პარტიის წევრი პარტიის თავმჯდომარის წინაღმდეგ

ხელმძღვანელთან დაპირისპირებული გოჩა ცინცაძე ამბობს, ელგუჯა ჩხაიძე მას ბოლო წუთამდე ლანჩხუთის # 61 საოლქო კომისიის წევრობას ჰპირდებოდა, თუმცა, ბოლო წუთს მან აღნიშნულ ადგილზე ყოფილი გამგეობის სოციალური დაცვის სამსახურის ხელმძღვანელი თამარ ასკურავა დანიშნა.

გოჩა ცინცაძე: _ ჩემი თხოვნაა, ამ გასაჭირის შესახებ, რაც მე მადგას, მივიდეს სახალხო დამცველის ყურამდე. ვარ პოლიტიკური გაერთიანება თავისუფალი დემოკრატების წევრი უკვე მეათე თვეა, მაქვს საარჩევნო ადმინისტრაციაში მუშაობის 8-წლიანი გამოცდილება. გამაჩნია საარჩევნო მოხელის სერტიფიკატი, ასევე, ამერიკის საერთაშორისო რესპუბლიკური ინსტიტუტისა და და იმავდროულად ეროვნული დემოკრატიული ინსტიტუტის საერთაშორისო სერტიფიკატი. იმის გამო, რომ წინა ხელისუფლების მიმართ ვიყავი კრიტიკულად განწყობილი, 10 წელია ვარ უმუშევარი. ამჟამად უნდა დავნიშნულიყავი # 61-ე ლანჩხუთის საარჩევნო კომისიის დროებით წევრად, სადაც უნდა წარვედგინე ამავე ორგანიზაციის ხელმძღვანელს ელგუჯა ჩხაიძეს, რომელსაც ვცემდი დიდ პატივს და ვენდობოდი. ის ჯერ მუდმივ ადგილს მპირდებოდა, შემდეგ კი _ დროებითი კომისიის წევრის. ვასრულებდი ყველა მის დავალებას, მაგზავნიდა თბილისში, კონკურსში მონაწილეობის მისაღებად, ასევე, ქუთაისში ტრენინგ-სემინარებზე, მიწვევდა სხვადასხვა შეხვედრებზე და მპირდებოდა საოლქო საარჩევნო კომისიის დროებით წევრობას. თან აღნიშნავდა, რომ ის ჩემზე უკეთეს კაცს საოლქოში ვერ წარადგენდა, რადგან მე მქონდა ვადიანი სერტიფიკატი, ხოლო მეორე კანდიდატს, გოჩა ფირცხალაიშვილს სერტიფიკატის ვადა ეწურებოდა. ლანჩხუთში სხვა სერტიფიცირებული 7 თვის მანძილზე არ ყოფილა. არჩევნების შემდეგ შემეხმიანა ბატონი ელგუჯა, მომთხოვა საჭირო საბუთები და შემპირდა, რომ გადააგზავნიდა თბილისში დასამტკიცებლად. გადამიხადა მადლობა და მისურვა წარმატებები. სინამდვილეში გაირკვა, რომ ბატონმა ელგუჯამ ხუთჯერ მომატყუა და თითქმის მთელი საქართველო შემომატარა სესხით აღებული ფულით. მან ბოლო წუთს განმიცხადა, რომ თბილისის ოფისმა მას მოსთხოვა, რაც შეიძლება, ბევრი სერტიფიცირებულ და არასერტიფიცირებულ პირთა სია და იმათგან თბილისმა დაამტკიცა გამგეობის სოციალური სამსახურის ყოფილი უფროსი, ყოფილი გამგებლის მოვალეობის შემსრულებელი და ამჟამად ” ნაციონალური პარტიის” ხელმძღვანელის კახა ასკურავას ნათესავი, ქალბატონი თამარ ასკურავა, რომელიც მთელი წინასაარჩევნო პერიოდის განმავლობაში იყო ნაციონალური მოძრაობის იდეების პროპაგანდისტი. ის იყო სოცუზრუნველყოფის სამსახურის უფროსი, რომელიც ემსახურებოდა მხოლოდ და მხოლოდ “ნაციონალების” ლაშქრის ოჯახის წევრებსა და მათ ახლობლებს, სხვა პოლიტიკური ორიენტაციის მოქალაქეებს კი დახმარებას არ აძლევდა. ეს საკმაოდ ცნობილი ფაქტებია. იმ პარტიის მხარდამჭერი დანიშნა ბატონმა ელგუჯამ, რომელი პარტიის დავალებითაც ბატონ თავად მას ავტომატის მჭიდები ჩაუდეს და დააპატიმრეს, რის გამოც ბატონმა ელგუჯამ მთელი საქართველო ფეხზე დააყენა და თავი რეპრესირებულად გამოაცხადა.

თუ მას ეს პიროვნება ჰყავდა შერჩეული, რატომ მაწვალა მე? შემდგომში კვლავ მომატყუა _ მითხრა, რომ ეს საკითხი გადაწყვიტა თბილისმა, მათ იციან ასკურავას პოლიტიკური წარსულის შესახებ ინფორმაცია, მაგრამ მაინც დათახმდნენო. მე დავუკავშირდი თბილისის თბილისის ოფისს, ქალბატონ ლეილა კვანტალიანს, ვთხოვე, ადამიანურად აეხსნათ, ჩემს ადგილზე ბოლო წუთს რატომ დაინიშნა სხვა პიროვნება. თბილისის ოფისიდან მიპასუხეს, რომ ეს პრობლემა გამერკვია ადგილობრივ ორგანიზაციაში, რადგანაც ასკურავა ელგუჯა ჩხაიძემ წარადგინა.

ამის გამო ჯანმრთელობა შემერყა, რომ არა “რესპუბლიკელი” ლილი ებრალიძის დახმარება, მე დღეს ცოცხალი არ ვიქნებოდი. ამის შემდეგ ბატონმა ელგუჯამ, რომ გაეთვალისწინებინა რა მძიმე მდგომარეობაში ჩამაყენა, განაცხადა, რომ მე მქონდა ხელფასის ხიბლი, არ მქონდა საარჩევნო გამოცდილება, ვიყავი ავადმყოფი და ვერ ვიმუშავებდი საარჩევნო კომისიაში. ასევე ამბობს, რომ წინასაარჩევნოდ მე არ ვიყავი პარტიაში, ჩემთვის პრიორიტეტი “ქართული ოცნების” დაცვა და ოქტომბრის მონაპოვრის შენარჩუნება იყო. ბატონმა ელგუჯამ შელახა არა მარტო ჩემი, არამედ კოალიციის იმიჯი და რეიტინგი. ჩემი პარტიის ხელმძღვანელმა, რომელსაც ყველაზე მეტად ვენდობოდი, 30 ვერცხლად გამყიდა “ნაციონალზე”.

_ თქვენი თქმით, ელგუჯა ჩხაიძემ გითხრათ, რომ მას მიწოდებული ჰქონია ინფორმაცია თამარ ასკურავას პოლიტიკური წარსულის შესახებ, მაგრამ მაინც დაამტკიცეს . გადაამოწმეთ თუ არა ეს ინფორმაცია?

_ კი, დავუკავშირდი ლეილა კვანტალიანსა და ემზარ კაკულიას. მათ გამოთქვეს აღშფოთება და მითხრეს, რომ ეს სასწრაფოდ გადავამოწმო პარტიის თავმჯდომარესთან _ ჩვენ ვისი კანდიდატურაც გამოგვიგზავნე, ის დავნიშნეთო.

ელგუჯა ჩხაიძემ ბოლოს ისიც მითხრა, ჩემი პარტიაა და ვისაც მინდა, იმას მივიყვან, თუ მინდა გავავსებ “ნაციონალებით”, მე არ ვემორჩილები კოალიციას, მაქვს ჩემი გეზი და ჩემი მითითებაო.

რაც შეეხება თამარ ასკურავას, მან მართლაც დაწერა განცხადება საკუთარი ნებით და ამჯერად ლანჩხუთის #61 საოლქო კომისიის წევრად დაიწყო მუშაობა, თუმცა, მკაფიოდ დააფიქსირა, რომ ის არასდროს არ ყოფილა არც ერთი პარტიის წევრი.

ჩვენ ამ საკითხზე კომენტარი ელგუჯა ჩხაიძეს ვთხოვეთ: “როგორც თამარ ასკურავას, ასევე სხვების სერტიფიკატები გადავეცი თბილისის ოფისს. ყველაზე რთული სამსახურია სოციალური სამსახური, სადაც გაჭირვებულ ადამიანებთან გაქვს ურთიერთობა. მე ვნახე თამარ ასკურავას შემართება. ანკეტა შეავსო, ვისაუბრეთ, რამაც მომცა იმის საშუალება, რომ თამარი წარმედგინა კომისიის წევრად. თუ იმ თანამშრომლებს, რომლებიც “ნაციონალების”დროს მუშაობდნენ, უნდობლობა გამოვუცხადეთ, არ იქნება სწორი _ მე ამის მომხრე არც ვყოფილვარ და არც ვიქნები. თუ ვინმეს რამე დანაშაული აქვს, ამისათვის არსებობს სპეციალური ორგანოები და იქ მოსთხოვენ პასუხს. მე ყველას ვესაუბრე თამარის შესახებ და ვერავინ დამიდო ფაქტები მის საწინააღმდეგოდ. სწორედ ამიტომ მივანიჭე უპირატესობა მას. რაც შეეხება გოჩა ცინცაძეს, ძალიან წესიერი კაცია, მაგრამ აქ სხვა პარტიული ინტერესებია, ახალგაზრდა გოგოა, პარტიის ინტერესებს უკეთ წაადგება.”