშავებული ჩაის, ციტრუსოვნების, სხვა სუბტროპიკული კულტურების მოვლა-მოყვანისა და გადამუშავების პროგრესული ტექნოლოგიების დანერგვითა და გამოყენებით ჩვენს ქვეყანას შეუძლია დააკმაყოფილოს ადგილობრივი მოსახლეობის მოთხოვნილება მაღალხარისხოვან ბაიხის ჩაიზე, გაიტანოს პროდუქცია ექსპორტზე დამატებითი შემოსავლების მიღების მიზნით. სამამულო ჩაის ნედლეულის ბაზაზე ბაიხის ჩაის პარალელურად, შესაძლებელია გამომუშავდეს მსოფლიო ჩაის გადამამუშავებელ ქვეყნებში აპრობირებული ახალი სახის ჩაის პროდუქტები, დანერგილი იქნას საქართველოში ინტროდუცირებული ახალი, პერსპექტიული კულტურები და სხვ.
გთხოვთ თქვენს სასწრაფო ჩარევას _ შეჩერდეს ინსტიტუტის ე.წ. “რეფორმა”, გამოეყოს ის აგრარულ უნივერსიტეტს და დაექვემდებაროს სოფლის მეურნეობის სამინისტროს.
ანასეულის ჩაის, სუბტროპიკული კულტურების და ჩაის მრეწველობის ინსტიტუტის მეცნიერთა ჯგუფი, სულ 26 ადამიანი
