საგარეო საქმეთა მინისტრის ხელმძღვანელობით დელეგაციის წევრებმა შეხვედრები გამართეს სენატორ რონ ჯონსონთან, საგარეო ურთიერთობებისა და ევროპული კომიტეტიდან; სენატორ დიან ფეინსტენთან; სენატორ როჯერ ვიკერთან, ევროპაში უსაფრთხოებისა და თანამშრომლობის კომიტეტიდან; კონგრესმენებთან ქეი გრენგერთან და ნიტა ლოუისთან.
საგარეო საქმეთა მინისტრი მაია ფანჯიკიძე, თინა ხიდაშელთან, ირაკლი ჩიქოვანთან და დავით ონოფრიშვილთან ერთად, ასევე, შეხვდა კონგრესმენ მაიკლ ტერნერსა და სენატორ ჯონ მაკკეინს. მაია ფანჯიკიძე ასევე ესაუბრა სენატორ მარკო რუბიოს.
შეხვედრებზე მხარეებმა საქართველო-აშშ-ს ურთიერთობაზე ისაუბრეს. საქართველოს დელეგაციის წევრებმა კონგრესმენებსა და სენატორებს ინფორმაცია მიაწოდეს საქართველოში არსებულ ვითარებაზე და საგარეო პოლიტიკურ საკითხებზე. უმრავლესობის წევრის თინა ხიდაშელის განცხადებით, სენატსა და კონგრესში შეხვედრების ერთ-ერთი მთავარი თემა ნატოს 2014 წლის სამიტია. მისივე თქმით, სწორედ ეს იყო განხილვის ერთ-ერთი მთავარი თემა კონგრესმენ ტედ ტერნერთან შეხვედრისას “საუბრის დიდი ნაწილი ეთმობა სწორედ იმას თუ როგორი მომზადებულები არიან ისინი, რომ 2014 წელს სამიტი იყოს უფრო შედეგიანი, ვიდრე ეს ჩიკაგოს სამიტზე იყო. ბუნებრივია, ეს თემა განვიხილეთ კონგრესმენ ტერნერთან შეხვედრაზეც, რომელიც ნატო-ს საპარლამენტო ასაბლეაში აშშ-ს დელეგაციის ხელმძღვანელია,” _ განაცხადა ხიდაშელმა.
მისივე ინფორმაციით, კონგრესმენ ტედ ტერნერთან შეხვედრის დროს საუბარი შეეხო იმ ცვლილებების პროექტს, რომელიც სწორედ მისი ინიციატივით შევიდა ეროვნული თავდაცვის ავტორიზაციის აქტში, “ამ საკითხთან დაკავშირებით ჩვენ შევთანხმდით იმაზე, რომ პრობლემა იყო მისკომუნიკაცია, რომელიც, გარკვეულ მომენტში ორივე მხარეს შეგვექმნა. ჩვენ ამ მიმართულებით პრობლემას აღარ ველოდებით. საქართველოს ექნება სრული მხარდაჭერა მისი სტრატეგიული პარტნიორისგან. მთავარი გზავნილი, რითიც ჩვენ ამ შეხვედრებიდან გამოვდივართ არის ის, რომ საქართველოს სულ უფრო მეტი მეგობარი ჰყავს აშშ-ს სენატსა და კონგრესში,” _ განაცხადა თინა ხიდაშელმა.
საქართველოს დელეგაცია საგარეო საქმეთა მინისტრის ხელმძღვანელობით ამერიკის შეერთებულ შტატებში სამუშაო ვიზიტით იმყოფება. დელეგაციის შემადგენლობაში არიან საქართველოს მთავარი პროკურორი არჩილ კბილაშვილი და პარლამენტარები თინა ხიდაშელი, თედო ჯაფარიძე, ირაკლი ჩიქოვანი და დავით ონოფრიშვილი. დელეგაცია შეხვედრებს მართავს მართავს ამერიკის სენატსა და კონგრესში, ასევე სახელმწიფო დეპარტამენტის და იუსტიციის დეპარტამენტის წარმომადგენლებთან. საქართველოს დელეგაციის სამუშაო ვიზიტი 16 ივლისს დაიწყო.
