გადაწყვეტილების მიღების უფლებამოსილება სასწრაფოდ უნდა დაუბრუნდეს საქართველოს კულტურისა და ძეგლთა დაცვის სამინისტროს და რუსთაველზე მდებარე “მხატვრის სახლთან” დაკავშირებით სპეციალურ განცხადებას ავრცელებს.
“რუსთაველის გამზირზე ყოფილი “მხატვრის სახლის” ადგილზე ახალი მრავალფუნქციური კომპლექსის მშენებლობასთან დაკავშირებით ვაცხადებთ, რომ პროექტი, რომლის მიხედვითაც მიმდინარეობს მშენებლობა, სრულიად მიუღებელია მოცემული ადგილისთვის. იგი შეუსაბამობაშია საქართველოს დედაქალაქის მთავარი არტერიის – რუსთაველის გამზირის ისტორიულად ჩამოყალიბებული ურბანული გარემოსთვის, როგორც თავისი მასშტაბით, ასევე სივრცით-გეგმარებითი და არქიტექტურულ-მხატვრული გადაწყვეტით. პროექტი არ ითვალისწინებს კულტურული მემკვიდრეობის ისეთი მაღალხარისხოვანი ძეგლების სიახლოვეს, როგორიც არის ქაშუეთის წმ. გიორგის სახელობის ეკლესია, კინოთეატრი “რუსთაველი”, ეროვნული გალერეა, ალექსანდრეს ბაღი, გუდიაშვილის ქუჩის განაშენიანება და სხვ. აქვე აღსანიშნავია, რომ ოფიციალური განხილვების დროს, ჩვენი სამინისტროს წარმომადგენლების მიერ, აღნიშნულ პროექტს არაერთხელ ეთქვა უარი, ვინაიდან მივიჩნევთ, რომ მხოლოდ კონკურსის მოწყობისა და ფართო, საჯარო განხილვების შედეგად შეიძლება იქნეს გამოვლენილი ამგვარი ღირშესანიშნავი ადგილისთვის შესაფერისი პროექტი, რომელიც, თავის მხრივ, დაფუძნებული იქნება ღრმა სამეცნიერო-კვლევით სამუშაოებზე, გაითვალისწინებს ძეგლთა დაცვის საერთაშორისო სტანდარტებით დადგენილ ყველა კრიტერიუმს და შესაბამისად, მომავალი შენობა, ორგანულად ჩაეწერება არსებულ სივრცეში,” _ ნათქვამია განცხადებაში.
